‘Congregacionchö kaqkunapa dirigeqninqa’ Señornintsik Jesusmi (Efesius 5:23). Pëmi, ‘alli juiciuyoq y confiakuypaq sirwipakoqta’ churashqa Jehoväpa sirweqninkunata diriginampaq (leyi Mateu 24:45). Tsëmi ‘alli juiciuyoq y confiakuypaq sirwipakoqqa’ Jesuspita autoridäta chaskishqa kar, imatapis decidita puëdin. Peru tsënö kaptimpis, pëkunaqa Cristu mandanqantam rurayan y Cristupa wawqinkunatam yanapayan. Këchömi yachakunki, tsë sirwipakoq pï kanqanta y imanö yanapamanqantsikta.

1 KAQ: ¿Pitan “Alli juiciuyoq y confiakuypaq sirwipakoq”?

Jehoväqa sirweqninkunata imëpis dirigishqa juk nunawan o juk grüpu nunakunawanmi (Malaquïas 2:7; Hebrëus 1:1). Jesus wanukunqanchöqa, apostolkuna y Jerusalenchö anciänukunam Jehoväpa sirweqninkunata dirigiyarqan (Hëchus 15:2). Tsënöllam kanan witsampis, Testïgukunata Pushaqkuna nir reqinqantsik juk grüpu anciänukuna, Jehoväpa sirweqninkunata dirigiyan Jehoväpita yachatsir y nunakunata yachatsiyänampaq yanaparnin. Tsë grüpu nunakunaqa kayan, ‘tiempunchö mikuynin qaranampaq patronnin [Jesucristu] churanqan alli juiciuyoq y confiakuypaq sirwipakoqmi’ (Mateu 24:45). Testïgukunata Pushaqkunaqa llapankunapis kayan ciëlupaq akrashqa kaqkunapitam. Pëkunaqa Jesuswanmi ciëlupita gobernayämunqa.

2 KAQ: ¿Imatataq Jesus mandarqan ‘alli juiciuyoq y confiakuypaq sirwipakoqta’?

‘Alli juiciuyoq y confiakuypaq sirwipakoqtam’ Jesusqa mandarqan “[Jehoväpa sirweqninkunata] tiempunchö mikuynin qaranampaq” (Mateu 24:45). Imatapis mikunqantsikmi yanapamantsik fuerti y sänu kanapaq, tsënöllam Diosnintsikpa Palabrampita yachakunqantsikpis Jehoväta sirwinapaq y Jesus mandakunqankunata ruranapaq yanapamantsik (1 Timoteu 4:6). Tsëmi reunionkunata, asamblëakunata, llapan leyinapaq kaqkunata y videukunata ruratsiyämun. Tsëkunam yanapamantsik, Bibliachö willakunqankunata entiendinapaq y Jehoväwan mas amïgu kanapaq.

 MASLLA YACHAKUSHUN

3 KAQ: Jehoväpa sirweqninkuna rurayanqanqa alli patsätsishqam këkan

Jehoväpa testïgunkuna rurayänampaq kaqkunataqa Testïgukunata Pushaqkunam patsätsiyan, y pëkunataqa Jesusmi dirigin. Tsënömi punta cristiänukunapa tiempunchöpis karqan VIDEUTA rikäyë.

Leyiyë 1 Corintius 14:33, 40 ima ninqanta y këpaq parlayë:

• Kë versïculukunachö ninqannöpis, ¿Testïgunkuna imanö kayänantataq Jehoväqa munan?

4 KAQ: ‘Alli juiciuyoq y confiakuypaq sirwipakoqmi’ Diospita yachatsikunapaq patsätsimun

Punta cristiänukunapaqqa, nunakunata Diospita yachatsiqa imëkapitapis mas puntachömi karqan. Leyiyë Hëchus 8:14, 25 ima ninqanta y këkunapaq parlayë:

• Punta cristiänukunataqa, ¿pikunatan Diospita yachatsikuyänampaq dirigiyaq?

• ¿Imatataq Pëdruwan Juan rurayarqan wakin kaq apostolkuna mandayaptin?

Testïgukunata Pushaqkunaqa, nunakunata Diospita yachatsitam mas puntamanqa churayan. VIDEUTA rikäyë.

 Jesusqa munan llapan nunakuna Diospita yachakuyänantam. Leyiyë Marcus 13:10 ima ninqanta y këkunapaq parlayë:

• ¿Imanirtan Testïgukunata Pushaqkunaqa Diospita yachatsikuyta mas puntaman churayan?

• ¿Imanirtan necesitantsik Testïgukunata Pushaqkuna Diospita yachatsikunapaq patsätsiyämunanta?

5 KAQ: Testïgukunata Pushaqkunaqa yanapamänapaqmi imëkata rurayämun

Testïgukunata Pushaqkunaqa entëru Patsachö Jehoväpa sirweqninkunata yanapayänampaqmi imëkatapis patsätsiyämun. Peru ¿imanötan imatapis decidiyan? Punta cristiänukuna rurayanqannöllam. Leyiyë Hëchus 15:1, 2 ima ninqanta y këkunapaq parlayë:

• ¿Ima asuntupaqtan punta cristiänukunaqa discutiyarqan?

• Tsë problëmata arreglayänampaq, ¿pikunamantan Bernabë, Pablu y wakin cristiänukuna ëwayarqan?

Leyiyë Hëchus 15:12-18 y 23-29 ima ninqanta y këpaq parlayë:

• Imata decidiyanqanchöpis Jehovä yanapanampaqqa, ¿imatataq rurayaq punta cristiänukunata dirigeqkuna? (Rikäyë 12, 15 y 28 versïculukunata).

Leyiyë Hëchus 15:30, 31 y 16:4, 5 ima ninqanta y këkunapaq parlayë:

• ¿Punta cristiänukunaqa cäsukuyarqanku dirigeqkuna niyanqanta?

• ¿Imanötan Jehovä bendicirqan cäsukoq kayanqanta?

Leyiyë 2 Timoteu 3:16 y Santiägu 1:5 ima ninqanta y këpaq parlayë:

• Imata decidiyanqanchöpis Jehovä yanapanampaqqa, ¿imatataq Testïgukunata Pushaqkuna rurayan?

 KËTAM YACHAKURQUNKI

‘Alli juiciuyoq y confiakuypaq sirwipakoqqa’ Testïgukunata Pushaqkunam kayan, y pëkunataqa Jesusmi dirigin. Pëkunam entëru Patsachö imëkata patsätsiyämun, Jehoväpa sirweqninkuna yachakuyänampaq y nunakunata yachatsir sïguiyänampaq.

¿Yarpankiku?

• ¿Pitan churashqa ‘alli juiciuyoq y confiakuypaq sirwipakoqta’?

• ¿Imanötan Testïgukunata Pushaqkunaqa yanapamantsik?

• ¿Imanirtan següru këkanki ‘alli juiciuyoq y confiakuypaq sirwipakoqpaq’ Bibliachö parlarqa Testïgukunata Pushaqkunapaq parlëkanqanta?