MATAUPU 54

Te Tiute o “te Tavini Fakamaoni Kae Poto”

FAKATAGI/PEI

A Iesu ko te Ulu o te fakapotopotoga Kelisiano. (Efeso 5:23) I aso nei, e takitaki ne Iesu ana soko i te lalolagi, mai tena tulaga i te lagi, e auala i “te tavini fakamaoni kae poto.” (Faitau te Mataio 24:45.) E tiga eiloa ne ‵tofi aka a ia ne Iesu, e maua ne te “tavini” tenā se tulaga pule kae koi tumau a ia i te fai mo tavini a Keliso kae tavini atu foki ki taina o Keliso. Ko oi te tavini tenā? E tausi mai pefea a te tavini ki a tatou?

1. Ko oi “te tavini fakamaoni kae poto”?

Ne fakaaoga faeloa ne Ieova se tagata, io me se tamā potukau o tāgata ke takitaki ei ana tino. (Malaki 2:7; Epelu 1:1) Mai tua o te mate o Iesu, ne fai ne te kau apositolo mo toeaina i Ielusalema a te takitakiga. (Galuega 15:2) E ‵tusa mo te mea tenā, i aso nei e isi se tamā potukau o toeaina—ko te Potukau Pule o Molimau a Ieova—e tuku mai ne latou a mea‵kai faka-te-agaga kae fai foki te takitakiga i te galuega talai. A te potukau tenei ko “te tavini fakamaoni kae poto telā ne fili ne [Iesu].” (Mataio 24:45a) A sui katoa o te Potukau Pule ne Kelisiano fakaekegina ki te agaga, kolā e olioli ki te taimi ka ‵kau fakatasi ei mo Keliso i tena Malo faka-te-lagi māfai ko palele atu te lotou olaga i te lalolagi nei.

2. Ne a mea‵kai faka-te-agaga e fakatoka ne te tavini fakamaoni?

Ne fai atu a Iesu me i te tavini fakamaoni ka “tuku atu [ki taina Kelisiano] olotou meakai i te taimi tonu.” (Mataio 24:45e) E pelā eiloa mo mea‵kai faka-te-foitino e fesoasoani mai ke tumau te ‵tou malosi mo te ola ‵lei, a mea‵kai faka-te-agaga—ko fakatonuga mai te Muna a te Atua—e maua ne tatou mai i ei a te malosi ke tumau i te fakamaoni ki a Ieova, kae fai te galuega ne fai mai Iesu ke fai ne tatou. (1 Timoteo 4:6) E maua ne tatou a mea‵kai faka-te-agaga konā, e auala i fakatasiga, fono fo‵liki, mo fono ‵lasi, e pelā foki mo tusi faka-te-Tusi Tapu mo vitio kolā e fesoasoani mai, ke malamalama tatou i te loto o te Atua kae ke fakamalosi aka te ‵tou va fakataugasoa mo ia.

KELI MALOSI IFO

Onoono ki pogai e manakogina ei ne tatou a “te tavini fakamaoni kae poto”—Potukau Pule.

E fakatoka ne te Potukau Pule a mea‵kai faka-te-agaga, fakatakitakiga mo fesoasoani aoga ki Molimau a Ieova i te lalolagi kātoa

3. E ‵tau o fakatoka faka‵lei a tino o Ieova

Mai lalo i te takitakiga a Iesu, e fakatoka ne te Potukau Pule a galuega a Molimau a Ieova. Ne fai foki ne Kelisiano mua se fakatokaga tai ‵pau penā. Pei te VITIO.

VITIO: Ieova e Fakatoka ne ia Ana Tino (6:18)

Faitau te 1 Kolinito 14:33, 40, ko sau‵tala ei ki te fesili tenei:

E fakaasi mai pefea i fuaiupu konei me e manako a Ieova ke fakatoka faka‵lei ana Molimau?

4. E fakatoka ne te tavini fakamaoni a te ‵tou galuega talai

A te galuega talai ko te ‵toe galuega tāua ne fai ne Kelisiano i aso mua. Faitau te Galuega 8:14, 25, ko sau‵tala ei ki fesili konei:

Ko oi ne fai ne latou te takitakiga i te galuega talai i Kelisiano mua?
Ne ‵saga atu pefea a Petelu mo Ioane ki te takitakiga a te kau apositolo?

A te galuega talai ko te ‵toe galuega tāua ne fakatoka ne te Potukau Pule. Pei te VITIO.

VITIO: Ne ‵Saga Tonu Atu ki te Galuega Talai (1:24)

Ne faka‵mafa mai ne Iesu a te tāua o te talai atu. Faitau te Maleko 13:10, ko sau‵tala ei ki fesili konei:

Kaia e tāua malosi ei a te galuega talai ki te Potukau Pule?
Kaia e ma‵nako ei tatou ki “te tavini fakamaoni kae poto” ke fakatoka ne ia te galuega tenei i te lalolagi kātoa?

5. E tuku mai ne te tavini fakamaoni a fakatakitakiga

E tuku mai ne te Potukau Pule a fakatakitakiga mō Kelisiano i te lalolagi kātoa. E fakaiku aka pefea ne ia a fakatakitakiga ke tuku mai ki a tatou? Mafaufau ki mea ne fai ne te potukau pule o Kelisiano i aso mua. Faitau te Galuega 15:1, 2, ko sau‵tala ei ki fesili konei:

Se a te kinauga ne sae aka i Kelisiano mua?
Ko oi ne olo atu ki ei a Paulo, Panapa, mo nisi tino ke faka‵lei aka te kinauga?

Faitau te Galuega 15:12-18, 23-29, ko sau‵tala ei ki te fesili tenei:

A koi tuai o fai se fakaikuga, ne a mea ne fai ne te potukau pule i aso mua ke maua ei ne latou te takitakiga a te Atua ki se fakalavelave?—Onoono ki te fuaiupu 12, 15, mo te 28.

Faitau te Galuega 15:30, 31 mo te 16:4, 5, ko sau‵tala ei ki fesili konei:

Ne ‵saga atu pefea a Kelisiano i aso mua ki fakatakitakiga mai te potukau pule?
Ne fakamanuia pefea ne Ieova a te lotou faka‵logo?

Faitau te 2 Timoteo 3:16 mo te Iakopo 1:5, ko sau‵tala ei ki te fesili tenei:

E maua mai i fea ne te Potukau Pule a fakatakitakiga ke fai a fakaikuga i aso nei?

MEA E FAI MAI NE NISI TINO: “Kafai e fakalogo koe ki te Potukau Pule, ko tautali fua koe i tāgata.”

Se a te mea e fakamaoni atu ki a koe me e takitaki ne Iesu a te Potukau Pule?

MANATU AOGA

A te Potukau Pule ko “te tavini fakamaoni kae poto” telā ne fili ne Keliso. E tuku mai ne ia a fakatakitakiga mo mea‵kai faka-te-agaga ki Kelisiano i te lalolagi kātoa.