WANGƆ 54

“Mbɛ ti mbili mbili nga ti kɔdɛ” adu na, kwa mɛ lo ndo li nɛ?

Yezo la du Gbia ti ndo bombi tɛ awakristo. (Efɛzɛ 5:23) Ndɛ lo mɛ, Yezo ndo lɛ gbia ka ndozu wa lo ndo dɔ̃ ava lo na nɔ̃ ge tise na lége tɛ “mbɛ ti mbili mbili nga ti kɔdɛ.” (Di Matie 24:45.) Yezo nvɛ̃ni la kpã “mbɛ” niko, lo hɛ̃ nga lo lo-gbia ti bangɔ ndo bombi, kanda ayɔ ya mbɛ niko tɔndɔ Yezo wa lo ba ndo ayata Kristo. Mbɛ niko du na? Lo ndo ba ndo e ngasia?

1. “Mbɛ ti mbili mbili nga ti kɔdɛ” adu na?

Bandandó gã Yehova ndo hɛ̃ kumba ti bangɔ ndo azi tɛ lo hɛ̃ zo kɔi bere etuluku tɛ azi. (Malaki 2:7; Aebreo 1:1) Na pɛ kwá tɛ Yezo, Yehova hɛ̃ndó kumba niko hɛ̃ atoma nga na abiazi mɛndó ka Yeruzalɛmɛ. (Awa Pangɔ Kwa 15:2) Kwɛ kɔi, etuluku tɛ abiazi mɛ ndo ili ni ya Bombi tɛ Adonzi la ndo hɛ̃ tɛ ti nyingɔ hɛ̃ awakwa tɛ Yehova wa ala ndo ba nga ndo kwa ti fangɔ tɛnɛ ndɛ. Etuluku niko du “mbɛ ti mbili mbili nga ti kɔdɛ [mɛ Yezo] kpã.” (Matie 24:45a, NWT) Ayata zu ti Bombi tɛ Adonzi ala du awakristo mɛ ahĩni la na kpɔ̃ ti nyingɔ, ala ndo sepala na dangɔ bɛ ti lɛngɔ gbia ndoni kɔi na Yezo ka ndozu na pɛ kwa tɛ la.

2. Tɛ ti nyingɔ mɛ mbɛ ti mbili mbili ndo hɛ̃ e nɛ?

Yezo tɛnɛndó ya mbɛ ti mbili mbili nga ti kɔdɛ na hɛ̃ngɔ hɛ̃ ava lo “tɛ na ngoi mɛ alengbi.” (Matie 24:45b) Ngoi mɛ e ndo tɛ tɛ ko, ni ndo hɛ̃ e ngunu wa ndo bata nga sãte tɛ e. Kwɛ kɔi, tɛ ti nyingɔ mɛ e ndo tɛ, afa ya Tɛnɛ tɛ Nzapa mɛ ndo lo kaya Ngbangɔ ndo hɛ̃ e ngunu ya e ngbã mbilimbili ka mbage tɛ Yehova wa e kokisa nga kwa mɛ Yezo zia hɛ̃ e. (1 Timɔte 4:6) E ndo lua tɛ ti nyingɔ niko ka bombi, ka akota bombi, na ya ambɛti nga na avideo mɛ ndo kambisa nda tɛnɛ ti ya Ngbangɔ mɛ ndo za e ya e hĩnga gwɛ̃ tɛ Nzapa wa e ti na mangbi ti kpengbani na lo.

GI HĨNGANGƆ LO MƐNDƐ̃

Gi hĩngangɔ nda mɛ e na gwɛ̃ tɛ “mbɛ ti mbili mbili nga ti kɔdɛ,” afa ya Bombi tɛ Adonzi.

Bombi tɛ Adonzi ndo hɛ̃ tɛ ti nyingɔ, andia wa ndo za nga Atɛmwɛ tɛ Yehova ti lɛ gigi zu

3. Ayɔ ya alɛkɛ linɔ tɛ azi tɛ Yehova

Yezo ndo tambwisa kwa tɛ Atɛmwɛ tɛ Yehova na lége ti Bombi tɛ Adonzi. Se mɛ ngandó Yezo tambwisa na awakristo ti siɛklɛ ti uzu la. Ba VIDEO.

VIDEO: Yehovah abongisaka basaleli na ye (6:18)

Di 1 Kɔrinto 14:33, 40, wa na pɛni hɛ̃ gbinya ti hũnda olo mɛ:

Ngasia la vɛrsɛ mɛ fa ya gwɛ̃ tɛ Yehova du ya a lɛkɛ linɔ̃ tɛ lo nɛ?

4. Mbɛ ti mbili mbili nga ti kɔdɛ ndo ba ndo kwa ti fangɔ tɛnɛ

Kwa ti fangɔ tɛnɛ dundó ngbondoni ka tɛ awakristo ti siɛklɛ ti uzu. Di Awa Pangɔ Kwa 8:14, 25, wa na pɛni hɛ̃ gbinya ti ahũnda olo mɛ:

Zo mɛndó ndo ba ndo kwa ti fangɔ tɛnɛ mɛndó awakristo ti siɛklɛ ti uzu ndo li na?
Ye mɛndó Petro na Yoanɛ li na ngoi mɛndó ala lua ndia mɛ alo ka tɛ atoma mɛndɛ̃ nɛ?

Kwa ti ngbondoni mɛ Bombi tɛ Adonzi ndo ba ndoni adu kwa ti fangɔ tɛnɛ. Ba VIDEO.

VIDEO: Bamipesá mobimba na mosala ya kosakola (1:24)

Yezo tɛnɛndó ya kwa ti fangɔ tɛnɛ adu kwa kɔi mɛ ngbondoni. Di Marko 13:10, wa na pɛni hɛ̃ gbinya ti ahũnda olo mɛ:

Nda mɛ Bombi tɛ Adonzi ndo hũ kwa ti fangɔ tɛnɛ ya ni du ngbondoni sĩ nɛ?
Nda mɛ e na gwɛ̃ ya “mbɛ ti mbili mbili nga ti kɔdɛ” tambwisa kwa ti fangɔ tɛnɛ na ndo lɛ gigi zu nɛ?

5. Mbɛ ti mbili mbili nga ti kɔdɛ ndo hɛ̃ e andia

Bombi tɛ Adonzi ndo hɛ̃ andia hɛ̃ awakwa tɛ Yehova ti lɛ gigi zu. Ayata mɛ kaya Bombi tɛ Adonzi ndo hĩnga ndia mɛ ala lengbi ti hɛ̃ngɔ e ngasia? E ba se mɛndó Bombi tɛ Adonzi ti siɛklɛ ti uzu ndo li na ni. Di Awa Pangɔ Kwa 15:1, 2, wa na pɛni hɛ̃ gbinya ti ahũnda olo mɛ:

Ye mɛndó ta awakristo ti siɛklɛ ti uzu ndo mangbi na ndo ni ma nɛ?
Azi mɛndó Polo na Barnabasi nga na awakristo mɛndɛ̃ gwe ka tɛ la ti gingɔ wangɔ na?

Di Awa Pangɔ Kwa 15:12-18, 23-29, wa na pɛni hɛ̃ gbinya ti hũnda olo mɛ:

Ye mɛndó Bombi tɛ Adonzi ti siɛklɛ ti uzu li ti yɔngɔ litambwisi tɛ Nzapa uzu ti nɛngɔ ya ala mu ekateli na ndo lo niko nɛ?—Ba vɛrsɛ ti 12, 15, nga na 28.

Di Awa Pangɔ Kwa 15:30, 31 nga na 16:4, 5, wa na pɛni hɛ̃ gbinya ti ahũnda olo mɛ:

Ye mɛndó awakristo ti siɛklɛ ti uzu li na ngoi mɛndó ala lua ndia mɛ lo ka tɛ Bombi tɛ Adonzi nɛ?
Na lo mɛ ya ala tɔndɔndó ndia niko, Yehova sulundó ala ngasia?

Di 2 Timɔte 3:16 nga na Zaki 1:5, wa na pɛni hɛ̃ gbinya ti hũnda olo mɛ: