Jesus i kabesa di kongregason kriston. (Efésius 5:23) Aos, apartir di seu, Jesus sta na diriẑi si sigiduris li na Tera atraves di “servu jiru, di fiansa”. (Lei Mateus 24:45.) I Jesus Kristu propi ku kuji es “servu”. I da elis diritu di toma sertus disisons. Mesmu asin, e dibi di obdisi Kristu i sirbi ermons di Kristu. Kin ki es servu? I kuma ku es servu ta kuida di nos?

1. Kin ki “servu jiru, di fiansa”?

Jeova sempri usa un omi o un grupu pikininu di omis pa orienta si povu. (Malakias 2:7; Ebreus 1:1) Dipus di Jesus muri, apostulus ku ansions na Jerusalen toma lideransa. (Atus 15:2) Aos di mesmu manera, un grupusiñu di ansions, ku sedu Korpu Guvernanti di Tustumuñas di Jeova, ta da kumida spiritual i orienta tarbaju di pregason. Es grupu i ‘servu jiru, di fiansa ku [Jesus] kuji.’ (Mateus 24:45a) Tudu membrus di Korpu Guvernanti i kristons unjidu pa spiritu, i e na pera ora ke muri pa bai junta ku Jesus na seu na si Renu.

2. Kal kumida spiritual ku servu jiru, di fiansa ta da?

Jesus fala, servu jiru di fiansa na da se ermons kristons “se kumida na ora sertu.” (Mateus 24:45b) Suma ku kumida ku no ta kume ta judanu tene forsa fisiku ku saudi, kumida spiritual, ku sedu instruson di Palabra di Deus, ta danu forsa ku no pirsisa del pa kontinua fiel pa Jeova i fasi tarbaju ku Jesus danu. (1 Timótiu 4:6) No ta risibi e kumida spiritual atraves di runions, asembleias ku kongresus, tambi atraves di publikasons basiadu na Biblia ku videos ku ta judanu ntindi kal ki vontadi di Deus i fortalisi no amizadi ku el.

 APRINDI MAS

3. Povu di Jeova dibi di sta organizadu

Bas di orientason di Jesus, Korpu Guvernanti ta organiza tarbaju di Tustumuñas di Jeova. Jesus orientaba purmeru kristons di mesmu manera. Mostra VIDEO.

Lei 1 Koríntius 14:33, 40, dipus bo kombersa aserka des purgunta:

• Kuma ku es versikulus mostra kuma Jeova misti pa si Tustumuñas sedu organizadu?

4. Servu jiru di fiansa ta organiza no tarbaju di pregason

Pregason i tarbaju mas importanti ku kristons di purmeru sekulu ta fasiba. Lei Atus 8:14, 25, dipus bo kombersa aserka des purguntas:

• Kin ku ta orienta tarbaju di pregason entri kristons di purmeru sekulu?

• Kuma ku Pedru ku Jon reaẑi ku orientason ku se kumpañeris apostulus da?

Pregason i tarbaju mas importanti ku Korpu Guvernanti ta organiza. Mostra VIDEO.

 Jesus mostra kal ki importansia di tarbaju di pregason. Lei Markus 13:10, dipus bo kombersa aserka des purguntas:

• Pabia ku tarbaju di pregason i importanti dimas pa Korpu Guvernanti?

• Ke ku manda no pirsisa di “servu jiru, di fiansa” pa organiza es tarbaju na mundu ntidu?

5. Servu jiru di fiansa ta da orientason

Korpu Guvernanti ta da orientason pa kristons na mundu ntidu. Kuma ke ta disidi kal orientason ke na da? Jubi kuma ku Korpu Guvernanti di purmeru sekulu ta fasi kila. Lei Atus 15:1, 2, dipus bo kombersa aserka des purguntas:

• Kal kusa ku kriaba purblema entri kristons di purmeru sekulu?

• Na mon di ba kin ku Paulu ku Barnabé ku utrus bai pa rosolvi es purblema?

Lei Atus 15:12-18, 23-29, dipus bo kombersa aserka des purgunta:

• Antis di toma un disison, ke ku korpu guvernanti di purmeru sekulu ta fasi ora ke na buska orientason di Deus na un asuntu? — Jubi versikulu 12, 15 ku 28.

Lei Atus 15:30, 31 ku 16:4, 5, dipus bo kombersa aserka des purguntas:

• Kuma ku kristons di purmeru sekulu reaẑi ku orientasons ku korpu guvernanti da?

• Kuma ku Jeova bensua se obdiensia?

Lei 2 Timótiu 3:16 ku Tiagu 1:5, dipus bo kombersa aserka des purgunta:

• Na no tempu, Korpu Guvernanti ta buska orientason ora ke na toma disison?

 RUSUMU

Korpu Guvernanti i “servu jiru, di fiansa” ku kujidu pa Kristu. E ta da orientason ku kumida spiritual pa kristons na mundu ntidu.

Rekapitulason

• Kin ku kuji “servu jiru, di fiansa”?

• Kuma ku Korpu Guvernanti ta kuida di nos?

• Sera ki bu fia kuma Korpu Guvernanti i “servu jiru, di fiansa”?