Hi Jesus an Ulo han Kristiano nga kongregasyon. (Efeso 5:23) Yana, tikang ha iya posisyon ha langit, ginpapangunahan ni Jesus an iya mga sumurunod ha tuna pinaagi han “matinumanon ngan maaramon nga uripon.” (Basaha an Mateo 24:45.) Hi Jesus mismo an nagtoka hito nga “uripon” ngan may iginhatag ha iya nga awtoridad, pero magpapabilin hiya nga uripon han Kristo ngan magsiserbi han kabugtoan han Kristo. Hin-o ito nga uripon? Paonan-o kita gin-aataman han uripon?

1. Hin-o an “matinumanon ngan maaramon nga uripon”?

Hi Jehova pirme nagamit hin tawo o hin gutiay nga grupo han kalalakin-an basi maghatag hin instruksyon ha iya katawohan. (Malakias 2:7; Hebreo 1:1) Kamatay ni Jesus, an mga apostol ngan mga tigurang ha Jerusalem amo an nanguna. (Buhat 15:2) Ha pagsubad hito, yana usa nga gutiay nga grupo han mga tigurang​—an Nagmamando nga Lawas han mga Saksi ni Jehova​—an nagtatagana han espirituwal nga pagkaon ngan nangunguna han pagsangyaw nga buruhaton. Ini nga grupo amo an “matinumanon ngan maaramon nga uripon nga gintokahan [ni Jesus].” (Mateo 24:45a) An ngatanan nga membro han Nagmamando nga Lawas mga Kristiano nga dinihogan pinaagi han espiritu, nga naglalaom nga magmando kaupod han Kristo ha iya Ginhadian ha langit kon matapos na an ira kinabuhi ha tuna.

2. Ano nga espirituwal nga pagkaon an igintatagana han matinumanon nga uripon?

Hi Jesus nagsiring nga an matinumanon nga uripon an ‘maghahatag ha ira mga igkasi-Kristiano han ira pagkaon ha husto nga panahon.’ (Mateo 24:45b) Sugad la nga an ginkakaon naton nga pagkaon nakakabulig ha aton nga magpabilin nga makusog ngan mahimsog ha pisikal, an espirituwal nga pagkaon​—an instruksyon tikang ha Pulong han Dios​—naghahatag ha aton han kusog nga aton ginkikinahanglan basi magpabilin kita nga maunungon kan Jehova ngan mahimo naton an buruhaton nga gintoka ni Jesus ha aton. (1 Timoteo 4:6) Nakakarawat naton ito nga espirituwal nga pagkaon pinaagi han mga katirok, asembleya, ngan kombensyon, sugad man pinaagi han mga publikasyon nga basado ha Biblia ngan mga video nga nakakabulig ha aton nga masabtan an kaburut-on han Dios ngan basi maparig-on an aton pakigsangkay ha iya.

 DUGANG NGA USISAHA

3. An katawohan ni Jehova kinahanglan magin organisado

Ilarom han paggiya ni Jesus, gin-oorganisar han Nagmamando nga Lawas an buruhaton han mga Saksi ni Jehova. Gin-giyahan ni Jesus an siyahan nga mga Kristiano ha sugad nga paagi. I-play an VIDEO.

Basaha an 1 Corinto 14:​33, 40, katapos, hisguti niyo ini nga pakiana:

• Paonan-o ini nga mga bersikulo nagpapakita nga karuyag ni Jehova nga magin organisado an iya mga Saksi?

4. An matinumanon nga uripon an nag-oorganisar han aton pagsangyaw nga buruhaton

An pagsangyaw amo an pinakaimportante nga buruhaton han siyahan nga mga Kristiano. Basaha an Buhat 8:​14, 25, katapos, hisguti niyo ini nga mga pakiana:

• Ha panahon han siyahan nga mga Kristiano, hin-o an naggigiya ha pagsangyaw nga buruhaton?

• Ano an ginhimo nira Pedro ngan Juan han gintagan hira hin instruksyon han ira mga igkasi-apostol?

An pagsangyaw an pinakaimportante nga buruhaton nga gin-oorganisar han Nagmamando nga Lawas. I-play an VIDEO.

 Ginpabug-atan ni Jesus kon ano kaimportante an pagsangyaw. Basaha an Marcos 13:​10, katapos, hisguti niyo ini nga mga pakiana:

• Kay ano nga an pagsangyaw nga buruhaton importante hinduro ha Nagmamando nga Lawas?

• Kay ano nga kinahanglan naton an “matinumanon ngan maaramon nga uripon” ha pag-organisar hini nga buruhaton ha bug-os nga kalibotan?

5. An matinumanon nga uripon naghahatag hin instruksyon

An Nagmamando nga Lawas naghahatag hin instruksyon para ha mga Kristiano ha bug-os nga kalibotan. Paonan-o ito nagdidesisyon kon ano nga instruksyon an ihahatag? Usisaha kon paonan-o ito ginhimo han nagmamando nga lawas han siyahan nga mga Kristiano. Basaha an Buhat 15:​1, 2, katapos, hisguti niyo ini nga mga pakiana:

• Ano nga isyu an nagin hinungdan nga waray magkauruyon an pipira ha siyahan nga mga Kristiano?

• Kan kanay nangaro hin bulig hira Pablo, Bernabe, ngan an iba pa basi sulbaron ito nga isyu?

Basaha an Buhat 15:​12-18, 23-29, katapos, hisguti niyo ini nga pakiana:

• Antes maghimo hin desisyon, ano an ginbuhat han siyahan nga nagmamando nga lawas basi mangaro han giya han Dios mahitungod hito nga butang?​—Kitaa an bersikulo 12, 15, ngan 28.

Basaha an Buhat 15:​30, 31 ngan 16:​4, 5, katapos, hisguti niyo ini nga mga pakiana:

• Ano an nagin reaksyon han siyahan nga mga Kristiano ha instruksyon nga ginhatag han nagmamando nga lawas?

• Paonan-o ginbendisyonan ni Jehova an ira pagkamasinugtanon?

Basaha an 2 Timoteo 3:16 ngan Santiago 1:​5, katapos, hisguti niyo ini nga pakiana:

• Diin namimiling hin giya an Nagmamando nga Lawas kon naghihimo ito hin mga desisyon yana?

 SUMARYO

An Nagmamando nga Lawas amo an “matinumanon ngan maaramon nga uripon” nga gintokahan han Kristo. Naghahatag ito hin mga instruksyon ngan espirituwal nga pagkaon ha mga Kristiano ha bug-os nga tuna.

Repaso

• Hin-o an nagtoka han “matinumanon ngan maaramon nga uripon”?

• Paonan-o kita gin-aataman han Nagmamando nga Lawas?

• Natoo ka ba nga an Nagmamando nga Lawas amo an “matinumanon ngan maaramon nga uripon”?