Jesosy ro Lohani-fiangona kristiana. (Efesianina 5:23) Baka an-danitsy any avao ie mitariky ty mpanori-dia azy an-tany etoy. Mampiasa ty “mpanompo azo atokisa noho mahihitsy” Jesosy mba hanaova ani-zay. (Vakio Matio 24:45.) Mana fahefà handramby fanapahan-kevitsy amy raha sisany “mpanompo” io, satria Jesosy mihintsy ro nifily azy. Fe tsy maintsy maneky ani-Kristy noho manompo ani-rahalahiny reo mpanompo io. Ka ia zany mpanompo io? Le ino ty raha ataoni-mpanompo io mba hikarakarà antsika?

1. Ia “mpanompo azo atokisa noho mahihitsy” zao?

Nampiasa lahilahy raiky na maromaro Jehovah bakany zay, mba hanomeza tari-dala ty vahoakiny. (Malakia 2:7; Hebreo 1:1) Tafarani-nahafatesani-Jesosy, le ty apostoly noho ty anti-panahy ta Jerosalema ao ro nitariky. (Asan’ny apostoly 15:2) Mitovy amy zay koa henanizao, misy anti-panahy vitsivitsy kaihy hoe Filan-kevi-pitantanani-Vavolombeloni-Jehovah, manome sakafo ara-panahy noho mitariky ty asa fitoria. Olo vitsivitsy reo mitambatsy ro kaihy hoe “mpanompo azo atokisa noho mahihitsy [nitendreni-Jesosy].” (Matio 24:45a) Kristiana voahosotsini-fanahy iaby rozy amy Filan-kevi-pitantana ao, le mitamà hiaraky manjaka amy Kristy an-danitsy any lafa tampitsy ty fiainan-drozy an-tany etoa.

2. Ino ty sakafo ara-panahy ameani-mpanompo azo atokisa io?

Nivola Jesosy fa ‘hanome sakafo amy fotoa mety’ ho ani-Kristiana namany mpanompo azo atokisa io. (Matio 24:45b) Manome hery noho manampy antsika ho salama ty sakafo hanintsika. Ho zay koa ty sakafo ara-panahy, zany hoe ty toromariky baka amy Safà-Ndranahary ao satria manome hery antsika, ka mahavy antsika hahavita tsy hivaliky amy Jehovah noho hanao ty asa nampanaovini-Jesosy. (1 Timoty 4:6) Mahazo sakafo tsika amy alalani-fivoria, fivoriambe, boky noho gazety, noho video sankarazany. Manampy antsika raha rey mba hahay soa ty sitrapo-Ndranahary noho hinama aminy avao.

 DINIHO LALIKY

3. Tokony hilamy soa avao ty vahoakini-Jehovah

Manoriky ty tari-dalani-Jesosy ty Filan-kevi-pitantana mba handamina ty asa ataoni-Vavolombeloni-Jehovah. Mitovy amy zay avao koa ty nandamina ty Kristiana voalohany. Alefaso VIDEO toy.

Vakio 1 Korintianina 14:33, 40, bakeo iaraho midiniky fanontanea toy:

• Laha hentea andinin-teny reo, ino ty mampiseho hoe teani-Jehovah hilamy soa ty vahoakiny?

4. Mandamy ty asa fitoria ty mpanompo azo atokisa

Ty fitoria ro asa bevata marè tamy Kristiana voalohany. Vakio Asan’ny Apostoly 8:14, 25, bakeo iaraho midiniky fanontanea retoa:

• Ia ty nitariky ty asa fitoria tamy androni-Kristiana voalohany?

• Ino ty nataoni-Petera noho Jaona lafa nanome tari-dala an-drozy ty apostoly naman-drozy?

Ty fitoria ro asa bevata marè alamini-Filan-kevi-pitantana. Alefaso VIDEO toy.

 Nasehoni-Jesosy hoe tena vatan-draha ty fitoria. Vakio Marka 13:10, bakeo iaraho midiniky fanontanea retoa:

• Manino ro tena vatan-draha amy ty Filan-kevi-pitantana ty asa fitoria?

• Manino tsika ro mila ty “mpanompo azo atokisa noho mahihitsy” mba handamy ty asa fitoria amy tany toy iaby?

5. Manome tari-dala ty mpanompo azo atokisa

Manome tari-dala ho ani-Kristiana amy tany toy iaby ty Filan-kevi-pitantana. Ino ty ataony lafa manapa-kevitsy hanome tari-dala ie? Diniho ty raha nataoni-filan-kevi-pitantana tamy androni-Kristiana voalohany rey. Vakio Asan’ny Apostoly 15:1, 2, bakeo iaraho midiniky fanontanea retoa:

• Ino ty raha tsy nampitovy hevitsy ty sisany amy Kristiana voalohany rey?

• Nila fanampea tamin’ia Paoly, Barnabasy, noho ty rahalahy hafa mba handamina ani-tsy fitovia hevitsy iny?

Vakio Asan’ny Apostoly 15:12-18, 23-29, bakeo iaraho midiniky fanontanea toy:

• Alohani-hanapahany hevitsy, ino ty nataoni-filan-kevi-pitantana mba hahazoa ty tari-dala-Ndranahary?​—Henteo ty andininy 12, 15, noho 28.

Vakio Asan’ny Apostoly 15:30, 31 noho 16:4, 5, bakeo iaraho midiniky fanontanea retoa:

• Ino ty nataoni-Kristiana voalohany rey lafa nahazo tari-dala baka amy filan-kevi-pitantana rozy?

• Nameani-Jehovah fitahia rozy satria nanoriky safà. Ino fitahia zay?

Vakio 2 Timoty 3:16 noho Jakoba 1:5, bakeo iaraho midiniky fanontanea toy:

• Mila tari-dala baka amin’ia ty Filan-kevi-pitantana henanizao lafa hanapa-kevitsy?

 FAMINTINA

Ty Filan-kevi-pitantana ro “mpanompo azo atokisa noho mahihitsy” nitendreni-Kristy. Manome tari-dala noho sakafo ara-panahy ty Kristiana amy tany toy iaby mpanompo io.

Famerena

• Ia ro nanendry ty “mpanompo azo atokisa noho mahihitsy”?

• Ino ty ataoni-Filan-kevi-pitantana mba hikarakarà antsika?

• Mino va iha fa ty Filan-kevi-pitantana ro “mpanompo azo atokisa noho mahihitsy”?