WEKELO 54
Ɔkɛndɛ w’“ɔhɔmbɔ wa kɔlamelo ndo kɛsɔ””
Yeso ekɔ Owandji w’etshumanelo k’Akristo. (Ɛfɛsɔ 5:23) Ɛlɔ kɛnɛ, oma lo dihole diele lande l’olongo, Yeso ekɔ lo nɔmbɔla ambeki ande wa la nkɛtɛ lo tshimbo ya “ɔhɔmbɔ wa kɔlamelo ndo kɛsɔ.” (Adia Mateo 24:45.) Oko wakandalongola ɔkɛndɛ ɔmɔtshi oma le Yeso ndamɛ, “ɔhɔmbɔ” akahombe monga la yema ya lowandji, koko nde akahombe ntshikala ɔhɔmbɔ wa Kristo ndo kambɛ anango Kristo. Ko ele ɔhɔmbɔ ɔsɔ? Ngande wakotsha ɔhɔmbɔ ɔsɔ ehomba aso?
1. Ele “ɔhɔmbɔ wa kɔlamelo ndo kɛsɔ”?
Jehowa okokambaka nshi tshɛ la pami kɛmɔtshi kana djui mɔtshi y’apami dia mbisha ekambi ande ɛlɔmbwɛlɔ. (Malaki 2:7; Hɛbɛru 1:1) L’ɔkɔngɔ wa nyɔi ka Yeso, apɔstɔlɔ ndo dikumanyi dia la Jɛrusalɛma wakatatɛ nɔmbɔla. (Etsha 15:2) Lo ndjela ɛnyɛlɔ kɛsɔ, ɛlɔ kɛnɛ djui mɔtshi ya dikumanyi yelamɛ Olui-walɔmbɔla w’Ɛmɛnyi wa Jehowa yekɔ lo tosha mbo ya ndɛ ya lo nyuma ndo yekɔ lo nɔmbɔla olimu w’esambishelo. Djui shɔ mbele ‘ɔhɔmbɔ wa kɔlamelo ndo kɛsɔ wakasɔnama oma le Yeso.’ (Mateo 24:45a) Anto tshɛ wakenga Olui-walɔmbɔla wekɔ Akristo w’akitami, walongamɛ dia toonga kaamɛ la Yeso lo Diolelo diande dia l’olongo oma l’ɔkɔngɔ wa nyɔi kawɔ lanɛ la nkɛtɛ.
2. Naa weho wa mbo ya ndɛ yatondja ɔhɔmbɔ wa kɔlamelo?
Yeso akate dia ɔhɔmbɔ wa kɔlamelo ɔsɔ ‘ayoshaka asekawɔ Akristo mbo ya ndɛ yawɔ l’etena kahombama.’ (Mateo 24:45b) Oko watokimanyiya mbo ya ndɛ ya lo demba dia ntshikala la wolo ndo la yoonge ya dimɛna, mbele ndo mbo ya ndɛ ya lo nyuma, mbuta ate wetshelo w’oma l’Ɔtɛkɛta wa Nzambi toshaka wolo weso l’ohomba dia ntshikala la kɔlamelo le Jehowa ndo nkamba olimu wakatosha Yeso dia nkamba. (1 Timɔte 4:6) Sho nongolaka mbo ya ndɛ ya lo nyuma shɔ oma lo tshimbo ya nsanganya ya l’etshumanelo, nsanganya ya weke, nsanganya ya rɛjɔ, ekanda walembetshiya Bible, ndo tovidɛo tatokimanyiya dia nshihodia lolango la Nzambi ndo dia nkeketsha diɔtɔnganelo diasaso la nde.
NYOMOTSHIMOLA
Enda lande na kesɔ l’ohomba wa “ɔhɔmbɔ wa kɔlamelo ndo kɛsɔ,” mbuta ate Olui-walɔmbɔla.
Olui-walɔmbɔla mbishaka Ɛmɛnyi wa Jehowa wa l’andja w’otondo mbo ya ndɛ ya lo nyuma, ɛlɔmbwɛlɔ ndo ekimanyielo k’oshika
3. Ekambi wa Jehowa pombaka kongɛma
L’ɛlɔmbwɛlɔ ka Yeso, Olui-walɔmbɔla kongɛka olimu w’Ɛmɛnyi wa Jehowa. Ngasɔ mbakakongɛma di’Akristo wa lo ntambe ka ntondo. Nyende VIDƐO.
Nyadia 1 Kɔrɛtɔ 14:33, 40, ndo oma laasɔ, nyɔkɛtshanya dimbola nɛ:
-
Ngande wɛnya avɛsa anɛ dia Jehowa nangaka di’Ɛmɛnyi ande kongɛma?
4. Ɔhɔmbɔ wa kɔlamelo kongɛka olimu aso w’esambishelo
Esambishelo mbaki olimu wakaleke ohomba wakakambe Akristo wa lo ntambe ka ntondo. Nyadia Etsha 8:14, 25, ndo oma laasɔ, nyɔkɛtshanya ambola anɛ:
-
L’atei w’Akristo wa lo ntambe ka ntondo, waa na wakalɔmbɔlaka olimu w’esambishelo?
-
Kakɔna kakasale Petero la Joani oma lo ɛlɔmbwɛlɔ kakawalongola oma le asekawɔ apɔstɔlɔ?
Esambishelo ekɔ olimu woleki ohomba wokongɛmi oma le Olui-walɔmbɔla. Nyende VIDƐO.
Yeso akake epole ɔsɛkɛ l’ohomba w’olimu w’esambishelo. Nyadia Makɔ 13:10, ndo oma laasɔ, nyɔkɛtshanya ambola anɛ:
-
Lande na kele esambishelo kekɔ olimu w’ohomba efula le Olui-walɔmbɔla?
-
Lande na keso l’ohomba wa “ɔhɔmbɔ wa kɔlamelo ndo kɛsɔ” dia nkongɛ olimu wakambema l’andja w’otondo?
5. Ɔhɔmbɔ wa kɔlamelo toshaka ɛlɔmbwɛlɔ
Olui-walɔmbɔla mbishaka Akristo wa l’andja w’otondo ɛlɔmbwɛlɔ. Ngande washikikɛwɔ woho w’ɛlɔmbwɛlɔ kahombawɔ mbisha? Tɔsɛdingole woho wakasale olui walɔmbɔla w’Akristo wa lo ntambe ka ntondo dui sɔ. Nyadia Etsha 15:1, 2, ndo oma laasɔ, nyɔkɛtshanya ambola nɛ:
-
Naa dui dimɔtshi diakatondja owanu lam’asa Akristo wa lo ntambe ka ntondo?
-
Pɔɔlɔ, Barnabasɛ, ndo Akristo akina wakatshu le waa na dia toyanga ɛlɔmbwɛlɔ dia nkandola dui sɔ?
Nyadia Etsha 15:12-18, 23-29, ndo oma laasɔ, nyɔkɛtshanya dimbola nɛ:
-
La ntondo ka mbɔsa yɛdikɔ, kakɔna kakasɛdingola olui walɔmbɔla wa lo ntambe ka ntondo dia nkondja ɛlɔmbwɛlɔ ka Nzambi dia nkandola dui sɔ?—Enda divɛsa 12, 15, ndo 28.
Nyadia Etsha 15:30, 31 ndo 16:4, 5, ndo oma laasɔ, nyɔkɛtshanya ambola anɛ:
-
Kakɔna kakasale Akristo wa lo ntambe ka ntondo lam’akawalongola ɛlɔmbwɛlɔ oma le olui walɔmbɔla?
-
Ngande wakatshɔkɔla Jehowa okitanyiya awɔ?
Nyadia 2 Timɔte 3:16 ndo Jakɔba 1:5, ndo oma laasɔ, nyɔkɛtshanya dimbola nɛ:
-
Oma lende ayanga ase Olui-walɔmbɔla ɛlɔmbwɛlɔ etena kɔsawɔ tɛdikɔ ɛlɔ kɛnɛ?
ANTO AMƆTSHI MBUTAKA ƆNƐ: “Naka wɛ ekɔ lo mpokamɛ Olui-walɔmbɔla, kete wɛ ekɔ lo ndjela anto.”
-
Kakɔna kakoshikikɛ dia Yeso mbalɔmbɔla Olui-walɔmbola?
LO TSHENA PE
Olui-walɔmbɔla ekɔ “ɔhɔmbɔ wa kɔlamelo ndo kɛsɔ” wakasɔnama oma le Kristo. Vɔ mbishaka Akristo wa lo nkɛtɛ k’otondo ɛlɔmbwɛlɔ ndo mbo ya ndɛ ya lo nyumba.
Ovuswelo
-
Akasɔnɛ “ɔhɔmbɔ wa kɔlamelo ndo kɛsɔ”?
-
Ngande wakotsha Olui-walɔmbɔla ehomba aso?
-
Onde wɛ mbetawɔka dia Olui-walɔmbɔla mbele “ɔhɔmbɔ wa kɔlamelo ndo kɛsɔ”?
SALA EYANGELO
Enda woho wayakongɛ Olui-walɔmbɔla dia nkamba olimu awɔ.
“Ele Olui-walɔmbɔla w’Ɛmɛnyi wa Jehowa?” (Sawo dia l’Ɛtɛrnɛtɛ)
Enda woho wayashikikɛ Olui-walɔmbɔla dia tekɔ lo nongola mbo ya ndɛ ya lo nyuma y’eshika.
Ngande wɔsa ase Olui-walɔmbɔla olimu wakawasha Yeso dia nsala?
Ngande wɛnya nsanganya yaso ya l’atei wa lomingu ndo nsanganya yaso ya weke dia Jehowa ekɔ lo nɔmbɔla Olui-walɔmbɔla?
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
