Yesuusi Kiristtaane galchchawu Huuphe woy Kaalettiyaagaa. (Efisoona 5:23) Ha wodiyan, Yesuusi saluwan uttidi, bana kaalliya saˈan deˈiyaageeta ‘ammanettida wozannaama ashkkaraa’ baggaara kaalettees. (Maatiyoosa 24:45 nabbaba.) He ashkkaraa sunttidaynne issi issibaa kuuyanaadan aawatettaa immiday Yesuusa. Gidikkokka, he ashkkaray Kiristtoosawu azazettananne A ishatussi haggaazana bessees. He ashkkaray oonee? He ashkkaray nuna aybin maaddii?

1. ‘Ammanettida wozannaama ashkkaray’ oonee?

Yihooway ba asaa awudekka issi attuma asa woy amarida attuma asatu baggaara kaalettees. (Milkkiyaasa 2:7; Ibraawe 1:1) Yesuusi hayqqi simmin, kiitettidaageetinne Yerusalaamen deˈiya cimati kaalettidosona. (Oosuwaa 15:2) Hegaadankka, ha wodiyan amarida cimati issippe kaalettoosona. He citay Yihoowa Markkatu Oosuwaa Kaalettiya Citaa geetettees. He citay ayyaanaa qumaa giigisseesinne mishiraachchuwaa yootiyo oosuwaa kaalettees. He citay ‘godaa [Yesuusi] sunttido ammanettida wozannaama ashkkara.’ (Maatiyoosa 24:45) Oosuwaa Kaalettiya Citaa yarati ubbay saˈaa deˈuwaa poliyo wode Kiristtoosaara A Kawotettan saluwan haaranawu laamotan naagoosona. Eti ayyaanan tiyettida Kiristtaaneta.

2. Ammanettida ashkkaray ayyaanaaban ay mala qumaa giigissii?

Ammanettida wozannaama ashkkaray “[ba mala Kiristtaanetuyyo] qumaa koshshiyo wodiyan” immanaagaa Yesuusi yootiis. (Maatiyoosa 24:45) Nuuni miyo qumay nu bollay minonne payya gidanaadan maaddiyoogaadan, Xoossaa qaalaappe tamaariyo ayyaanaa qumaykka nuuni Yihoowayyo ammanettiyaageeta gidanawunne Yesuusi immido oosuwaa oottanawu wolqqaa immees. (1 Ximootiyoosa 4:6) He ayyaanaa qumaa, Xoossay koyiyoobaa eranawunne aara dabbotaa minttanawu nuna maaddiya galchchaa shiiqotun, gita shiiqotuuninne xuufetun demmoos.

 LOYTTA AKEEKA

3. Yihoowa asay hashetidi oottana bessees

Yesuusi kaalettin, Oosuwaa Kaalettiya Citay Yihoowa Markkatu oosoy maara oosettanaadan maaddees. Koyro xeetu layttan deˈida Kiristtaanetakka Yesuusi hegaadan kaalettiis. BIIDUWAA beˈite.

Koyro Qoronttoosa 14:33, 40 nabbabite; yaatidi ha oyshaa tobbite:

• Yihooway ba asay hashetidi oottanaadan koyiyoogaa ha xiqiseti waati qonccissiyoonaa?

4. Ammanettida ashkkaray sabbakiyo oosuwan nuna kaalettees

Beni Kiristtaaneti oottido keehi koshshiya oosoy mishiraachchuwaa yootiyoogaa. Oosuwaa 8:14, 25 nabbabite; yaatidi ha oyshata tobbite:

• Beni Kiristtaaneti mishiraachchuwaa waati yootanaakko eta giddon ogiyaa bessiday oonee?

• PHeexiroosinne Yohaannisi bantta mala kiitettidaageeti kaalettin waatidonaa?

Oosuwaa Kaalettiya Citay kaalettiyo keehi koshshiya oosoy mishiraachchuwaa yootiyoogaa. BIIDUWAA beˈite.

 Mishiraachchuwaa yootiyoogee keehi koshshiyoogaa Yesuusi qonccissiis. Marqqoosa 13:10 nabbabite; yaatidi ha oyshata tobbite:

• Oosuwaa Kaalettiya Citay mishiraachchuwaa yootiyoogaa waanna ooso oottidi xeelliyoy aybissee?

• He oosuwaa kumetta saˈan kaalettanawu nuussi ‘ammanettida wozannaama ashkkaray’ koshshiyoy aybissee?

5. Ammanettida ashkkaray ogiyaa bessees

Oosuwaa Kaalettiya Citay kumetta saˈan deˈiya Kiristtaaneta ogiyaa bessees. Ay kaaleto yootanaakko waati kuuyii? Beni wode Kiristtaanetu oosuwaa kaalettiya citay hegaa waati kuuyidaakko akeeka. Oosuwaa 15:1, 2 nabbabite; yaatidi ha oyshata tobbite:

• Beni Kiristtaanetuppe amaridaageeti maayettibeennabay aybee?

• PHawuloosi, Barnnaabaasinne harati maaduwaa oona oychchidonaa?

Oosuwaa 15:12-18, 23-29 nabbabite; yaatidi ha oyshaa tobbite:

• Beni wode oosuwaa kaalettiya citay he allaalliyaabaa kuuyanaappe kasetidi, Xoossay kaalettanaadan ay oottidee?—Paydo 12, 15nne 28 xeella.

Oosuwaa 15:30, 31nne 16:4, 5 nabbabite; yaatidi ha oyshata tobbite:

• Beni kiristtaaneti oosuwaa kaalettiya citaappe kaaletuwaa siyidi ay oottidonaa?

• Eti azazettido gishshawu Yihooway eta waati anjjidee?

Naaˈˈantto Ximootiyoosa 3:16​nne Yaaqooba 1:5 nabbabite; yaatidi ha oyshaa tobbite:

• Ha wodiyan Oosuwaa Kaalettiya Citay kuuyiyooban kaaletuwaa oona oychchii?

 AY AKEEKADII?

Oosuwaa Kaalettiya Citay Kiristtoosi sunttido ‘ammanettida wozannaama ashkkaraa.’ He ashkkaray kumetta saˈan deˈiya Kiristtaanetussi ogiyaa besseesinne ayyaanaa qumaa immees.

Zaaretuwaa

• ‘Ammanettida wozannaama ashkkaraa’ sunttiday oonee?

• Oosuwaa Kaalettiya Citay nuna aybin maaddii?

• Oosuwaa Kaalettiya Citay ‘ammanettida wozannaama ashkkaraa’ gidiyoogaa neeni ammanay?