Yesu yo ntu wakipanga. (Baefesi 5:23) M’masiku agha, Yesu ukufwana nu budindo ubu ali nabo kumwanya, ikubalongosya ababombi bake pa kisu kya pasi ukwendela mu “Mbombi unsubiliwa uwa mahala.” (Belenga Matai 24:45.) Nalinga ukuti “umbombi” uyu apeliwe ubudindo na Yesu Kristu ukuti asaleghe ifyakubomba, loli atikwiketa ukuya wa pamwanya. M’malo mwake, umwene mbombi wa Kristu kangi ikubabombela abakamu ba Kristu. Ngimba umbombi uyu yo nani? Ngimba umbombi uyu ikutupwelelela bulebule?

1. Ngimba “umbombi unsubiliwa uwa mahala” yonani?

Utubalilo tosa Yehova abombelagha umundu yumo pamo igulu lya bandu ukubapa abandu bake ubulongosi. (Malaki 2:7; Bahiburi 1:1) Bo Yesu afwile, abatumiwa na bakulumba ba kipanga bo aba balongosyagha ku Yerusalemu. (Imbombo sya Batumiwa 15:2) Mwakukonga imbatiko iyi, amasiku agha akagulu kanandi kabakulumba, aka kikukoleliwa Akabughatila Akakulongosya kikutendesya ifyakulya fya mwambepo nu bulongosi pambombo iyakufumusya. Abene yo “mbombi unsubiliwa uwa mahala uyu [Yesu] amwimike.” (Matai 24:45a) Bosa aba bali Nkabughatila Kakulongosya bapakiwe na mbepo mwikemo kangi bikughulila ukwakulaghila pampene na Yesu kumwanya.

2. Ngimba fyakulya filiku fya mwambepo ifi umbombi unsubiliwa ikubika?

Yesu ayobile ukuti umbombi unsubiliwa ikuya “pakubapagha [Abakristu abinabo] ifyakuya fya mwambepo pakabalilo akanunu.” (Matai 24:45b) Bo muno ifyakulya ifi tukulya fikupangisya ukuti tuyeghe nu mbili ununu, ifyakulya fya mwambepo ubu bo bulongosi ubwakufuma M’masyu gha Kyala, fikututula ukuya bamaka mwambepo bo tukindilila ukuya basubiliwa kwa Yehova nu kubomba imbombo iyi atupele. (1 Timoti 4:6) Tukwambilila ifyakulya fya mwambepo ifi ukwendela pangomano isya kipanga, isya dela, kangi ni isya kighaba, ukongelelapo amabuku agha ghikulingania Ibaibolo. Kangi na mavidiyo agha ghikututula ukupilikisya ubwighane bwa Kyala nu kukusya ubumanyani bwitu nu mwene.

 MANYILA NYINGI

3. Abandu ba Yehova bikulondiwa ukulongosiwa

Ukwendela mu bulongosi bwa Yesu, Akabughatila Kakulongosya kikuketesya imbombo sya Baketi ba Yehova. Imbatiko yakufwana itolo yaliko nkabalilo ka Bakristu babwandilo. Ketelela IVIDIYO.

Belenga 1 Bakorinti 14:33, 40, kangi muyobesanie ilalusyo ili:

• Ngimba amavesi agha ghikunangisya bulebule ukuti Yehova ikulonda ukuti Abaketi bake bakolelaneghe?

4. Umbombi unsubiliwa ikutendekesya imbombo iyakufumusya

Ukufumusya yo yali mbombo yakulondiwa fiyo iyi yabombiwagha na Bakristu babwandilo. Belenga Imbombo sya Batumiwa 8:14, 25, kangi muyobesanie amalalusyo agha:

• Ngimba yo nani uyu alongosyagha pa mbombo ya kufumusya nkabalilo kakunyuma?

• Ngimba Peteri na Yohani bakongagha bulebule ubulongosi bwa batumiwa abangi?

Imbombo iyakufumusya yo mbombo yakulondiwa fiyo iyi Akabughatila Kakulongosya kikutendekesya. Ketelela IVIDIYO.

 Yesu alingenie ukulondiwa kwa mbombo yakufumusya. Belenga Marko 13:10, kangi muyobesanie amalalusyo agha:

• Nongwa yafiki imbombo yakufumusya yakulondiwa fiyo ku ba Nkabughatila Kakulongosya?

• Nongwa yafiki tukulondiwa “umbombi unsubiliwa uwa mahala” ukuti atendekesyeghe imbombo ya pa kisu kyosa?

5. Umbombi unsubiliwa ikutupa ubulongosi

Akabughatila Kakulongosya kikubika ubulongosi ubu bukubatula Abakristu pa kisu kyosa. Ngimba kikusala bulebule ubulongosi bwakuti bubatule abandu? Keta muno Akabughatila Kakulongosya ka nkabalilo ka Bakristu bakwanda kabombelagha. Belenga Imbombo sya Batumiwa 15:1, 2, kangi muyobesanie amalalusyo agha:

• Ngimba Abakristu babwandilo bakakolelanagha pa findu fiki?

• Ngimba Pauli, Barnaba, na bangi babukile kughu ukuti bakamasye indamyo iyi yalipo?

Belenga Imbombo sya Batumiwa 15:12-18, 23-29, kangi muyobesanie ilalusyo ili:

• Ngimba akabughatila kakulongosya ka iyolo kaketesyagha ifindu fiki bo kakali ukusala isyakubomba linga kikusuma ubulongosi bwa Kyala pa nkhani yimo?​—Keta amavesi 12, 15, na 28.

Belenga Imbombo sya Batumiwa 15:30, 31 na 16:4, 5, kangi muyobesanie amalalusyo agha:

• Ngimba Abakristu babwandilo babombile isyafiki bo bambilile ubulongosi ukufuma ku kabughatila kakulongosya?

• Ngimba Yehova abasayagha bulebule panongwa yakupilikila kwabo?

Belenga 2 Timoti 3:16 na Yakobu 1:5, kangi muyobesanie ilalusyo ili:

• Ngimba Akabughatila Kakulongosya lino kikusuma kughu ubulongosi linga kikupanga ifyakusala?

 IFUNDO INYWAMU

Akabughatila Kakulongosya yo “mbombi unsubiliwa uwa mahala” uyu imikiwe na Yesu Kristu. Ikutendekesya ubulongosi ni fyakulya fya mwambepo pa kisu kyosa.

Ukughomokelamo

• Ngimba yo nani uyu amwimike “umbombi unsubiliwa uwa mahala”?

• Ngimba Akabughatila Kakulongosya kikutupwelelela bulebule?

• Ngimba mukusubila ukuti Akabughatila Kakulongosya yo “mbombi unsubiliwa uwamahala”?