О Исус тано поглавари ко собрание (Ефешаните 5:23). Авдиве, ов таро небо водинела пле следбеникон сој теле ки Пхув преку „о верно хем разборито робо“. (Читин Матеј 24:45.) О Исус поставинѓа акале робо хем денѓа ле авторитети те анел несаве одлуке. Сепак, акава робо мора те овел послушно е Исусеске хем те служинел лескере помазиме пхраленге. Ама, кој тано акава робо хем сар ов грижинела пе аменге?

1. Кој тано „о верно хем разборито робо“?

О Јехова секогаш користинела сине јекхе мануше или јекх тикни група таро мурша те шај те водинел пле народо (Малахија 2:7; Евреите 1:1). Пало е Исусескоро мерибе, о апостолија хем о старешине ко Ерусалим водинена сине е Девлескере народо (Дела 15:2). Исто сар тегани, авдиве да јекх тикни група старешине — о Водечко тело е Јеховаскере сведоконгоро — дела духовно храна хем водинела о проповедибе. Акаја група тани „о верно хем разборито робо касте со [о Исус] чхивѓа“ те грижинел пе башо акала буќа (Матеј 24:45а). Са о членија таро Водечко тело тане помазиме христијања колен со иси лен надеж те владинен заедно е Исусеа ко лескоро небесно Царство, одкеда ленгоро живото ки Пхув ка завршинел.

2. Сој тани и духовно храна со дела амен „о верно хем разборито робо“?

О Исус вакерѓа кај о верно робо ка „дел [е христијаненге] храна ко право време“ (Матеј 24:45б). Исто сар и дословно храна со поможинела аменге те ова физичко зорале хем састе, аѓаар и духовно храна — о поуке таро е Девлескоро Лафи — дела амен сила те ачхова верна е Јеховаске хем те кера и задача со денѓа амен о Исус (1. Тимотеј 4:6). Амен добинаја адаја духовно храна преку о состанокија, о конгресија, амаре публикацие хем о видеоклипија. Са акала буќа поможинена аменге те хаљова која тани е Девлескири волја хем поможинена аменге те кера позорало амаро амалипе леа.

 ДОЗНАЈН ПОВИШЕ

3. Е Јеховаскоро народо мора те овел организиримо

Преку е Исусескоро водство, о Водечко тело организиринела о активностија е Јеховаскере сведоконгере. Ко слично начин о Исус водинела сине е христијанен таро прво веко. Дикх о ВИДЕОКЛИПИ.

Читин 1. Коринќаните 14:33, 40, а пало адава керен лафи башо акава пучибе:

• Сар акала стихија сикавена кај о Јехова мангела лескоро народо те овел организиримо?

4. О верно робо организиринела о проповедибе

И најважно задача е прва христијаненге сине о проповедибе. Читин Дела 8:14, 25, а пало адава керен лафи башо акала пучиба:

• Кој организиринела сине о проповедибе ко прво веко?

• Сар о Петар хем о Јован реагиринѓе ко упатствија со добинѓе таро апостолија?

О проповедибе тани и најважно задача со организиринела ла о Водечко тело. Дикх о ВИДЕОКЛИПИ.

 О Исус истакнинѓа кобор тано важно о проповедибе. Читин Марко 13:10, а пало адава керен лафи башо акала пучиба:

• Соске о Водечко тело дикхела ко проповедибе сар најважно задача?

• Соске аменге потребно „о верно хем разборито робо“ те шај те организиринел пе о проповедибе ко цело свето?

5. О верно робо дела водство

О Водечко тело дела водство е христијаненге ко цело свето. Ама, сар џанена саве упатствија ваљани те ден? Те дикха о пример таро водечко тело ко прво веко. Читин Дела 15:1, 2, а пало адава керен лафи башо акала пучиба:

• Саво несогласување појавинѓа пе машкар о пхраља таро прво веко?

• Кастар родинѓе помош о Павле, о Варнава хем о јавера те шај те решинел пе адава несогласување?

Читин Дела 15:12-18, 23-29, а пало адава керен лафи башо акава пучибе:

• Со керѓа о водечко тело таро прво веко те шај те хаљовел сар о Јехова дикхела ко адава проблеми? (Дикх о стихија 12, 15 хем 28.)

Читин Дела 15:30, 31 хем 16:4, 5, а пало адава керен лафи башо акала пучиба:

• Сар реагиринѓе о христијања таро прво веко ко упатствија со добинѓе таро водечко тело?

• Саве берекетија денѓа лен о Јехова адалеске со сине послушна?

Читин 2. Тимотеј 3:16 хем Јаков 1:5, а пало адава керен лафи башо акава пучибе:

• Со поможинела е Водечко телоске авдиве те анел мудра одлуке?

 СО СИКЛИЛЕМ

О Водечко тело тано „о верно хем разборито робо“ касте со поставинѓа о Христос. Адава робо дела водство хем духовно храна е христијаненге ко цело свето.

Сар ка одговорине?

• Кој поставинѓа е „верно хем разборито робо“?

• Сар о Водечко тело грижинела пе аменге?

• Дали верујнеа кај о Водечко тело тано „о верно хем разборито робо“?