Jesús congregaciomba “umami” (Efesios 5:23). Jesús ahuamanda ‘ali llaquij iyaiyuj sirvij runara’ utilizan cai allpai tiaj paita sirtu catijcunara yachachingahua (leai Mateo 24:45). Cai ‘sirvij runara’ Jesusllara ajllaca, chiraigu cai “sirvij runa” rimana ushaira charin. Shina ajpis cai “sirvij runa” Cristora sirvij an, Cristopa huauquiunara cuirasha sirvin. ¿Pita an cai sirvij runa? ¿Imasnara cai sirvij runa ñucanchira cuiran?

1. ¿Pita an “ali llaquij iyaiyuj sirvij runa”?

Jehová paihua llactara pushangahua shu runara o runa muntunda utilizashca (Malaquías 2:7; Hebreos 1:1). Jesús huañushca huasha apostolguna Jerusalenmanda ancianogunas congregacionda pushanuca (Hechos 15:2). Imasna chi timpui rashcasna cuna punzhaunais Cuerpo Gobernante Jehovahuaj testigogunamanda anun, cai ichilla muntun ancianoguna Bibliamanda yachachishcaunara ñucanchima cunun, Bibliamanda yachachinaras ñaupajma pushanun. Jesusga Cuerpo Gobernante huauquiunara “ali llaquij iyaiyuj sirvij runa” achu churashca (Mateo 24:45a). Cuerpo Gobernante huauquiuna espíritu santohua ajllashcauna anun, paiguna causai allpai tucurishca huasha Cristohua ahua pachai pariju mandangahua chapanun.

2. Ali llaquij iyaiyuj sirvij runa ¿ima tunu micunashinara cun?

Jesús nica ali llaquij sirvij runa paita catijcunara “ali huraspi carangaj” ajllashca an nisha (Mateo 24:45b). Micuna imasna ñucanchira yanapan shinzhiyangaj mana unguringahuas shinallara Diospa Shimi yachachishcauna Diosta chuyaj shunguhua adurangaj ursara cun, Jesús mingashcara pactachingahuas yanapan (1 Timoteo 4:6). Tandarinaibi, asambleagunaibi, quillcaunaibi, videogunaibis Bibliamanda yachachishcaunara charinchi. Cai tucui ñucanchira yanapanmi Jehová munashcara intindingahua Dioshua mas amigo tucungahuas.

 MAS YACHAI

3. Diosta sirvijcuna pai munaira pactachingaj alichirishca ana anun

Cuerpo Gobernante nishcara Jesús mandaunmi tucui Jehovahuaj testigogunara pushachu. Apostolguna timpui tiaj congregacionda pushangahua shinallara rurarca. VIDEORA ricuichi.

Leaichi 1 Corintios 14:33, 40, TNM, huasha catij tapuimanda rimaichi:

• Cai texto rimashca shina ¿imasnara Jehová munan paihua Testigoguna anuchu?

4. “Ali llaquij sirvij” huauquiuna Bibliamanda yachachinara alichisha pushanun

Apostolguna timpui tiaj Jesusta catijcunaj tucui ruranamanda Diospa Shimi yachachinara mas valishca aca. Leaichi Hechos 8:14, 25, huasha catij tapuigunamanda rimaichi:

• ¿Pigunara punda sigloi Diospa Shimi yachachinara ñaupajma pusharianuca?

• ¿Imara ruranuca Pedro, Juan shuj apostolgunas yachachishcaunara chasquisha?

Cuerpo Gobernante huauquiunaj Diospa Shimi yachachina mas valishca an. VIDEORA ricuichi.

 Jesús nicami Bibliamanda yachachina yapa valij an nisha. Leaichi Marcos 13:10, huasha cati tapuigunamanda rimaichi:

• ¿Imarasha Cuerpo Gobernante huauquiuna Diospa Shimi yachachinara mas valichinun?

• ¿Imarasha ministinchi “ali llaquij iyaiyuj sirvij runa” intiru mundui Diospa Shimi yachachinara alichichu?

5. Ali llaquij sirvij runa ñucanchira pushan

Intiru mundui tiaj Jesusta catijcunara Cuerpo Gobernante pushan. Imaras chara mana rurashcallaira ¿imara ñaupa punda ruran? Apostolguna timpui Jesusta catijcunara Cuerpo Gobernante imasna pushashcara ricui. Leaichi Hechos 15:1, 2, huasha catij tapuigunamanda rimaichi:

• Apostolguna timpui Jesusta catijcunapura ¿imamanda piñarisha rimanunuca?

• Pablo, Bernabendi, Jesusta shuj catijcunas ¿pigunajma rinuca cai rimanunara alichingahua?

Leaichi Hechos 15:12-18, 23-29, huasha catij tapuimanda rimaichi:

• Ima ruranara manara ajllashcallaira ¿imara apostolguna timpui tiaj cuerpo gobernante rurarca Jehová Dios yanapachu? (Versículo 12, 15, 28 ricuichi).

Leaichi Hechos 15:30, 31; 16:4, 5, huasha catij tapuigunamanda rimaichi:

• ¿Imasnara apostolguna timpui tiaj Jesusta catijcuna chasquinuca cuerpo gobernante yachachishcara?

• Casushcamanda ¿imasnara Jehová Dios paigunara bendiciaca?

Leaichi 2 Timoteo 3:16; Santiago 1:5, huasha catij tapuimanda rimaichi:

• Cuna timpui Cuerpo Gobernante ali rurangaj ajllana huraspi ¿imara ruran Dios yanapaira chasquingahua?

 IMARA YACHASHCANGUI

Cuerpo Gobernante Jesús ajllashca “ali llaquij iyaiyuj sirvij runa” an. Cai sirvij intiru mundui tiaj huauqui paniunama rimashcaunara Bibliamanda yachachishcaunaras cun.

Iyaringaj

• ¿Pita ajllaca “ali llaquij iyaiyuj sirvij” runara?

• ¿Imasnara Cuerpo Gobernante ñucanchira cuiran?

• ¿Can quiringuichu Cuerpo Gobernante nishca “ali llaquij iyaiyuj sirvij runa” ashcara?