Мәсиһ әгәшкүчилири җамаитиниң беши Әйса Мәсиһтур (Әфәсликләргә 5:23). Бүгүнки күндә Әйса асманда туруп, садиқ вә әқил-парасәтлик қул арқилиқ йәр йүзидики әгәшкүчилирини йетәкләйду (Мәтта 24:45ни оқуң). Әйса Мәсиһ өзи бу қулни тәйинләп, униңға бәзи қарарларни чиқириш һоқуқини бәргән. Амма бу қул чоқум Мәсиһкә бойсунуши вә униң қериндашлириға хизмәт қилиши керәк. Бу қул ким? У бизгә қандақ ғәмхорлуқ қилиду?

1. Садиқ вә әқил-парасәтлик қул ким?

Йәһва Худа Өз хәлқигә йол-йоруқ бериш үчүн һәрдайим бир кишини яки бир топ кишиләрни ишлитип кәлгән (Малаки 2:7; Ибранийларға 1:1). Әйса Мәсиһ өлгәндин кейин, Йерусалимдики әлчиләр вә ақсақаллар Мәсиһ әгәшкүчилири җамаитигә йолбашчилиқ қилиш мәсъулийитини өзигә алған (Әлчиләр 15:2). Худди шуниңдәк, бүгүнки күндиму кичик бир топ ақсақаллар җамаәтни роһий озуқлуқ билән тәминләп, вәз ейтиш хизмитигә йетәкчилик қилиду. Бу топ Йәһва гувачилириниң Рәһбәрлик кеңиши дәп аталған болуп, Әйса тәйинлигән садиқ вә әқил-парасәтлик қулдур (Мәтта 24:45). Рәһбәрлик кеңәшниң барлиқ әзалири муқәддәс роһ билән майланған етиқатчилар болуп, йәр йүзидики һаяти ахирлашқандин кейин асмандики Падишалиққа қошулушни үмүт билән күтиватиду.

2. Садиқ қул қандақ роһий озуқлуқни тәминләйду?

Әйса Мәсиһ өз әгәшкүчилиригә вақти-вақтида роһий озуқлуқни тәминләшкә садиқ қулни тәйинлигән (Мәтта 24:45). Адәттә, йемәк-ичмәкликләр җисманий җәһәттин ярдәм бериду. Шуниңға охшаш, роһий озуқлуқ, йәни Худаниң Сөзидин кәлгән йол-йоруқ, Униңға садиқ болуп қелишимизға вә Әйса тапшурған вәзипини орунлашқа керәклик күч-қувәтни бериду (Тимотийға 1-хәт 4:6). Биз әшу роһий озуқлуқни җамаәт жиғилишлири, бир күнлүк яки үч күнлүк конгресслар, Муқәддәс китапқа асасланған китап-журналлар вә видеолар арқилиқ қобул қилимиз. Булар Худаниң ирадисини чүшинишимизгә вә Униң билән болған достлуғимизни күчәйтишимизгә ярдәм бериду.

 ЧОҢҚУРИРАҚ ҚЕЗИҢ

3. Йәһваниң хәлқи тәшкилләнгән болуши керәк

Рәһбәрлик кеңәш Йәһва гувачилириниң хизмитини Әйса Мәсиһниң көрсәтмиси бойичә тәшкилләйду. Биринчи әсирдики Мәсиһ әгәшкүчилириму шундақ тәшкилләнгән еди. ВИДЕОНИ көрүң.

Коринтлиқларға 1-хәт 14:33, 40ни оқуң, кейин төвәндики соалға җавап бериң:

• Бу айәтләр Йәһва Худа Өз хәлқиниң тәшкиллинишини халайдиғанлиғини қандақ көрситиду?

4. Садиқ қул вәз хизмитимизни тәшкилләйду

Вәз ейтиш биринчи әсирдики Әйсаниң әгәшкүчилири қилған әң муһим хизмәт еди. Әлчиләр 8:14, 25ни оқуң, кейин төвәндики соалларға җавап бериң:

• Биринчи әсирдики Әйсаниң әгәшкүчилири арисида вәз хизмитигә ким йетәкчилик қилған?

• Петрус билән Йоһан башқа әлчиләрниң көрсәтмилиригә қандақ инкас қайтурған?

Вәз хизмити Рәһбәрлик кеңәш тәшкиллигән әң муһим хизмәт. ВИДЕОНИ көрүң.

 Әйса Мәсиһ вәз хизмәтниң интайин муһимлиғини тәкитлигән. Марк 13:10ни оқуң, кейин төвәндики соалларға җавап бериң:

• Немә үчүн вәз паалийити Рәһбәрлик кеңәш үчүн бәк муһим?

• Дунияниң һәрқайси җайлиридики хизмәтни тәшкилләштә немә үчүн садиқ вә әқил-парасәтлик қулға муһтаҗ?

5. Садиқ қул көрсәтмиләрни бериду

Рәһбәрлик кеңәш дунияниң һәрқайси җайлиридики Мәсиһ әгәшкүчилиригә көрсәтмиләрни бериду. Улар қандақ көрсәтмиләрни беришни қарар қилиш үчүн немә қилиду? Келиң, биринчи әсирдики рәһбәрлик кеңәшниң немә қилғанлиғини көрүп бақайли. Әлчиләр 15:1, 2ни оқуң, кейин төвәндики соалларға җавап бериң:

• Әйсаниң дәсләпки шагиртлири қайси мәсилидә бирликкә келәлмигән?

• Бу мәсилини һәл қилиш үчүн Паул, Барнаба вә башқилар кимләрдин ярдәм сориған?

Әлчиләр 15:12—18, 23—29ни оқуң, кейин төвәндики соалға җавап бериң:

• Бу мәсилә үстидә қарар чиқириштин бурун, биринчи әсирдики рәһбәрлик кеңәш Худаниң йол-йоруқ сорап немә иш қилған? (12, 15 вә 28-айәтләрни көрүң.)

Әлчиләр 15:30, 31 вә 16:4, 5ни оқуң, кейин төвәндики соалларға җавап бериң:

• Биринчи әсирдики Әйсаниң әгәшкүчилири рәһбәрлик кеңәш бәргән көрсәтмиләргә қандақ инкас қайтурған?

• Йәһва Худа уларни итаәтчанлиғи үчүн қандақ бәрикәтлигән?

Тимотийға 2-хәт 3:16 вә Яқуп 1:5ни оқуң, кейин төвәндики соалға җавап бериң:

• Бүгүнки күндә Рәһбәрлик кеңәш қарар чиқарғанда, көрсәтмиләрни қәйәрдин издәйду?

 ХУЛАСӘ

Рәһбәрлик кеңәш Әйса Мәсиһ тәйинлигән садиқ вә әқил-парасәтлик қул. У дунияниң һәрқайси җайлиридики Мәсиһ әгәшкүчилиригә көрсәтмиләрни вә роһий озуқлуқларни тәминләп бериду.

Тәкрарлаш

• Ким садиқ вә әқил-парасәтлик қулни тәйинлигән?

• Рәһбәрлик кеңәш бизгә қандақ ғәмхорлуқ қилиду?

• Рәһбәрлик кеңәшниң садиқ вә әқил-парасәтлик қул екәнлигигә ишинәмсиз?