Yesuusi Kiristaanu songora umoho. (Efesooni Sokka 5:23) Xaa yannara, Yesuusi iima heeˈre “ammanaminohunna wodanaamu borojjichi” widoonni rosaanosi massaganni no. (Maatewoosi 24:45 nabbawi. a) Yesuusi umisi konne ‘borojjicho’ shoome kae, mitu coyira silxaane uyinosi. Ikkirono, kuni borojjichi Kiristoosira hajajamanno; hattono Kiristoosi roduuwira soqqamanno. Kuni borojjichi ayeti? Ninke towaatannonkehu hiittoonniiti?

1. “Ammanaminohunna wodanaamu borojjichi” ayeti?

Yihowa hundinni kayise, mannasi massagate mitto mancho woy mitte gaamo horoonsiˈranni keeshshino. (Milkiyaasi 2:7; Ibiraawoota 1:1) Yesuusi reyihu gedensaanni, soqqamaasinesinna Yerusaalamete noo cimeeyye albisa ikkite soqqama hanaffino. (Soqqamaasinete Looso 15:2) Hakko garinni, xaa yannarano shiima cimeeyyete gaamo albisa ikkite soqqantanni no; tini gaamo Yihowa Farciˈraasineho Aliidi Bisooti. Aliidi Bisi ayyaanaamittete sagale shiqishanno, hattono sabbakate loosira biddishsha aanno. Tini gaamo, Yesuusi ‘shoominoho ammanaminohonna wodanaamo borojjichooti.’ (Maatewoosi 24:45) Aliidi Bisi miili baalunku ayyaanunni buuramino Kiristaanaati; insa uulla heeshshonsa gooffeenna iima Kiristoosi ledo Mangistesira mookkanno yanna quqquxante agadhitanno.

2. Ammanamino borojjichi ayyaanaamittete sagale shiqishannonkehu hiittoonniiti?

Yesuusi ammanamino borojjichi Kiristaanaho “sagale hasiissanno yannara [aannonsata]” coyiˈrino. (Maatewoosi 24:45) Inteemmo sagale mannimmanke jawaatanna fayyo ikkitanno gede kaaˈlitannonke. Hatteente gede, ayyaanaamittete sagale yaano Maganu Qaali giddonni ronseemmo rosi, Yihowara ammanamme heeˈneemmo gedenna Yesuusi uyinonke looso loonseemmo gede jawaante aannonke. (1 Ximootewoosi 4:6) Tenne ayyaanaamittete sagale songote gambooshshi, woradu gambooshshi, qoqqowu gambooshshinna Qullaawu Maxaafi aana xintantino borronkenna viidiyubba widoonni afiˈneemmo. Tini sagale, Maganu fajjo maatiro huwanteemmo gedenna isi ledo noonke jaalooma kaajjishiˈneemmo gede kaaˈlitannonke.

 LEDDE XIINXALLI

3. Yihowa manni qinaawinoha ikka hasiissannonsa

Aliidi Bisi, Yesuusi aanno biddishshi garinni Yihowa Farciˈraasine looso qineessanno. Yesuusi hundi Kiristaana massaginohuno hakko garinniiti. VIIDIYO laˈe.

Umi Qorontoosi 14:33, 40 nabbabbe; hakkiinni tenne xaˈmo hasaabbe:

• Kuni qummeeshshi, Yihowa Farciˈraasinesi qinaabbinore ikkitara hasiˈrannota leellishannohu hiittoonniiti?

4. Ammanamino borojjichi sabbakate loosonke qineessanno

Hundi Kiristaani loosinohu qaru loosi sabbakate loosooti. Soqqamaasinete Looso 8:14, 25 nabbabbe; hakkiinni tenne xaˈmuwa hasaabbe:

• Hundi Kiristaani mereero sabbakate loosira biddishsha uyitannori ayeooti?

• Pheexiroosinna Yohaannisi wole soqqamaasine uyitino biddishsha macciishshite ma assitino?

Aliidi Bisi qineessannohu qaru loosi sabbakate loosooti. VIIDIYO laˈe.

 Yesuusi sabbakate loosi lowo geeshsha hasiisanno looso ikkinota xawise coyiˈrino. Maarqoosi 13:10 nabbabbe; hakkiinni tenne xaˈmuwa hasaabbe:

• Aliidi Bisi sabbakate looso lowo geeshsha hasiisanno loosooti yee hedannohu mayiraati?

• Konne alame woˈmate loonsanni looso qineessate, “ammanaminohunna wodanaamu borojjichi” hasiisannonkehu mayiraati?

5. Ammanamino borojjichi biddishsha aannonke

Aliidi Bisi alame woˈmate noo Kiristaanira biddishsha aanno. Aliidi Bisi hiittoo biddishsha aa hasiissannoro afannohu ma garinniiti? Hanni hundi Kiristaanihu aliidi bisi tenne assinohu hiittoonniitiro laˈno. Soqqamaasinete Looso 15:1, 2 nabbabbe; hakkiinni tenne xaˈmuwa hasaabbe:

• Hunda mitu Kiristaani mereero mayi heewo kaˈino?

• Phaawuloosi, Barnabaasinna wole ammanaasine tenne hajo daafira biddishsha afidhinohu ayeoowiinniiti?

Soqqamaasinete Looso 15:12-18, 23-29 nabbabbe; hakkiinni tenne xaˈmo hasaabbe:

• Umi xibbi dirihu aliidi bisi coye murara albaanni Maganu biddishsha afiˈrate maa assino?—Kiiro 12, 15 nna 28 lai.

Soqqamaasinete Looso 15:30, 31; 16:4, 5 nabbabbe; hakkiinni kuri xaˈmuwa hasaabbe:

• Hundi Kiristaani aliidi bisi uyino biddishsha macciishshe ma assino?

• Insa hajajantino daafira Yihowa maassiˈrinonsahu hiittoonniiti?

Layinki Ximootewoosi 3:16 nna Yaiqoobi 1:5 nabbabbe; hakkiinni tenne xaˈmo hasaabbe:

• Xaa yannara Aliidi Bisi mitto coye muranno woyite biddishsha afiˈrannohu mamiinniiti?

 XAPHISHSHA

Aliidi Bisi, Kiristoosi shoominoho ‘ammanaminohonna wodanaamo borojjichooti.’ Kuni borojjichi alame woˈmate noo Kiristaanira biddishshanna ayyaanaamittete sagale aanno.

Kageeshsha Rosoottore

• ‘Ammanaminohanna wodanaamo borojjicho’ shoominohu ayeti?

• Aliidi Bisi towaatannonkehu hiittoonniiti?

• Aliidi Bisi ‘ammanaminohanna wodanaamo borojjicho’ ikkinota ammanatto?