Jisas em i Het bilong kongrigesen Kristen. (Efesus 5:23) Long nau, Jisas i holim bikpela namba long heven, na em i stiaim lain bilong em long graun long rot bilong “gutpela wokboi i gat savetingting.” (Ritim Matyu 24:45.) Jisas yet i makim dispela “wokboi,” olsem na dispela wokboi i gat sampela namba tasol em i stap yet olsem wokboi bilong Krais na mekim wok bilong ol brata bilong Krais. Husat dispela wokboi? Olsem wanem dispela wokboi i lukautim yumi?

1. Husat dispela “gutpela wokboi i gat savetingting”?

Long olgeta taim, Jehova i save yusim wanpela man o wanpela liklik lain bilong stiaim lain bilong em. (Malakai 2:7; Hibru 1:1) Bihain long dai bilong Jisas, ol aposel na ol hetman long Jerusalem i gopas long stiaim wok. (Aposel 15:2) Long wankain pasin, wanpela liklik lain elda long nau​—em Gavening Bodi Bilong Ol Witnes Bilong Jehova​—i save redim ol tok bilong Baibel na dairektim wok bilong autim tok. Em “gutpela wokboi i gat savetingting [em Jisas] i bin makim.” (Matyu 24:45a) Olgeta brata insait long Gavening Bodi ol i Kristen God i bin makim long holi spirit, na ol i luk fowed long mekim wok king wantaim Krais long Kingdom bilong em long heven bihain long ol i dai na go long heven.

2. Gutpela wokboi i givim yumi wanem ol kaikai?

Jisas i tok olsem gutpela wokboi bai “givim kaikai long ol [wanlain Kristen] long taim stret.” (Matyu 24:45b) Wankain olsem kaikai yumi kisim i helpim bodi i stap strong na helti, ol kaikai bilong strongim bilip​—em ol tok i kam long Baibel​—i givim strong yumi nidim bilong i stap gut yet long Jehova na mekim wok em Jisas i givim yumi long mekim. (1 Timoti 4:6) Yumi kisim ol dispela tok long rot bilong ol miting, ol liklik na bikpela kibung, na tu, long rot bilong ol pablikesen em Baibel i as bilong ol tok bilong en, na ol vidio we i helpim yumi long kliagut long laik bilong God na strongim pasin pren bilong yumi wantaim em.

 KISIM SAMPELA SAVE MOA

3. Lain bilong Jehova i mas wok gut wantaim

Jisas i stiaim Gavening Bodi long oganaisim ol wok bilong ol Witnes Bilong Jehova. Em wankain pasin ol Kristen bilong bipo i bin bihainim. Pilaim VIDIO.

Ritim 1 Korin 14:33, 40, na stori long dispela askim:

• Olsem wanem ol dispela ves i soim olsem Jehova i laik bai ol Witnes Bilong em i wok gut wantaim?

4. Gutpela wokboi i oganaisim wok autim tok bilong yumi

Wok bilong autim tok em wanpela bikpela wok tru ol Kristen bilong pastaim i bin mekim. Ritim Aposel 8:14, 25, na stori long ol dispela askim:

• Namel long ol Kristen bilong pastaim, husat i givim instraksen long wok bilong autim tok?

• Pita na Jon i mekim wanem bilong bihainim instraksen i kam long ol wanwok aposel?

Wok autim tok i bikpela wok tru em Gavening Bodi i oganaisim. Pilaim VIDIO.

 Jisas i kamapim klia olsem wok autim tok i bikpela samting. Ritim Mak 13:10, na stori long ol dispela askim:

• Wai na wok autim tok i bikpela samting long Gavening Bodi?

• Wai na yumi nidim “gutpela wokboi i gat savetingting” long oganaisim dispela wok long olgeta hap bilong graun?

5. Gutpela wokboi i givim daireksen

Gavening Bodi i givim daireksen long ol Kristen long olgeta hap bilong graun. Hau Gavening Bodi i save skelim ol samting na givim daireksen? Skelim hau gavening bodi bilong ol Kristen bilong pastaim i bin mekim olsem. Ritim Aposel 15:1, 2, na stori long ol dispela askim:

• Wanem tok i kirapim tok pait namel long ol Kristen bilong pastaim?

• Pol, Barnabas, na ol narapela i go long husat bilong kisim helpim long stretim dispela hevi?

Ritim Aposel 15:12-18, 23-29, na stori long dispela askim:

• Paslain long gavening bodi bilong pastaim i mekim disisen, ol i skelim wanem samting bilong kisim tingting bilong God long dispela hevi?​—Lukim ves 12, 15, na 28.

Ritim Aposel 15:30, 31 na 16:4, 5, na stori long ol dispela askim:

• Ol Kristen bilong pastaim i mekim wanem taim ol i kisim daireksen i kam long gavening bodi?

• Olsem wanem Jehova i blesim pasin bilong ol long bihainim tok?

Ritim 2 Timoti 3:16 na Jems 1:5, na stori long dispela askim:

• Long nau, olsem wanem Gavening Bodi i kisim ol tok bilong stiaim ol taim ol i mekim ol disisen?

 OL BIKPELA POIN

Gavening Bodi em “gutpela wokboi i gat savetingting” em Krais i makim. Gavening Bodi i save givim daireksen na ol tok bilong Baibel long ol Kristen i stap long olgeta hap.

Riviu

• Husat i makim “gutpela wokboi i gat savetingting”?

• Olsem wanem Gavening Bodi i lukautim yumi?

• Yu bilip olsem Gavening Bodi em “gutpela wokboi i gat savetingting”?