Jesusga congregaciunpa uman japuymi caycan (Efesios 5:23). Mandätunchomi caycan “tantiaj y yäracuypaj esclavo” (leiriy Mateo 24:45, TNM). Chay ‘esclavutaga’ quiquin Jesusmi acrashga y autoridätapis goshga pushamänanchipaj. ¿Pïcunapätaj parlaycanchi ‘esclavo’ nerga? ¿Imanotaj pushaycalämanchi?

1. ¿Pitaj caycan “tantiaj y yäracuypaj esclavo”?

Jehovaga unaypitanami runacunata acrashga pushaycalämänanchipaj (Malaquías 2:7; Hebreos 1:1). Cielupana Jesús cuticushgan wichanga apostulcuna y ancianucunami congregaciunta pushar galaycärish (Hechos 15:2). Canan tiempupis chaynolami pushamänanchipaj acrashga ancianucuna caycan, paycunatami ninchi Jehovapa testiguncunata Pushajcuna cashganta (maquinchomi caycan lapan espiritual caj ruraycuna). Jina chay grupulapaj parlarmi ninchi “tantiaj y yäracuypaj esclavo” cashganta (Mateo 24:45a). Cay Pushamajninchi hermanucunaga lapancunami cielupaj aywapäcunanpaj acrashgacuna caycan. Cielupitami Jesuswan gobernapäcamunga cay Pachata.

2. ¿Imanotaj cay esclavuga yanapämanchi Diosninchita aduraycarla caycänapaj?

Cay yäracuypaj esclavo ‘tiempulancho micuyta goycalämänanchipaj’ Jesús aunicurgan (Mateo 24:45b). Aumi, micuy japuymi caycan Diospa Palabranpita lapan chasquishganchicuna, chaynoparämi calpalanchi caycan Jehovapita mana raquicar mandamashganchita cumplinapaj (1 Timoteo 4:6). Shacyala y calpayoj ricacunapäga reuniunninchipis y asambleanchipis caycanmi; Bibliapita jorgacämushga publicaciuncunapis caycanmi. Diospa voluntänin ima cashganmanmi yarpachacunanchi y imata rurar paypita mana raquicänapäpis.

 SHUMAJ YACHACURCUNAPAJ

3. Jehovaga marcanta ali camacächin

Jehovapa testiguncunata Pushaj hermanucunaga Jesuspa mandätuncho cashpanmi ima ruraycunatapis ali camacächin. Unay apostulcuna cawashgan wichanpis chaynolami cargan. VIDEUTA ricapäcuy.

Leipäcuy 1 Corintios 14:33, 40 y caypita parlapacäriy:

• Biblia nishganno, ¿imano adurananchitataj Jehová munan? ¿Imanirtaj chayno yarpanqui?

4. Yanapämanchi Diospita imano yachachicunapaj

Unay cristianucunaga imata jaguiycurpis Diospitami masga yachachicärej. Leipäcuy Hechos 8:14, 25 y caycunapita parlapacäriy:

• ¿Unay wichanga pïcunataj predicación ruracänanpaj pushacamoj?

• ¿Imatataj rurapäcurgan Pedruwan Juan, waquin apostulcunapa mandätuta chasquirir?

Jehovapa testiguncunata Pushajcunaga imaycata rurapäcun Diospita may chaycho yachachicunapaj. VIDEUTA ricapäcuy.

 Jesusga yarpächicurganmi Diospita yachachicunapaj. Leipäcuy Marcos 13:10 y caycunapita parlapacäriy:

• ¿Imanirtaj Jehovapa testiguncunata Pushaj hermanucunaga cutin cutin yarpächimanchi Diospita yachachicunapaj?

• Predicación may chaycho cananpaj, ¿imanirtaj ali caycan “tantiaj y yäracuypaj esclavo” camacächishganga?

5. Paycunaga pushaycalämanchimi

Jesús acrashgan Pushacoj hermanucunaga maycho caycaptinchipis pushamanchimi. ¿Imatarätaj rurapäcun ima wilacuycunatapis apachicäramunanpaj? Mä ricärishun imanotaj rurapäcoj unay cristianucuna. Leipäcuy Hechos 15:1, 2 y caycunapita parlapacäriy:

• ¿Ima asuntucunapitataj cristianucunaga parlapacärinanraj cargan?

• Chay asuntuta alchayta munar, ¿pïcunamantaj aywapäcurgan Pabluwan Bernabé?

Leipäcuy Hechos 15:12-18 y 23-29 y caypita parlapacäriy:

• Ima mandätutapis manaraj apachicur, ¿imacunataj pushacoj cristianucuna rurapäcurgan? (12, 15 y 28 versiculucunata ricapäcuy).

Leipäcuy Hechos 15:30, 31 y 16:4, 5 y caycunapita parlapacäriy:

• ¿Imatataj chay wichan cristianucuna rurapäcurgan, pushacoj hermanucunapa mandätuncunata chasquirir?

• ¿Jehová bendecirganchuraj cäsucärishganraycur?

Leipäcuy 2 Timoteo 3:16 y Santiago 1:5 y caypita parlapacäriy:

• ¿Imatataj canan wichanpis Jehovapa testiguncunata Pushajcuna rurapäcun ima wilacuycunatapis manaraj jorgamur?

 ICHIC YACHACUY

Jehovapa testiguncunata Pushajcunaga, Jesús acrashgan “tantiaj y yäracuypaj esclavo” caycan. Chay esclavumi Diosta cushi cushila aduranapaj imaycata goycalämanchi.

Yarpänapaj

• ¿Pitaj camacächishga “tantiaj y yäracuypaj esclavo” cananpaj?

• ¿Imanotaj cuidaycalämanchi Jehovapa testiguncunata Pushajcuna?

• ¿Jehovapa testiguncunata Pushajcunaga “tantiaj y yäracuypaj esclavo” cashganta creinquicu?