LESONA 54
Le Matafaioi a “le Pologa Faamaoni ma le Faautauta”
O Iesu o le Ulu o le faapotopotoga Kerisiano. (Efeso 5:23) I aso nei, o loo ia taʻitaʻia mai i le lagi ona soo i le lalolagi, e ala i “le pologa faamaoni ma le faautauta.” (Faitau le Mataio 24:45.) Na tofia e Iesu lava ia lenei “pologa” ma tuu atu i ai le pule e faia ai filifiliga. Peitaʻi, e avea pea o ia ma pologa a Keriso, ma auauna atu i uso o Keriso. O ai lenā pologa? E faapefea ona tausia i tatou e le pologa?
1. O ai “le pologa faamaoni ma le faautauta”?
E masani ona faaaogā e Ieova se tane po o se vaega o tane e taʻitaʻia ona tagata. (Malaki 2:7; Eperu 1:1) Ina ua mavae le maliu o Iesu, na avea aposetolo ma toeaina i Ierusalema ma taʻimua. (Galuega 15:2) I aso foʻi nei, o loo taʻimua se vaega toʻaitiiti o toeaina. E taʻua i latou o le Vaega Pule o Molimau a Ieova, ma e latou te saunia meaʻai faaleagaga ma taʻitaʻia le galuega talaʻi. O i latou o “le pologa faamaoni ma le faautauta, o lē ua tofia e [Iesu].” (Mataio 24:45a) O sui uma o le Vaega Pule o ni Kerisiano faauuina, ma e latou te tulimataʻia le taimi o le a pule faatasi mai ai ma Keriso i lona Malo i le lagi, pe a faaiʻuina o latou soifuaga i le lalolagi.
2. O ā meaʻai faaleagaga e saunia mai e le pologa faamaoni?
Na fetalai Iesu, o le pologa faamaoni e avatuina i o latou uso Kerisiano “meaʻai i le taimi tatau.” (Mataio 24:45e) E pei lava ona tatou maua le malosi ma le soifua mālōlōina i meaʻai e tatou te aai ai, e faapena foʻi meaʻai faaleagaga po o taʻiala mai i le Afioga a le Atua. E tatou te maua ai le malosi e manaʻomia ina ia faamaoni ai pea iā Ieova, ma faataunuu le galuega na tofia i ai i tatou e Iesu. (1 Timoteo 4:6) E tatou te maua na meaʻai faaleagaga mai i sauniga, fonotaga, tauaofiaga, lomiga faale-Tusi Paia ma vitiō, ia e fesoasoani iā i tatou e malamalama ai i le finagalo o le Atua ma faamalosia ai la tatou faauōga ma ia.
SAʻILIʻILI ATILI
Mātau pe aiseā e tatou te manaʻomia ai “le pologa faamaoni ma le faautauta,” po o le Vaega Pule.
O loo saunia e le Vaega Pule meaʻai faaleagaga, taʻiala, ma fesoasoani aogā mo Molimau a Ieova i le lalolagi aoao
3. E tatau ona maopoopo tagata o Ieova
O loo faamaopoopo e le Vaega Pule le galuega a Molimau a Ieova, ala i le taʻitaʻiga a Iesu. O le auala foʻi lenā na taʻitaʻia ai e Iesu uluaʻi Kerisiano. Faaali le VITIŌ.
Faitau le 1 Korinito 14:33, 40, ona talanoa lea i le fesili lenei:
-
E faapefea ona faailoa mai i lenei mau e finagalo Ieova ia maopoopo ana Molimau?
4. O loo faamaopoopo e le pologa faamaoni la tatou galuega talaʻi
O le galuega talaʻi o le galuega sili lea ona tāua na fai e uluaʻi Kerisiano. Faitau le Galuega 8:14, 25, ona talanoa lea i fesili nei:
-
O ai na tuuina atu taʻiala mo le galuega talaʻi a uluaʻi Kerisiano?
-
Na faapefea ona tali atu Peteru ma Ioane i taʻiala na maua mai i isi aposetolo?
O le galuega talaʻi o le galuega sili lea ona tāua o loo faamaopoopo e le Vaega Pule. Faaali le VITIŌ.
Na faamamafa mai e Iesu le tāua o le galuega talaʻi. Faitau le Mareko 13:10, ona talanoa lea i fesili nei:
-
Aiseā e matuā tāua ai le galuega talaʻi i le Vaega Pule?
-
Aiseā e tatou te manaʻomia ai “le pologa faamaoni ma le faautauta” e faamaopoopoina lenei galuega i le lalolagi aoao?
5. E saunia e le pologa faamaoni taʻiala
E saunia e le Vaega Pule taʻiala mo Kerisiano i le lalolagi aoao. E faapefea ona latou filifilia taʻiala e tuuina atu? Iloilo pe na faapefea ona faia faapea e le Vaega Pule i uluaʻi Kerisiano. Faitau le Galuega 15:1, 2, ona talanoa lea i fesili nei:
-
O le ā le mataupu na fefinauaʻi ai nisi o uluaʻi Kerisiano?
-
O ai na saʻili atu i ai Paulo, Panapa ma isi mo se fesoasoani?
Faitau le Galuega 15:12-18, 23-29, ona talanoa lea i le fesili lenei:
-
A o leʻi faia se faaiʻuga, o le ā na faia e le vaega pule i uluaʻi Kerisiano ina ia maua ai le taʻitaʻiga a le Atua i le mataupu?—Tagaʻi i le fuaiupu 12, 15, ma le 28.
Faitau le Galuega 15:30, 31 ma le 16:4, 5, ona talanoa lea i fesili nei:
-
Na faapefea ona tali atu uluaʻi Kerisiano i taʻiala mai i le vaega pule?
-
Na faapefea ona faamanuia Ieova i lo latou usiusitaʻi?
Faitau le 2 Timoteo 3:16 ma le Iakopo 1:5, ona talanoa lea i le fesili lenei:
-
O fea e saʻili i ai le Vaega Pule mo le taʻitaʻiga pe a faia a latou filifiliga i aso nei?
UA FAAPEA MAI NISI: “Pe a e faalogo i le Vaega Pule, o lenā ua e mulimuli i le taʻitaʻiga a tagata.”
-
E faapefea ona e mautinoa o Iesu lea e taʻitaʻia le Vaega Pule?
AOTELEGA
O le Vaega Pule, e faasino atu i “le pologa faamaoni ma le faautauta” lea na tofia e Keriso, e saunia taʻiala ma meaʻai faaleagaga mo Kerisiano i le lalolagi aoao.
Fesili Autalu
-
O ai na tofia “le pologa faamaoni ma le faautauta”?
-
E faapefea ona tausia i tatou e le Vaega Pule?
-
Pe e te talitonu o le Vaega Pule o “le pologa faamaoni ma le faautauta” lea?
MANATU FAAOPOOPO
Mātau le auala o loo faamaopoopo ai le Vaega Pule ina ia faia la latou galuega.
“O Ai le Vaega Pule a Molimau a Ieova?”(Mataupu i le jw.org)
Iloilo pe faapefea ona faamautinoa e le Vaega Pule ua tatou maua meaʻai faaleagaga e saʻo aʻiaʻi.
O ā faalogona o le Vaega Pule i le galuega ua tofia i ai i latou e Iesu?
E faapefea ona faamaonia mai i a tatou sauniga ma tauaofiaga, o loo faatonutonuina e Ieova le Vaega Pule?
E te Ono Fiafia Foʻi
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
