Zizas i da Lida blo da Kristian kongrigeisin. (Episis 5:23) Tidei, nomata Zizas stap antap eben, em yuze da “waiz sleib wea i prapa trasem” po lide demwan uda pole em ya lo ert. (Rid Matiu 24:45 NWT.) Bikoz Zizas bin suze dis “sleib” emselp, i min ol gad da rait po lid ane lukapta yumpla, bat ol stil stap sleib blo Kraist ane serbe ol bala blo Kraist. Uda dat sleib? Wanem da sleib mekem po lukapta mipla?

1. Uda i “dat waiz sleib wea i prapa trasem”?

Zeoba oltaim yuze wan man o wan smol grup blo man po lide pipol blo em. (Malakai 2:7; Ibrupipol 1:1) Apta wen Zizas bin ded, dem misnareman ane dem elda lo Zarusalem bin lide da amenwok. (Pas Misnare Wok 15:2) So tidei, wan smol grup blo elda—da Governing Body blo Ol Zeoba Witnis—pole da seimwei wea ol gibe ol amenkaikai ane i lide da amenwok tu. Dis smol grup i “dat waiz sleib wea i prapa trasem ane [Zizas] i go putem po lukapta.” (Matiu 24:45a NWT) Ebridem bala blo da Governing Body, i Kristian uda God bin anoint, o suzem, wea oli spirit blo em. Ol lukpowad po zoine Kraist wea Kingdom blo em antap eben, wen laip blo dempla i pinis wea ert.

2. Wanem amenkaikai dat waiz sleib i gibem?

Zizas bin spik, dat waiz sleib go “gibe [ol Kristian] kaikai wea da raittaim.” (Matiu 24:45b NWT) Seimkain wase prapa kaikai elpe yumi stap strong ane elti wea bodi, amenkaikai—gudtising prom Wod blo God—gibe yumi da strong wi nidem po tekesaid blo Zeoba ane meke da amenwok Zizas bin gibem po yumi. (1 Timoti 4:6) Mipla gede dat amenkaikai wen wi gopo ol miting, ol big asembli, ane prom dem Baibol buk ane bidyo dat elpe yumi sabe wanem God i wandem ane i elpe yumi go moklostu po em.

 TINGBAUT MO NAU

3. Pipol blo Zeoba mas wok tugeda wea prapa oda

Zizas gaide da Governing Body po setemap ane lide da amenwok blo ol Zeoba Witnis. Zizas bin gaide dem pas Kristian lo seimkainwei. Plei da BIDYO.

Rid 1 Korint 14:33, 40, ane tokbaut dis kwestin ya:

• Wiskain dem skripsa soe Zeoba wande ol Witnis blo em po wok tugeda prapawei wea oda?

4. Da waiz sleib setemap ane lide prising wok blo mipla

Prising bin da mein wok dem pas Kristian bin mekem. Rid Pas Misnare Wok 8:14, 25, ane tokbaut dem kwestin ya:

• Uda bin soe dem pas Kristian wiskain po meke da prising wok?

• Wanem Pita ane Zon bin mekem wen dem nada misnareman gibe demtu wok po mekem?

Prising i da mein wok da Governing Body lidem tidei. Plei da BIDYO.

 Da prising wok i da mein wok Zizas spik po mekem. Rid Mak 13:10, ane tokbaut dem kwestin ya:

• Aukam da prising wok i mina impotant po da Governing Body?

• Aukam mipla nide “dat waiz sleib wea i prapa trasem” po setemap ane gaide dis woldwaid amenwok?

5. Da waiz sleib gibe oda ane gudtising

Da Governing Body lide ol Kristian ol raun da wold. Wiskain da Governing Body sabe wanem oda o gudtising po gibem? Ridbaut wiskain da governing body blo dem pas Kristian bin sabe tu. Rid Pas Misnare Wok 15:1, 2, ane tokbaut dem kwestin ya:

• Sam dem pas Kristian bin agiu baut wanem problem?

• Uda Pol, Banabas, ane sam nada bala bin go tok po sole ol ken sotemaut disting?

Rid Pas Misnare Wok 15:12-18, 23-29, ane tokbaut dis kwestin ya:

• Wanem da governing body bin mekem pas po gede tingking blo God sole dempla ken strete dat problem?—Rid Pas Misnare Wok 15:12, 15, ane 28.

Rid Pas Misnare Wok 15:30, 31 ane 16:4, 5, ane tokbaut dem kwestin ya:

• Wiskain dem pas Kristian bin akt wen ol bin lisen da ansa prom da governing body?

• Wiskain Zeoba bin blese da wei ol bin lisen?

Rid 2 Timoti 3:16 ane Zemes 1:5, ane tokbaut dis kwestin ya:

• Wiskain da Governing Body paindaut wanem po mekem tidei?

 WANEM YU BI LAN

Da Governing Body i “dat waiz sleib wea i prapa trasem” uda Kraist bin putem po lide ane gibe amenkaikai po ol Kristian oloba da wold.

Wiskain Yu Go Spik

• Uda bin suz “dat waiz sleib wea i prapa trasem”?

• Wiskain da Governing Body lukapta mipla?

• Wiswei, yu bilib da Governing Body i “dat waiz sleib wea i prapa trasem” a?