Чыыштың баштыңы — Иисус Христос (Эфесчилерге 5:23). Ол ам чонун «шынчы болгаш сарыылдыг чалчаны» таварыштыр дээрден удуртуп турар. (Номчуптуңар: Матфей 24:45.) Иисус «чалчаны» шилээш, шиитпирлер хүлээр эргени берген болганда, чалча аңаа чагыртып турар. Ол чалча кымыл база бис дээш канчаар сагыш човап турар?

1. «Шынчы болгаш сарыылдыг чалча» дээрге кымыл?

Иегова чонунга айтыышкыннарны аңгы кижилер азы бөлүк таварыштыр берип турган (Малахия 2:7; Еврейлерге 1:1). Иисустуң өлүмүнүң соонда, бир дугаар векте элчиннер болгаш удуртукчулар христиан чыышты башкарып эгелээн (Ажыл-чорудулга 15:2). Ол үлегерни эдерип, Иегованың Херечилериниң Удуртукчу чөвүлели Бурганның чонунга «аъш-чемни» берип, суртаал ажылын башкарып турар. Ол бөлүк — Иисустуң шилип каан шынчы болгаш сарыылдыг чалчазы (Матфей 24:45а). Удуртукчу чөвүлелдиң шупту кежигүннери — шилип чагдырган христианнар. Кажан черге чуртталгазы дооступ каарга, олар дээрге Иисус-биле чагырар.

2. Шынчы чалча кандыг «аъш-чем» үлеп турар?

Шынчы чалча ха-дуңмазынга аъш-чемни чогуур үезинде бээрин Иисус чугаалаан (Матфей 24:45б). Эки шынарлыг аъш-чемниң ачызында кижи каң-кадык болуру ышкаш, библейжи өөредилге биске Бурганга шынчы артарынга база Иисустуң даалгазын күүседиринге дузалаар (1 Тимофейге 4:6). Ол «аъш-чемни» биске чыыштар, шуулганнар болгаш Библияга үндезилээн ном-дептер, аудио-видеолар таварыштыр берип турар. Ол бүгү библейжи өөредилге Бурганның күзел-соруун оон-даа эки угаап-билип алырынга база Ооң өңнүү болурунга дузалап турар.

 ХАНЫ ШИНЧИЛЕҢЕР

3. Иегованың чону эки чурумнуг болур ужурлуг

Иегованың Херечилериниң ажыл-чорудулгазын Иисус Удуртукчу чөвүлел таварыштыр башкарып турар. Бирги векте ажыл-чорудулга база шак ындыг чурум-аайлыг турган. ВИДЕОНУ көрүңер.

1 Коринфичилерге 14:33, 40-ни номчааш, харыылаптыңар:

• Чону чурум-аайлыг болзун дээн Иегованың күзелин бо шүлүктер канчаар көргүскен?

4. Шынчы чалча суртаал ажылын удуртуп турар

Баштайгы христианнарга суртаалдаары — эң чугула турган. Ажыл-чорудулга 8:14, 25-ти номчааш, харыылаптыңар:

• Каяа база кажан суртаалдаарын бирги векте кым удуртуп турган?

• Өске элчиннерниң айтыышкыннарын Пётр биле Иоанн канчаар хүлээп алганыл?

Удуртукчу чөвүлелдиң эң чугула ажылы — суртаалды аайлап-башкарары. ВИДЕОНУ көрүңер.

 Иисустуң сөстеринден алырга, суртаал ажылы дыка чугула. Марк 13:10-ну номчааш, харыылаптыңар:

• Удуртукчу чөвүлел суртаал ажылынга чүге ындыг хөй кичээнгей салып турар?

• Ол ажылды бүгү делегейге организастаарынга чүге Удуртукчу чөвүлел херек?

5. Шынчы чалча айтыышкыннар берип турар

Удуртукчу чөвүлел бүгү делегейде христианнарның ажыл-чорудулгазын башкарып турар. Олар канчаар шиитпир хүлээрлер? Бирги векте удуртукчу чөвүлел канчаар шиитпир үндүрүп турганын көрүңер. Ажыл-чорудулга 15:1, 2-ни номчааш, харыылаптыңар:

• Бирги христианнарга кандыг айтырыг маргыштыг турган?

• Ол айтырыгны тодарадыр дээш, удуртукчу акылар кымдан дуза дилээн?

Ажыл-чорудулга 15:12—18, 23—29-ту номчааш, харыылаптыңар:

• Ол айтырыгга Бурганның бодалын билип аар дээш, бир дугаар векте Удуртур чөвүлел чүнү кылган? (12, 15, 28 дугаар шүлүктерни көрүңер.)

Ажыл-чорудулга 15:30, 31 биле 16:4, 5-ти номчааш, харыылаптыңар:

• Баштайгы христианнар удуртукчу чөвүлелдиң айтыышкыннарын канчаар хүлээп алган?

• Ол христианнарны дыңнангыры дээш, Иегова канчаар шаңнаан?

2 Тимофейге 3:16 биле Иаков 1:5-ти номчааш, харыылаптыңар:

• Удуртукчу чөвүлел амгы үеде шиитпирлерни канчаар хүлээп турар?

 КОЛ БОДАЛ

Удуртукчу чөвүлел — Иисустуң шилип каан «шынчы болгаш сарыылдыг чалчазы». Ол чалча бүгү делегейде христианнарга айтыышкыннарны, библейжи өөредилгени берип турар.

Катаптаашкын

• Шынчы болгаш сарыылдыг чалчаны кым шилип каан?

• Удуртукчу чөвүлел бис дээш канчаар сагыш човап турар?

• Удуртукчу чөвүлел — шынчы болгаш сарыылдыг чалча деп бүзүрээр силер бе?