Reʼ Jesús «kʼamal kibʼeeh aj nimaneel» pan molaabʼ (Efesios 5:​23). Atoobʼ ta pan taxaaj wilik i Jesús, pan qaqʼijil irukoj i «moso korik wach rukʼux eh wilik runaʼojbʼal» reh rukʼamariik kibʼeeh taqeh rajtahqaneel ayuʼ wach akʼal (chawil Mateo 24:​45). Reʼ «moso» wilih xyeʼarik rukamaj ruum i Jesús eh ruum aj reʼ wilik kʼisiin rajaawriik. Atoobʼ ta jeʼ reʼ, rehtʼal chi reʼ reh rumoso i Cristo eh inkamanik reh taqeh ras ruchaaqʼ i Cristo. ¿Ajwach i moso reʼreʼ? ¿Nikʼwach qojruchaʼjeej?

1. ¿Ajwach i «moso korik wach rukʼux eh wilik runaʼojbʼal»?

Reʼ Jehová juneliik rukojom winaq oon jun tzuhbʼ chi winaq reh rubʼehsjiik i rutinamiit (Malaquías 2:7; Hebreos 1:1). Jeʼ rukabʼ noq kamnaq naq chik i Jesús, reʼ naq chik taqeh rajtahqaneel eh taqeh kʼamal bʼeeh reh Jerusalén xkikʼam rubʼeeh i molaabʼ (Hechos 15:2). Jeʼ rukabʼ najtir, pan qaqʼijil jun tzuhbʼ chi kʼamal bʼeeh, Reʼ kikʼamwik bʼeeh pan rutinamiit i Jehová keh taqeh testigo reh Jehová iruyeew qawaʼ pan uxlabʼal eh irukʼam rubʼeeh i qʼoroj kʼuhbʼaal. Reʼ jun tzuhbʼ wilih reʼ i «moso korik wach rukʼux eh wilik runaʼojbʼal reʼ xkojarik ruum i patroon [reʼ Jesús] reh rilariik» taqeh kamanik reʼreʼ (Mateo 24:45 reʼ rutihkʼiik, TNM). Reʼ kikʼamwik bʼeeh pan rutinamiit i Jehová, ajnimaneel taqeh sikʼooj kiwach ruukʼ santo laj uxlabʼal eh inkuyʼeej taqʼanik ruukʼ i Cristo pan runimaal rajaawriik ar pan taxaaj, noq nakuxoq i kikʼachariik ayuʼ wach akʼal.

2. ¿Chajariik chi wiʼk pan uxlabʼal iruyeew i moso korik wach rukʼux?

Reʼ Jesús xuqʼor chi reʼ moso korik wach rukʼux xkanabʼjik pan qʼabʼ «ruyeʼariik [keh chuʼnchel taqeh ajnimaneel] i kiwaʼ manlik pan ruqʼijiil» (Mateo 24:45 reʼ rukuxiik, TNM). Jeʼ rukabʼ i qawaʼ qahaaʼ iruyeew qansil eh irubʼan chi suq qakʼux, reʼ qawaʼ pan uxlabʼal reʼ inelik cho pan ruqʼorbʼal i Dios iruyeew qansil reh chi korik wach qakʼux ruukʼ i Jehová eh chi ne inqabʼan i kamanik reʼ qojrutaqʼaaʼ chi rubʼanariik i Jesús (1 Timoteo 4:6). Reʼ qawaʼ pan uxlabʼal wilih inqakʼul chupaam taqeh moloj iibʼ, nimlaj moloj iibʼ, taqeh qahuuj eh video isamaj cho pan Santo Laj Huuj. Chuʼnchel i wilih qojrutobʼeej runabʼjiik chajariik iraaj i Jehová chi ne inqabʼan eh chi reʼ qamigohiil ruukʼ ne inkowjik.

 CHATZʼIR RIIJ I KʼAHCHIʼ ATIJEM

3. Chuʼnchel i narubʼanam i rutinamiit i Jehová ko ruman chi tusimaj wach

Reʼ Jesús inbʼehsanik reh i kikʼamwik bʼeeh pan rutinamiit i Jehová, reh rilariik eh rutusariik wach i kikamaj taqeh testigo reh Jehová. Pan peet siglo, jeʼ naq reʼ tusimaj wach i kikamaj taqeh ajnimaneel. Chawil taq i VIDEO.

Chawil taq i 1 Corintios 14:​33, 40 eh tiqʼoroq taq chi riij:

• Jeʼ rukabʼ xawil chupaam taqeh versículo wilih, ¿iraaj na i Jehová chi tuslik wach i kikamaj ne inkibʼan taqeh rutestigo? ¿Chaaj woʼ reet jeʼ reʼ inakapaaj?

4. Reʼ moso korik wach rukʼux irubʼan chi reʼ qʼoroj kʼuhbʼaal inqabʼan tuslik wach

Reʼ aajwaal naq wach chi keh taqeh peet ajnimaneel, reʼ naq i qʼoroj kʼuhbʼaal. Chawil taq i Hechos 8:​14, 25 eh tiqʼoroq taq chi riij:

• Pan peet siglo, ¿ajwach naq kikʼamwik naah i qʼoroj kʼuhbʼaal?

• ¿Chajariik xkibʼan i Pedro eh i Juan ruukʼ xqʼorarik keh ruum taqeh apóstol?

Reʼ kamanik xti aajwaal wach iril i kikʼamwik bʼeeh pan rutinamiit i Jehová, reʼ chi pan tuslik ne inbʼanarik i qʼoroj kʼuhbʼaal. Chawil taq i VIDEO.

 Reʼ Jesús xuqʼor chi reʼ qʼoroj kʼuhbʼaal xti aajwaal wach. Chawil taq i Marcos 13:​10 eh tiqʼoroq taq chi riij:

• ¿Chaaj woʼ reet i kikʼamwik bʼeeh pan rutinamiit i Jehová irukoj chi peet i qʼoroj kʼuhbʼaal?

• ¿Chaaj woʼ reet aajwaal wach chi qeh chi reʼ «moso korik wach rukʼux eh wilik runaʼojbʼal» ne iril eh ne irutus wach chi korik i qʼoroj kʼuhbʼaal chi jun suut i akʼal?

5. Reʼ moso korik wach rukʼux irukʼam qabʼeeh

Reʼ kikʼamwik bʼeeh pan rutinamiit i Jehová irukʼam kibʼeeh chuʼnchel taqeh ajnimaneel chi jun suut i akʼal. ¿Nikʼwach iruchih i naruqʼorom keh i ajnimaneel? Chakoj taq rehtaal nikʼwach naq irubʼan i kikʼamwik bʼeeh pan rutinamiit i Jehová reh taqeh peet ajnimaneel pan peet siglo. Chawil taq i Hechos 15:​1, 2 eh tiqʼoroq taq chi riij:

• ¿Chajariik maʼ xponik ta chi kiwach juʼjun taqeh ajnimaneel reh i peet siglo?

• Reʼ Pablo eh i Bernabé eh juʼjun taqeh ajnimaneel ¿ajwach xooj kisikʼ reh rukorsjiik wach i kʼaxkilal wilih?

Chawil taq i Hechos 15:​12-​18 eh 23-​29, eh tiqʼoroq taq chi riij:

• Noq ko majaaʼ naq inkichih, ¿chajariik xubʼan inkʼamwik bʼeeh pan rutinamiit i Jehová reh i peet siglo reh chi reʼ naq i Dios ne inkʼamwik rubʼeeh ruukʼ i kʼaxkilal wilih? (Chawil taq i versículo 12, 15 eh 28).

Chawil taq i Hechos 15:​30, 31 eh 16:​4, 5, eh tiqʼoroq taq chi riij:

• ¿Chajariik xkikʼraaj taqeh ajnimaneel noq xqʼorarik keh i nakibʼanam ruum i kikʼamwik bʼeeh pan rutinamiit i Jehová reh i peet siglo?

• ¿Nikʼwach qehtʼal chi reʼ Jehová xukuxisaj taqeh ruum chi xinimanik?

Chawil taq i 2 Timoteo 3:​16 eh Santiago 1:5, eh tiqʼoroq taq chi riij:

• Pan qaqijil, ¿chajariik irubʼan i kikʼamwik bʼeeh pan rutinamiit i Jehová reh chi ne inkʼamarik kibʼeeh ruum i Jehová ruukʼ i nakichihiim?

 KʼOLOQ PAN AKʼUX

Reʼ kikʼamwik bʼeeh pan rutinamiit i Jehová reʼ i «moso korik wach rukʼux eh wilik runaʼojbʼal» reʼ xkanabʼjik ruum i Cristo. Reʼ moso wilih iruqʼor i nakibʼanam eh iruyeew kiwaʼ pan uxlabʼal chuʼnchel taqeh ajnimaneel chi jun suut i akʼal.

Reʼ xkahnik pan akʼux

• ¿Ajwach xkanaʼnik reh i «moso korik wach rukʼux eh wilik runaʼojbʼal»?

• ¿Nikʼwach qilariik irubʼan i kikʼamwik bʼeeh pan rutinamiit i Jehová?

• ¿Inakoj na wach i hat chi reʼ kikʼamwik bʼeeh pan rutinamiit i Jehová, reʼ i «moso korik wach rukʼux eh wilik runaʼojbʼal»?