Sises me tapwin mwomwohdisohn Kristian. (Episos 5:23) Rahnwet Sises ketiket nanleng oh kin doadoahngki “ladu lelepek oh loalokong” pwehn kaweid sapwellime tohnpadahk kan nin sampah. (Wadek Madiu 24:45.) Sises Krais me ketin idihada “ladu” menet oh ketikihong ih pwuhng en wiahda ekei pilipil kan. Ahpw, laduwo kin anahne peikiong Krais oh papah rien Krais kan. Ihs ladu menet? Ia duwen laduwo eh kin apwalih kitail?

1. Ihs me “ladu lelepek oh loalokong”?

Siohwa kin ketin ahnsou koaros doadoahngki emen ohl de pwihn tikitik ehu en ohl kan pwehn kaweid sapwellime aramas akan. (Malakai 2:7; Ipru 1:1) Mwurin pwoulahn Sises, wahnpoaron kan oh elder kan nan Serusalem me kin tiengla mwowe. (Wiewia 15:2) Duwehte met, rahnwet, pwihn tikitik ehu en elder kan​—Pwihn me Kin Apwalih Mwomwohdiso nan Sampah Pwon en Sounkadehdehn Siohwa kan​—kin kihda padahk oh kaweid en Paipel kan oh apwalih doadoahk en kalohk. Pwihn wet iei me “ladu lelepek oh loalokong me [Sises ketin] idihada.” (Madiu 24:45a) Koaros me kisehn pwihn wet wia Kristian keidi kei me kin kasikasik en iang Krais kaunda nan sapwellime Wehi nanleng, ni ar mour nin sampah eh imwisekla.

2. Soangen mwenge dah me ladu lelepeko kin kihda?

Sises mahsanih me ladu lelepeko pahn “kihong [ienge Kristian kan] kanarail mwenge ni ahnsou me konehng.” (Madiu 24:45b) Duwehte atail kin mwenge pwe kitail en kak kehlail oh roson, kaweid kan sang Mahsen en Koht kin kakehlaka kitail en loalopwoatohngete Siohwa oh wia doadoahk me Sises ketikihong kitail. (1 Timoty 4:6) Kitail kin alehdi kaweid pwukat me rasehng mwenge nan atail mihting kan, mihting tohrohr kan oh sang nan pwuhk kan oh kisin kasdo kan me poahsoankihda Paipel. Mepwukat kin sewese kitail en wehwehki kupwuren Koht oh kakehlaka atail nanpwungmwahu reh.

 KALAUDEHLA OMW ESE MET

3. Sapwellimen Siohwa aramas akan anahne soandi mwahu

Sang pahn kaweidpen Sises, Pwihn me Kin Apwalih Mwomwohdiso nan Sampah Pwon kin koasoanehdi doadoahk me Sounkadehdehn Siohwa kan kin wia. Ni soangen mwohmwohte, Sises kin ketin kaweid doadoahk me tepin Kristian ko kin wia. Kilang KISIN KASDO.

Wadek 1 Korint 14:33, 40, oh mwuri koasoiapene peidek wet:

• Ia duwen iretikitik pwukat eh kasalehda me Siohwa ketin kupwurki sapwellime Sounkadehde kan en soandi mwahu?

4. Ladu lelepeko kin koasoanehdi atail doadoahk en kalohk

Kalohk iei doadoahk me keieu kesempwal me tepin Kristian ko kin wia. Wadek Wiewia 8:14, 25, oh mwuri koasoiapene peidek pwukat:

• Nanpwungen tepin Kristian ko, ihs me kin kaweid doadoahk en kalohk?

• Dahme Piter oh Sohn wia ni ara alehdi kaweid sang iangara wahnpoaron ko?

Kalohk iei doadoahk me keieu kesempwal me Pwihn me Kin Apwalih Mwomwohdiso nan Sampah Pwon kin koasoanehdi. Kilang KISIN KASDO.

 Sises ketin kasalehda uwen kesempwalpen kalohk. Wadek Mark 13:10, oh mwuri koasoiapene peidek pwukat:

• Dahme kahrehda Pwihn me Kin Apwalih Mwomwohdiso nan Sampah Pwon uhdahn kesempwalki kalohk?

• Dahme kahrehda kitail anahne “ladu lelepek oh loalokong” en koasoanehdi doadoahk wet nan sampah pwon?

5. Ladu lelepeko kin kihda kaweid

Pwihn me Kin Apwalih Mwomwohdiso nan Sampah Pwon kin kaweid Kristian kan nan sampah pwon. Ia duwen pwihn wet ar kin pilada kaweid me re pahn kihda? Medewehla dahme pwihn me kin apwalih mwomwohdiso ni mwehin tepin Kristian ko wia. Wadek Wiewia 15:1, 2, oh mwuri koasoiapene peidek pwukat:

• Dahme ekei tepin Kristian ko sohte pwungkipene?

• Ihs me Pohl oh Parnapas oh meteikan kohla tuhwong pwehn peki sawas en kapwungala ire wet?

Wadek Wiewia 15:12-18, 23-29, oh mwuri koasoiapene peidek wet:

• Mwohn pwihn me kin apwalih mwomwohdiso ni mwehin tepin Kristian ko wiahda pilipil, dahme re wia ni ar rapahki kaweid en Koht ong ire wet? ​—Kilang iretikitik 12, 15 oh 28.

Wadek Wiewia 15:30, 31 oh 16:4, 5, oh mwuri koasoiapene peidek pwukat:

• Dahme tepin Kristian ko wia ni ar alehdi kaweid sang pwihn me kin apwalih mwomwohdiso?

• Ia duwen Siohwa eh ketin kapaia arail peik?

Wadek 2 Timoty 3:16 oh Seims 1:5, oh mwuri koasoiapene peidek wet:

• Ia wasa me Pwihn me Kin Apwalih Mwomwohdiso nan Sampah Pwon kin rapahki kaweid ie ni ahnsou me re kin wiahda pilipil rahnpwukat?

 DAHME KE SUKUHLKIER

Pwihn me Kin Apwalih Mwomwohdiso nan Sampah Pwon iei “ladu lelepek oh loalokong” me Krais ketin idihada. Pwihn wet kin kihong Kristian kan nan sampah pwon kaweid oh padahk kan me rasehng mwenge.

Kousapahl

• Ihs me idihada “ladu lelepek oh loalokong”?

• Ia duwen Pwihn me Kin Apwalih Mwomwohdiso nan Sampah Pwon ar kin apwalih kitail?

• Ke kamehlele me Pwihn me Kin Apwalih Mwomwohdiso nan Sampah Pwon iei “ladu lelepek oh loalokong”?