Yesus na a edeman fu a Kresten gemeente (Efeisesma 5:23). Now a de na ini hemel, ma a poti „a koni srafu di de fu frutrow” fu tiri den bakaman fu en di de na grontapu. (Leisi Mateyus 24:45.) A „srafu” abi a reti fu teki son bosroiti, ma toku a musu gi yesi na Krestes èn a musu gi den salfuwan san den abi fanowdu. Suma na a srafu disi? Fa a srafu e sorgu gi wi?

1. Suma na „a koni srafu di de fu frutrow”?

Ala ten Yehovah gebroiki wan man noso wan pikin grupu man fu tiri a pipel fu en (Maleaki 2:7; Hebrewsma 1:1). Baka di Yesus dede, den apostel nanga den owruman na ini Yerusalem ben e tiri a wroko (Tori fu den apostel 15:2). Na a srefi fasi wan pikin grupu owruman e tiri a wroko na ini a ten disi. Wi e kari den a Tiri Skin fu Yehovah Kotoigi. Den brada disi e gi wi leri èn den e orga a preikiwroko. Den na ’a koni srafu di de fu frutrow di Yesus poti’ (Mateyus 24:45a). Ala den brada fu a Tiri Skin na salfu Kresten. Baka te den dede, dan den e go na hemel fu tiri makandra nanga Yesus na ini en Kownukondre.

2. Sortu leri a koni srafu e gi wi?

Yesus ben taki dati a koni srafu ben o „gi den [bakaman fu en] nyanyan na a reti ten” (Mateyus 24:45b). A nyanyan disi na a leri di wi e kisi fu Gado Wortu. Neleki fa nyanyan e gi wi krakti èn a e meki taki wi de gosontu, na so a leri disi e gi wi a krakti fu tan gi yesi na Yehovah èn fu du a wroko di Yesus gi wi fu du (1 Timoteyus 4:6). Wi e kisi a leri disi na den konmakandra, den kring konmakandra nanga den kongres. A koni srafu e meki buku nanga felem tu di e yepi wi fu kon sabi san na a wani fu Gado èn fu tron moro bun mati fu en.

 SORTU TRA SANI YU KAN LERI?

3. A pipel fu Yehovah musu orga

Yesus poti a Tiri Skin fu orga a wroko fu Yehovah Kotoigi. Na a srefi fasi Yesus ben e tiri den fosi Kresten. Prei a FELEM.

Leisi 1 Korentesma 14:33, 40 èn taki fu na aksi disi:

• Fa den vers disi e sori taki Yehovah wani taki den Kotoigi fu en orga?

4. A koni srafu e orga a preikiwroko fu wi

A preikiwroko ben de a moro prenspari wroko di den fosi Kresten ben du. Leisi Tori fu den apostel 8:14, 25 èn taki fu den aksi disi:

• Suma ben e orga a preikiwroko na a ten fu den fosi Kresten?

• San Petrus nanga Yohanes du di den tra apostel seni den go na Samaria?

A preikiwroko na a moro prenspari wroko di a Tiri Skin e orga. Prei a FELEM.

 Yesus sori o prenspari a preikiwroko de. Leisi Markus 13:10 èn taki fu den aksi disi:

• Fu san ede a preikiwroko prenspari so gi a Tiri Skin?

• Fu san ede wi abi „a koni srafu di de fu frutrow” fanowdu fu orga a wroko disi na heri grontapu?

5. A koni srafu e tiri a pipel fu Gado

A Tiri Skin e tiri den gemeente fu Yehovah Kotoigi na heri grontapu. Fa den e teki bosroiti? Luku fa a tiri skin na ini a ten fu den apostel ben du dati. Leisi Tori fu den apostel 15:1, 2 èn taki fu den aksi disi:

• Sortu problema ben de na ini son gemeente fu den fosi Kresten?

• Na suma Paulus, Barnabas nanga den tra brada go fu lusu a problema?

Leisi Tori fu den apostel 15:12-18, 23-29 èn taki fu na aksi disi:

• San a tiri skin du fu man teki wan bosroiti di Gado feni bun?​—Luku vers 12, 15 nanga 28.

Leisi Tori fu den apostel 15:30, 31 nanga 16:4, 5. Baka dati taki fu den aksi disi:

• San den fosi Kresten du di den yere a bosroiti di a tiri skin teki?

• Fa Yehovah blesi den di den gi yesi?

Leisi 2 Timoteyus 3:16 nanga Yakobus 1:5. Baka dati taki fu na aksi disi:

• Pe a Tiri Skin na ini a ten disi e suku rai fosi den teki bosroiti?

 SAN YU LERI?

A Tiri Skin na „a koni srafu di de fu frutrow” di Krestes poti. Den e tiri a wroko fu Yehovah Kotoigi na heri grontapu èn den e gi leri fu Bijbel.

Fa yu ben o piki den aksi disi?

• Suma poti „a koni srafu di de fu frutrow”?

• Fa a Tiri Skin e sorgu wi?

• Yu e bribi taki a Tiri Skin na „a koni srafu di de fu frutrow”?