Li Jesuse jaʼ jolil li ta tsobobbaile (Efesios 5:23). Li avie jaʼ tstunes li tukʼil xchiʼuk pʼijil mosoil sventa sbeiltas li yajtsʼaklomtak ti li’ oyik ta balumile (kʼelo Mateo 24:45). Jaʼ la stʼuj stuk Jesus li mosoil taje xchiʼuk jaʼ laj yakʼbe yabtel. Akʼo mi jech, li mosoile chakʼ sba ta ventainel yuʼun li Kristoe xchiʼuk chtun ta stojolal li yermanotak Kristoe. ¿Buchʼu jaʼ li mosoil taje xchiʼuk kʼuxi chchabiutik?

1. ¿Buchʼu jaʼ li tukʼil xchiʼuk pʼijil mosoile?

Li Jeovae stunesoj onoʼox junuk vinik o jayvoʼuk viniketik sventa sbeiltas li steklumale (Malakias 2:7; Ebreos 1:1). Jech kʼuchaʼal liʼe, kʼalal chamem xa ox li Jesuse, jaʼ la sbeiltasik tsobobbail li jtakboletik xchiʼuk li moletik ta Jerusalene (Echos 15:2). Li avi eke oy jayvoʼuk moletik ti jaʼ chakʼik li veʼlil ta mantale xchiʼuk jaʼ tsbeiltasik li cholmantale, taje Jtsop Jbeiltasvanej yuʼun Stestigotak Jeova sbiik. Taje jaʼ li tukʼil xchiʼuk pʼijil mosoil ti akʼbat yabtelik yuʼun Jesuse (Mateo 24:45 sbavokʼal). Skotol li buchʼutik chtunik ta Jtsop Jbeiltasvaneje tʼujbilik ta chʼul espiritu xchiʼuk tsmalaik ti xkʼot yorail sventa jmoj x˗ajvalilajik xchiʼuk Kristo li ta vinajele.

2. ¿Kʼuxi chakʼ jveʼeltik ta mantal li tukʼil mosoile?

Li Jesuse jaʼ yakʼojbe sbain li tukʼil mosoil ti ta yorailuk noʼox xakʼbe sveʼel ta mantal li yan yajtsʼaklomtak Jesuse (Mateo 24:45 xchaʼvokʼal). Jech kʼuchaʼal ti chakʼ kiptik kʼalal chijveʼutike, jaʼ jech li veʼlil ta mantal ek ti te lokʼem ta Skʼop Diose, yuʼun chakʼ kiptik sventa tukʼ xkakʼ jbatik ta stojolal Jeova xchiʼuk ti spasuk kuʼuntik li abtelal yakʼoj jbaintik Jesuse (1 Timoteo 4:6). Li veʼlil ta mantal taje te ta jtatik ta tsobajeletik, ta asambleaetik, ta vunetik xchiʼuk ta videoetike. Jaʼ tskoltautik sventa jnaʼtik li kʼusi tskʼanbutik Jeova xchiʼuk ti masuk to lek xkil jbatik xchiʼuke.

 JCHANTIK TO BATEL MAS

3. Skʼan lek chapal li steklumal Jeovae

Li Jesuse jaʼ la sbeiltas li jchʼunolajeletik ta voʼnee. Jaʼ jech li avi eke jaʼ tsbeiltas li Jtsop Jbeiltasvanej ti jaʼ oy ta sbaik xchapanel li kʼusitik tspasik li stestigotak Jeovae. Kʼelik li VIDEOE.

Kʼelik 1 Korintios 14:33, 40 xchiʼuk albeik skʼoplal li sjakʼobiltak liʼe:

• Jech kʼuchaʼal chal li versikuloetik liʼe, ¿mi oy ta yoʼonton Jeova ti lekuk chapal li stestigotake? ¿Kʼu yuʼun ti jech chavale?

4. Li tukʼil mosoile jaʼ chchapan ti kʼu yelan ta jcholtik mantale

Li jchʼunolajeletik ta voʼnee toj tsots skʼoplal laj yilik li xcholel mantale. Kʼelik Echos 8:14, 25 xchiʼuk albeik skʼoplal li sjakʼobiltak liʼe:

• ¿Buchʼutik la sbeiltasik cholmantal li ta voʼnee?

• ¿Kʼusi la spasik Pedro xchiʼuk Juan kʼalal albatik xa ox yuʼun yan jtakboletik li kʼusi skʼan spasike?

Li kʼusi mas tsots skʼoplal tspas li Jtsop Jbeiltasvaneje jaʼ ti chchapan ti kʼu yelan ta jcholtik mantale. Kʼelik li VIDEOE.

 Li Jesuse laj yal ti toj tsots skʼoplal li cholmantale. Kʼelik Markos 13:10 xchiʼuk albeik skʼoplal li sjakʼobiltak liʼe:

• ¿Kʼu yuʼun toj tsots skʼoplal chil cholmantal li Jtsop Jbeiltasvaneje?

• ¿Kʼu yuʼun skʼan jaʼuk xchapan ti kʼu yelan chichʼ cholel mantal ta spʼejel balumil li tukʼil xchiʼuk pʼijil mosoile?

5. Tsbeiltasutik li tukʼil mosoile

Li Jtsop Jbeiltasvaneje tsbeiltas skotol li yajtsʼaklomtak Kristo ta spʼejel balumile. ¿Kʼuxi tsnaʼik kʼusi mantaletik chakʼbutik? Kʼelavil kʼusi la spas li jtsop jbeiltasvanej ta baʼyel sigloe. Kʼelik Echos 15:1, 2 xchiʼuk albeik skʼoplal li sjakʼobiltak liʼe:

• ¿Kʼu yuʼun lik skʼopik junantik jchʼunolajeletik li ta baʼyel sigloe?

• ¿Buchʼutik ay skʼoponik li Pablo, Bernabe xchiʼuk yan jchʼunolajeletik sventa xchapaj li skʼopike?

Kʼelik Echos 15:12-18 xchiʼuk 23-29 xchiʼuk albeik skʼoplal li sjakʼobil liʼe:

• ¿Kʼusi baʼyel la spas li jtsop jbeiltasvanej ta baʼyel siglo sventa xchapaj yuʼunik li kʼope? (Kʼelik li versikulo 12, 15 xchiʼuk 28).

Kʼelik Echos 15:30, 31 xchiʼuk 16:4, 5 xchiʼuk albeik skʼoplal li sjakʼobiltak liʼe:

• ¿Kʼusi la spasik li jchʼunolajeletik ta voʼne kʼalal laj yaʼiik li kʼusi kʼot ta nopel yuʼun li jtsop jbeiltasvaneje?

• ¿Kʼuxi vinaj ti akʼbatik bendision yuʼun Jeova ta skoj ti la xchʼunik mantale?

Kʼelik 2 Timoteo 3:16 xchiʼuk Santiago 1:5 xchiʼuk albeik skʼoplal li sjakʼobil liʼe:

• Li avi eke, ¿kʼusi tspas li Jtsop Jbeiltasvanej sventa snaʼ li kʼusi skʼan spase?

 ¿KʼUSI LA ACHAN?

Li Jtsop Jbeiltasvaneje jaʼ li tukʼil xchiʼuk pʼijil mosoil ti la stʼuj Kristoe. Li mosoile jaʼ tsbeiltas xchiʼuk jaʼ chakʼbe sveʼel ta mantal skotol li yajtsʼaklomtak Kristo ta spʼejel balumile.

Svulesobil ta joltik

• ¿Buchʼu la stʼuj li tukʼil xchiʼuk pʼijil mosoile?

• ¿Kʼuxi chchabiutik li Jtsop Jbeiltasvaneje?

• ¿Mi achʼunoj ti jaʼ tukʼil xchiʼuk pʼijil mosoil li Jtsop Jbeiltasvaneje?