Jesu unguMholi welibandla lebuKhristu. (Kubase-Efesu 5:23.) Lamuhla, Jesu usezulwini futsi ucondzisa balandzeli bakhe labasemhlabeni asebentisa ‘sisebenti lesetsembekile nalesihlakaniphile.’ (Fundza Matewu 24:45.) NguJesu Khristu lowamisa ‘lesisebenti’ futsi wasiniketa ligunya lekwenta tincumo letitsite. Nanobe kunjalo, lesisebenti kufanele silalele Khristu futsi sikhonte bomnakaboKhristu. Singubani lesisebenti? Sisinakekela njani?

1. Singubani ‘sisebenti lesetsembekile nalesihlakaniphile’?

Jehova bekasolo asebentisa indvodza, nobe licembu lemadvodza kuze acondzise bantfu bakhe. (Malakhi 2:7; KumaHebheru 1:1) Ngemuva kwekufa kwaJesu, kwahola baphostoli kanye nemadvodza lamadzala aseJerusalema. (Imisebenti 15:2) Ngendlela lefanako, lamuhla kunelicembu lelincane lemadvodza lamadzala laholako. Lelicembu libitwa ngekutsi Sigungu Lesibusako SaBoFakazi BaJehova, futsi liniketa imfundvo levela kuNkulunkulu liphindze licondzise umsebenti wekushumayela. Lelicembu ‘lisisebenti lesetsembekile nalesihlakaniphile lesibekwe [nguJesu].’ (Matewu 24:45a) Onkhe emalunga eSigungu Lesibusako angemaKhristu lagcotjwe ngumoya futsi alangatelela kuyobusa naKhristu eMbusweni wakhe wasezulwini nasekuphelile kuphila kwawo emhlabeni.

2. Nguyiphi imfundvo levela kuNkulunkulu lelungiselelwa sisebenti lesetsembekile?

Jesu watsi lesisebenti lesetsembekile ‘sitawuniketa [emaKhristu lakanye nawo] kudla ngesikhatsi lesifanele.’ (Matewu 24:45b) Njengobe kudla lesikudlako kusita imitimba yetfu kutsi ihlale iphilile futsi icinile, nemfundvo levela kuNkulunkulu, lokuticondziso letivela kuye, isiniketa emandla ekutsi sihlale setsembekile kuJehova futsi sente umsebenti Jesu lasiniketa wona. (1 KuThimothi 4:6) Sitfola lemfundvo levela kuNkulunkulu emihlanganweni yelibandla, emihlanganweni yesigodzi, emihlanganweni yesifundza kanye nasetincwadzini letisekelwe eBhayibhelini, nakuma-video lasisita sati loko Nkulunkulu lakufunako futsi sicinise buhlobo betfu naye.

 CHUBEKA UFUNISISA

3. Bantfu baJehova kufanele bahleleke

Ngekucondziswa nguJesu, Sigungu Lesibusako sihlela umsebenti waBoFakazi BaJehova. Jesu wawacondzisa ngendlela lefanako emaKhristu angelikhulu lekucala. Dlala le-VIDEO.

Fundza 1 KubaseKhorinte 14:33, 40, bese nicoca ngalombuto:

• Lamavesi akhombisa njani kutsi Jehova ufuna boFakazi bakhe bahleleke?

4. Sisebenti lesetsembekile sihlela umsebenti wetfu wekushumayela

Kushumayela bekungumsebenti lobaluleke kakhulu lebewentiwa ngemaKhristu angelikhulu lekucala. Fundza Imisebenti 8:14, 25, bese nicoca ngalemibuto:

• KumaKhristu angelikhulu lekucala, ngubani lebekacondzisa umsebenti wekushumayela?

• BoPhetro naJohane benta njani ngesikhatsi batfola sicondziso lesivela kulabanye baphostoli?

Kushumayela ngumsebenti lobaluleke kakhulu lohlelwa Sigungu Lesibusako. Dlala le-VIDEO.

 Jesu wagcizelela indlela umsebenti wekushumayela lobaluleke ngayo. Fundza Makho 13:10, bese nicoca ngalemibuto:

• Yini leyenta umsebenti wekushumayela ubaluleke kakhulu eSigungwini Lesibusako?

• Kungani sidzinga ‘sisebenti lesetsembekile nalesihlakaniphile’ kutsi sihlele lomsebenti lowentiwa emhlabeni wonkhe?

5. Sisebenti lesetsembekile siniketa sicondziso

Sigungu Lesibusako siniketa sicondziso kumaKhristu lasemhlabeni wonkhe. Sincuma njani kutsi ngusiphi sicondziso lesitasiniketa? Cabanga ngaloko lebekwentiwa sigungu lesibusako semaKhristu angelikhulu lekucala. Fundza Imisebenti 15:1, 2, bese nicoca ngalemibuto:

• Yini emaKhristu angelikhulu lekucala lebekangavumelani ngayo?

• BoPawula, Bhanabasi kanye nalabanye basicela kuphi sicondziso?

Fundza Imisebenti 15:12-18, 23-29, bese nicoca ngalombuto:

• Ngaphambi kwekwenta sincumo, yini sigungu lesibusako lesayenta kuze sitfole sicondziso lesivela kuNkulunkulu ngalendzaba?—Buka emavesi 12, 15, na-28.

Fundza Imisebenti 15:30, 31 na-16:4, 5, bese nicoca ngalemibuto:

• Yini leyentiwa ngemaKhristu angelikhulu lekucala nakatfola sicondziso lesivela esigungwini lesibusako?

• Jehova wawabusisa njani ngekulalela kwawo?

Fundza 2 KuThimothi 3:16 naJakobe 1:5, bese nicoca ngalombuto:

• Sigungu Lesibusako sisifuna kuphi sicondziso lamuhla kuze sente tincumo?

 LOKO LESICOCE NGAKO

Sigungu Lesibusako, ‘sisisebenti lesetsembekile nalesihlakaniphile’ lesamiswa nguKhristu. Siniketa ticondziso nemfundvo levela kuNkulunkulu kumaKhristu lasemhlabeni wonkhe.

Yini Loyifundzile?

• Samiswa ngubani ‘sisebenti lesetsembekile nalesihlakaniphile’?

• Sigungu Lesibusako sisinakekela ngatiphi tindlela?

• Uyakholwa yini kutsi Sigungu Lesibusako ‘sisisebenti lesetsembekile nalesihlakaniphile’?