Хулай пэ христианско собрания — када о Иисус Христос (Эфесянам 5:23). Акана о Иисусо — Царё по нэбо и руководий пэ ԥув через «о годявэрно и кандино рабо» пэстирэ учениконэнца. (Адиносар Матфея 24:45.) Екжэно о Иисусо стодя кадэлэ рабос и дя лэсти право тэ прилэл дэсавэ ришэнии. Но во всаек кандэл лэ Иисусос и служый лэ Христостирэ ԥралэнди. Ко кадэва рабо и сар во заботийпэ пала амэндэ?

1. Ко када «о годявэрно и кандино рабо»?

О Иегова всегда сыкавэлас, со тэ терэл лэско народо, или через ек мануш, или через найбари ӷрупа (Малахия 2:7; Евреям 1:1). Кала муля о Иисусо, пала христиански собрании линэ тэ диқэн и апостолоря и старейшыноря андо Иерусалимо (Деяния 15:2). Кадяжэ и адес исин ек найбари ӷрупа старейшын — Руководящё совето лэ Иеговастирэ свидетелёнэнго. Вонэ руководин кодэлэса, кай тэ росԥэнэнпэ пала Дэл и, ԥэнаса, праварэн амэн, кала росԥэнэн, сости сытярэл о Дэл. Кадэя ӷрупа — «о годявэрно и кандино рабо», савэс стодя о Иисусо (Матфея 24:45 пэрво часть). Всаворэ, ко исин андэр лэстэ — када помазани духоса христианоря. Сар лэндири жызня пэ ԥув кончияпэ, вонэ авэна лэ Христоса андо лэско небесно Царство.

2. Саво хамос дэл о «кандино рабо»?

О Иисусо ԥэндя, кай о кандино рабо лэла тэ дэл лэ христианонэнди «о хамос, кала када трэбуй» (Матфея 24:45 дуйто часть). Со када за хамос? Када обучения, сави жал па Библия. Кадя жэ сар о хамос дэл зор лэ манушэсти тэ ашэл састо и зорало, и библейско обучения дэл зор тэ на парашас тэ кандас лэ Иеговас и тэ терас и дила, сави дя о Иисусо (1 Тимофею 4:6). Кадэя обучения дэн пэ собрания, пэ канӷрэсоря, через видеоря, и через литература, сави стерди па Библия. Вся када поможый май драго тэ полас лэ Дэвлэсти воля и тэ ашаспэ лэстирэ друӷонэнца.

 УӶАНАМ МАЙ БУТ

3. Лэ Иеговаско народо трэбуй тэ авэл драго арӷанизовано

О Иисусо диқэл, сар о Руководящё совето руководий кодэлэса, со терэн лэ Иеговастирэ свидетеля. Кадяжэ сас и кай и христианоря андо пэрво вико. Диқам о ВИДЕО.

Адиносарам 1 Коринфянам 14:33, 40 и подам дума пала вопросо, саво май тэлэ.

• Сар кадэла стихоря сыкавэн, кай о Иегова камэл, кай лэско народо тэ авэл арӷанизовано?

4. Кандино рабо арӷанизует, кай амэ тэ росԥэнас пала Дэл

Само ӷлавно сас андэ жызня кай и христианоря — када тэ росԥэнэн, со сас пистромэ андэ лэ Дэвлэско Алав. Адиносарам Деяния 8:14, 25 и подам дума пала вопросоря, савэ май тэлэ.

• Ко андо пэрво вико ԥэнэнас, сар и кай трэбуй тэ росԥэнэн лащи новость?

• Со стердэ о Пётро и о Иоанно важ кода, со ԥэндэ авэр апостолоря?

Тэ росԥэнас анда Библия — када со май важно дила, сави терэл о Руководящё совето. Диқам о ВИДЕО.

 Анда лэ Иисусостирэ алава дицол, кай трэбуй тэ росԥэнас и лащи новость. Адиносарам Марка 13:10 и подам дума пала вопросоря, савэ май тэлэ.

• Васо о Руководящё совето фартэ бут шол сама пэ проповедь?

• Васо, кай и служэния тэ жал па вся и ԥув, трэбуй тэ авэл годявэрно и кандино рабо?

5. Кандино рабо ԥэнэн, со тэ терас

О Руководящё совето арӷанизует, кай и лащи новость тэ росԥэнэн па вся и ԥув. Сар кадэла ԥрала прилэн и ришэнии? Проадиносарам, сар андо пэрво вико о руководящё совето прилэлас и ришэнии. Адиносарам Деяния 15:1, 2 и подам дума пала вопросоря, савэ май тэлэ.

• Пала со спорисайлэ дэсавэ пэрви христианоря?

• Кастар о Павло, о Варнава и авэр ԥрала манглэ помощь, кай тэ розлэн кадэва вопросо?

Адиносарам Деяния 15:12—18, 23—29 и подам дума пала вопросо, саво май тэлэ.

• Со стердя андо пэрво вико о руководящё совето, кай тэ полэн, со гиндой пала кадэва вопросо о Дэл? (Диқэн о стихо 12, 15 и 28.)

Адиносарам Деяния 15:30, 31 и 16:4, 5 и подам дума пала вопросоря, савэ май тэлэ.

• Со и пэрви христианоря гиндонас пала кода, со лэнди ԥэнэнас о руководящё совето?

• Саво лашимос о Иегова дя кадэлэ христианонэнди, кай вонэ канглэ?

Адиносарам 2 Тимофею 3:16 и Иакова 1:5 и подам дума пала вопросо, саво май тэлэ.

• Сар андэ амари время о Руководящё совето прилэл ришэнии?

 ПАЛА СО АМЭ ДЯМ ДУМА?

Анда кадэя ӷлава амэ уӷанглям, кай о Руководящё совето — када «о годявэрно и кандино рабо», савэс стодя о Иисусо. Кадэва рабо дэл обучения и ԥэнэн, со трэбуй тэ терэн и христианоря па вся и ԥув.

Сар ту гиндос?

• Ко стодя лэ рабос, саво годявэрно и кандино?

• Сар о Руководящё совето заботийпэ пала амэндэ?

• Ту патяс, кай о Руководящё совето — када годявэрно и кандино рабо?