Jesus oye Omutse gwegongalo lyopaKriste. (Aaefeso 5:23) Kunena, Jesus ota wilike aalanduli ye yokombanda yevi okuza megulu, te shi ningi okupitila ‘momumati omwiinekelwa nomunandunge,’ nenge tu tye “omupiya omudhiginini nomunandunge.” (NW) (Lesha Mateus 24:45.) Jesus Kristus okwa langeka po “omupiya” ngoka nokwe mu pa uuthemba wokuninga omatokolo gontumba. Ihe omupiya oku na okukala ta vulika kuKristus nokuyakula aamwahe. Olye ano omupiya ngoka, nohe tu sile oshimpwiyu ngiini?

1. Olye “omupiya omudhiginini nomunandunge”?

Jehova okwa kala aluhe ha longitha omulumentu nenge okangundu okashona kaalumentu ya wilike oshigwana she. (Maleaki 2:7; Aahebeli 1:1) Konima yeso lyaJesus, aayapostoli naakuluntu yomuJerusalem oya kala taya kwatele komeho. (Iilonga 15:2) Kunena, okangundu kaakuluntugongalo yontumba, ano Olutuwiliki lwOonzapo dhaJehova, ohalu landula oshiholelwa shoka, sho talu gandja iikulya yopambepo nokukwatela komeho iilonga yokuuvitha. Olutuwiliki olwo “omupiya omudhiginini nomunandunge” ngoka a langekwa po kuJesus. (Mateus 24:45a) Iilyo yOlutuwiliki ayihe oyi li Aakriste ya gwayekwa nombepo ondjapuki, mboka taya ka pangela pamwe naKristus mUukwaniilwa we womegulu, ngele ya si.

2. Omupiya omudhiginini ohe tu pe iikulya yopambepo okupitila mushike?

Jesus okwa ti kutya omupiya omudhiginini ota ka ‘pa Aakriste ooyakwawo iikulya yopambepo pethimbo lyo opala.’ (Mateus 24:45b) Iikulya yopalutu mbyoka hatu li ohayi tu kwathele tu kale tu na oonkondo nuukolele. Sha faathana, iikulya yopambepo, ano omayele gomOohapu dhaKalunga, ohage tu pe oonkondo ndhoka twa pumbwa, opo tu kale aadhiginini kuJehova notu vule okulonga iilonga mbyoka Jesus e tu pa. (1 Timoteus 4:6) Iikulya yopambepo mbyoka ohatu yi mono okupitila mokugongala, piigongi iinene niishona nosho wo miileshomwa ya kankamena kOmbiimbeli. Ohatu yi mono wo okupitila muuvidio mboka hawu tu kwathele tu tseye kutya Kalunga okwa hala tu ninge shike nohawu koleke ekwatathano lyetu naye.

 ILONGA OSHINDJI

3. Oshigwana shaJehova oshi na okukala sha unganekwa

Olutuwiliki ohalu unganeke iilonga yOonzapo dhaJehova, talu wilikwa kuJesus. Jesus okwa li a wilike Aakriste yonale momukalo gwa faathana. Dhana OKAVIDIO.

Lesha 1 Aakorinto 14:33, 40, e tamu kundathana epulo tali landula:

• Oovelise ndhino otadhi ulike ngiini kutya Jehova okwa hala Oonzapo dhe dhi kale dha unganekwa?

4. Omupiya omudhiginini oha unganeke iilonga yetu yokuuvitha

Iilonga yokuuvitha oyo ya li ya simanenena kAakriste yonale. Lesha Iilonga 8:14, 25, e tamu kundathana omapulo taga landula:

• Olye a li ha kwatele komeho iilonga yokuuvitha mokati kAakriste yonale?

• Petrus naJohannes oya li yi inyenge ngiini kewiliko ndyoka ya li ya pewa kaayapostoli ooyakwawo?

Olutuwiliki ohalu unganeke iilonga ya simanenena yokuuvitha. Dhana OKAVIDIO.

 Jesus okwa li a tsu omuthindo nkene iilonga yokuuvitha ya simana. Lesha Markus 13:10, e tamu kundathana omapulo taga landula:

• Omolwashike iilonga yokuuvitha ya simanenena kOlutuwiliki?

• Omolwashike iilonga yokuuvitha muuyuni awuhe, ya pumbwa okuunganekwa ‘komupiya omudhiginini nomunandunge’?

5. Omupiya omudhiginini ohe tu wilike

Olutuwiliki ohalu wilike Aakriste yashili muuyuni awuhe. Oshike hashi lu kwathele lu tokole nkene lu na okuwilika oshigwana shaJehova? Tala nkene lwa li halu shi ningi nale. Lesha Iilonga 15:1, 2, e tamu kundathana omapulo taga landula:

• Oshike sha li she eta oontamanana mokati kAakriste yamwe yonale?

• Paulus naBarnabas nosho wo yalwe oya li ya ka konga ekwatho kulye, opo ya kandule po uupyakadhi mboka?

Lesha Iilonga 15:12-18, 23-29, e tamu kundathana epulo tali landula:

• Olutuwiliki lwonale manga inaalu ninga etokolo moshinima shontumba, olwa li halu tala kushike uuna talu kongo ewiliko kuKalunga?— Tala ovelise 12, 15 nosho wo 28.

Lesha Iilonga 15:30, 31 nosho wo 16:4, 5, e tamu kundathana omapulo taga landula:

• Aakriste yonale oya li yi inyenge ngiini, sho ya pewa omalombwelo kOlutuwiliki?

• Jehova okwa li e ya laleke nuuyamba ngiini sho ya vulika?

Lesha 2 Timoteus 3:16 nosho wo Jakob 1:5, e tamu kundathana epulo tali landula:

• Kunena Olutuwiliki ohalu kongo ewiliko kulye uuna talu ningi omatokolo?

 OWI ILONGO SHIKE?

Olutuwiliki olwo “omupiya omudhiginini nomunandunge,” a langekwa po kuKristus. Ohalu gandja ewiliko niikulya yopambepo kAakriste muuyuni awuhe.

Omapulo geendululo

• Olye a langeka po “omupiya omudhiginini nomunandunge”?

• Olutuwiliki ohalu tu sile oshimpwiyu ngiini?

• Mbela owi itaala ngaa kutya Olutuwiliki olwo “omupiya omudhiginini nomunandunge”?