Yesu nuwe Mutwe gw’ekitebe Ekikristaayo. (Abefeso 5:23) Kasumi kanu, nk’Omukama omu iguru, ayebembera abahondezi be ab’omu nsi n’asigikirra omu iguru obu n’akozesa omwiru omwesigwa kandi ow’amagezi. (Soma Matayo 24:45.) Yesu nuwe y’akomere “omwiru” ogu kandi y’amuha obusobozi obw’okukora encwamu ezimu. Baitu nabwo omwiru ogu asemeriire kworobera Kristo kandi aheereze ab’oruganda. Omwiru ogu nuwe oha? Aturolerra ata?

1. Omwiru omwesigwa kandi ow’amagezi nuwe oha?

Yahwe aikaire n’akozesa omusaija rundi guruupu y’abasaija kuha abantu be oburagirizi. (Maraki 2:7; Abaheburaniya 1:1) Hanyuma y’okufa kwa Yesu, abakwenda hamu n’abagurusi ab’omu Yerusalemu nubo baatandikire kwebembera. (Engeso Ezabakwenda 15:2) Omulingo nugwo gumu, kasumi kanu guruupu entaito ey’abagurusi b’ekitebe nubo barukwebembera abaheereza be. Guruupu enu n’eyetwa Akatebe Akalemi ak’Abakaiso ba Yahwe. Batuhikyaho ebyokulya eby’omwoyo kandi bebembera omulimo ogw’okutebeza. Guruupu enu nuwe ‘omwiru omwesigwa kandi ow’amagezi Yesu ouyakomere.’ (Matayo 24:45a) Boona abali h’Akatebe Akalemi, Bakristaayo abaseserweho amagita abalindiriire kulema na Kristo omu Bukama bwe obw’omu iguru hanyuma y’obwomeezi bwabo obw’omu nsi.

2. Byokulya ki eby’omwoyo omwiru omwesigwa eby’atuha?

Yesu akagamba ngu omwiru omwesigwa yaakuhaire Abakristaayo bagenzi be “ebyokulya byabu omu kasumi” akahikire. (Matayo 24:45b) Nk’oku ebyokulya ebitulya bikonyera emibiri yaitu kwikara ine amaani, ebyokulya eby’omwoyo​—kandi oku nukwo kwegesebwa kuruga omu Kigambo kya Ruhanga—​bituha amaani agaturukwetaaga kwikara tuli besigwa hali Yahwe n’okugumizaamu nitukora omulimo Yesu yatuhaire. (1 Timoseo 4:6) Tutunga ebyokulya binu kurabira omu nsorrokano z’ekitebe, ensorrokano enkooto, ebitabu ebitutunga ebirukusigikirra ha Baibuli hamu na vidiyo ezitukonyera kumanya Ruhanga eby’agonza n’okugumya enkoragana yaitu nauwe.

 YEGA EBIRUKUKIRAHO

3. Abantu ba Yahwe basemeriire kuba batekaniziibwe kurungi

Akatebe Akalemi katekaniza omulimo ogw’Abakaiso ba Yahwe hansi y’oburagirizi bwa Yesu. Yesu yayebemberaga Abakristaayo aba kara omu mulingo nugwo gumu. Mutekeho VIDIYO.

Musome 1 Abakolinso 14:33, 40, hanyuma mubazeeho ekikaguzo kinu:

• Enkarra zinu nizooleka zita ngu Yahwe n’agonza Abakaiso be kuba bantu abatekaniziibwe kurungi?

4. Omwiru omwesigwa atekaniza omulimo gwaitu ogw’okutebeza

Kutebeza gwali guli mulimo omukuru muno Abakristaayo aba kara ogubakoraga. Musome Engeso Ezabakwenda 8:14, 25, hanyuma mubazeeho ebikaguzo binu:

• Omu Bakristaayo aba kara, nooha yahaga oburagirizi oburukukwata ha mulimo ogw’okutebeza?

• Petero na Yohana baketwaza bata obubaatungire oburagirizi kuruga omu bakwenda bataahi baabo?

Kutebeza guli mulimo omukuru muno ogutekanizibwa Akatebe Akalemi. Mutekeho VIDIYO.

 Yesu akooleka nk’oku kutebeza kiri kintu kikuru. Musome Marako 13:10, hanyuma mubazeeho ebikaguzo binu:

• Habwaki omulimo gw’okutebeza mukuru muno hali Akatebe Akalemi?

• Habwaki nitwetaaga “omwiru omwesigwa kandi ow’amagezi” kutekaniza omulimo ogw’okutebeza ogw’ensi yoona?

5. Omwiru omwesigwa atuha oburagirizi

Akatebe Akalemi kaha oburagirizi hali Abakristaayo omu nsi yoona. Kasigikirra hali ki obukaba nikaha oburagirizi? Wetegereze omulingo akatebe akalemi ak’Abakristaayo aba kara kaakoraga. Musome Engeso Ezabakwenda 15:1, 2, hanyuma mubazeeho ebikaguzo binu:

• Nsonga ki eyalesereho obutetegerezangana hagati y’Abakristaayo aba kara?

• Paulo na Baranaba bakaserra nkaha obukonyezi kusobora kugonjoora ensonga enu?

Musome Engeso Ezabakwenda 15:12-18, 23-29, hanyuma mubazeeho ekikaguzo kinu:

• Akatebe akalemi aka kara kakakora ki obu kaali nikaserra oburagizi bwa Ruhanga ha nsonga enu katakakozere encwamu?​—Rora orukarra 12, 15, na 28.

Musome Engeso Ezabakwenda 15:30, 31 na 16:4, 5, hanyuma mubazeeho ebikaguzo binu:

• Abakristaayo aba kara baketwaza bata obubaatungire oburagirizi kuruga h’akatebe akalemi?

• Yahwe akabaha migisa ki habw’okworobera oburagirizi?

Musome 2 Timoseo 3:16 na Yakobo 1:5, hanyuma mubazeeho ekikaguzo kinu:

• Akatebe Akalemi kaserra nkaha obukonyezi obukaba nikakora encwamu kasumi kanu?

 OYEGERE KI?

Akatebe Akalemi nuwe “omwiru omwesigwa kandi ow’amagezi” Yesu ouyakomere. Kaha Abakristaayo omu nsi yoona oburagirizi n’ebyokulya eby’omwoyo.

Kweijukyamu

• Nooha y’akomere “omwiru omwesigwa kandi ow’amagezi”?

• Akatebe Akalemi katurolerra kata?

• Noikiriza ngu Akatebe Akalemi nuwe “omwiru omwesigwa kandi ow’amagezi”?