Yesus kai Těmbonangu sidang Kristen. (Efesus 5:​23) Orasẹ̌ ini, bọu sorga, Yesus něngahạ tumatol᷊ene su dunia limiung ”ělang masatia dingangu matahuěna”. (Basa Matius 24:45.) Yesus Kristus něhengkẹ ělang ini kụ něgělị si sire wewenang gunang měkoạ piram baụ putusang. Maning kerene, ělang ini harusẹ̌ tumuhụ si Kristus dingangu melayani anạu sěngkataung i Kristus. I sai ělang ini? Kerea ělang ini něngurusẹ̌ si kitẹ?

1. I sai ”ělang masatia dingangu matahuěna”?

Yehuwa sěntiniạ měpẹ̌pakẹ sěngkatau esẹ arau sěmbaụ kelompok manga esẹ gunang měngahạ manga ělang’E. (Maleakhi 2:7; Ibrani 1:1) Nal᷊iu bọu papateng Yesus, manga rasulẹ̌ dingangu manga penatua su Yerusalem něngahạ manga ělangu Mawu. (Kisah 15:2) Kerene lai orasẹ̌ ini, piạ sěmbaụ kelompok manga penatua něngahạ manga ělangu Mawu. I sire nisěbạ Badan Pimpinan Sahiding Yehuwa. I sire něnadia kaěng rohani dingangu něngahạ hal᷊ẹ̌ měnginjilẹ̌. Kelompok ini kai ”ělang masatia dingangu matahuěna, kụ nihengkẹ [i Yesus]”. (Matius 24:45a) Kěbị anggota Badan Pimpinan kai tau Kristen apang nilanisu rohkẹ̌ masusi, kụ i sire měngẹ̌ngampal᷊ẹ̌ tempone mẹ̌parenta dingangi Kristus su Kararatuang su sorga mạeng pěbawiahi sire su dunia seng nasue.

2. Apa kaěng rohani nisadiangu ělang masatia?

Yesus naul᷊ị ělang masatia sarung ”měgělị [su anạu sěmbaụe] kaěng nẹ̌tatahino su tempone”. (Matius 24:45b) Kere kaěng jasmani makakoạ si kitẹ matoghasẹ̌ dingangu masehatẹ̌, kaěng rohani arau laahạ bọu Hengetangu Mawu lai makakoạ si kitẹ matoghasẹ̌ gunang tatapẹ̌ masatia si Yehuwa dingangu měkoạ hal᷊ẹ̌ seng nighělị i Yesus si kitẹ. (1 Timotius 4:6) I kitẹ nakatarimạ kaěng rohani su pěngangibadang, pertemuan wilayah, dingangu pertemuan regional. Bọu ene lai, i kitẹ nakatarimạ kaěng rohani limiung manga bawasang dingangu video dasare bọu Alkitapẹ̌. Manga kaěng rohani ene makatul᷊ung si kitẹ makaěna apa kapulung Mawu lai makatoghasẹ̌ pẹ̌dal᷊ahapị i kitẹ dingang’E.

 BANGKA PAKARAL᷊UNG

3. Umati Yehuwa harusẹ̌ ahạkeng

Yesus něngahạ tau Kristen su abad humotong. Kerene lai orasẹ̌ ini, Yesus něngahạ hal᷊ẹ̌u Sahiding Yehuwa limiung Badan Pimpinan. Putarẹ̌ VIDEONE.

Basa 1 Korintus 14:​33, 40, bọu ene bisarai kakiwal᷊o ini:

• Kerea manga ayatẹ̌ ini něnodẹ Yehuwa mapulu manga Sahidi-Ne ahạkeng?

4. Ělang masatia něngahạ hal᷊ẹ̌ měnginjilẹ̌

Měnginjilẹ̌ ene kai hal᷊ẹ̌ sěbạe penting kẹ̌koatengu tau Kristen su abad humotong. Basa Kisah 8:​14, 25, bọu ene bisarai manga kakiwal᷊o ini:

• Su tal᷊oarang tau Kristen su abad humotong, i sai měngẹ̌ngahạ hal᷊ẹ̌ měnginjilẹ̌?

• Kerea reaksing i Petrus dingangi Yohanes su tempong nakaěbạ laahạ bọu manga rasulẹ̌ wal᷊inẹ?

Měnginjilẹ̌ kai hal᷊ẹ̌ sěbạe penting niatoru Badan Pimpinan. Putarẹ̌ VIDEONE.

 Yesus něnodẹ hal᷊ẹ̌ měnginjilẹ̌ ene sěbạe penting koateng. Basa Markus 13:​10, bọu ene bisarai manga kakiwal᷊o ini:

• Kawe nụe hal᷊ẹ̌ měnginjilẹ̌ sěbạe penting su Badan Pimpinan?

• Kawe nụe i kitẹ membutuhkan ”ělang masatia dingangu matahuěna” gunang měngahạ hal᷊ẹ̌ ini su patikụ dunia?

5. Ělang masatia něnadia laahạ

Badan Pimpinan něnadia laahạ gunang tau Kristen su patikụ dunia. Kerea i sire měmutusẹ̌ soal u laahạ apa sarung gělịkang? Pẹ̌tiněna kerea badan pimpinan su abad humotong někoạ ene. Basa Kisah 15:​1, 2, bọu ene bisarai manga kakiwal᷊o ini:

• Masalah apa siměpụ su tal᷊oarang tau Kristen su abad humotong?

• I Paulus, Barnabas, dingangu tau Kristen wal᷊inẹ nakoạ sarang i sai gunang měnul᷊idẹ̌ masalah ene?

Basa Kisah 15:​12-​18, 23-​29, bọu ene bisarai kakiwal᷊o ini:

• Těntal᷊ang bědang tawe někoạ putusang, apa nikoạ u badan pimpinan su abad humotong tadeạu makaěbạ laahạu Mawu gunang masalah ene?​—Pěmanda ayatẹ̌ 12, 15, dingangu 28.

Basa Kisah 15:​30, 31 dingangu 16:​4, 5, bọu ene bisarai manga kakiwal᷊o ini:

• Apa nikoạ u tau Kristen su abad humotong su tempong nakaěbạ laahạ bọu badan pimpinan?

• Kerea Yehuwa něngal᷊amatẹ̌ katatuhụ i sire?

Basa 2 Timotius 3:​16 dingangu Yakobus 1:​5, bọu ene bisarai kakiwal᷊o ini:

• Orasẹ̌ ini su tempong měkoạ putusang, su apa Badan Pimpinan mědeạ laahạ?

 RINGKASAN

Badan Pimpinan kai ”ělang masatia dingangu matahuěna” nihengkẹ i Kristus. I sire něnadia laahạ dingangu kaěng rohani gunang tau Kristen su patikụ dunia.

Apa seng nikaěndungangu?

• I sai ”ělang masatia dingangu matahuěna”?

• Kerea Badan Pimpinan něngurusẹ̌ si kitẹ?

• Apa i kau mangimang Badan Pimpinan kai ”ělang masatia dingangu matahuěna”?