KAPITE 54
“Te Tagata Faifekau Agatonu Mo Poto”
ʼE ko Sesu te Pule ʼo te kokelekasio. (Efeso 5:23) Ia ʼaho nei, ʼe takitaki e Sesu mai te lagi ʼana tisipulo ʼae ʼi te kele ʼaki “te tagata faifekau agatonu mo poto.” (Lau ia Mateo 24:45.) Neʼe ko Sesu totonu ʼae neʼe ina fakanofo te tagata faifekau ʼaia. Koia ʼe ina maʼu he faʼahiga pule kae ʼe ko te “tagata faifekau” ʼa Kilisito pea ʼe ina tauhi te ʼu tehina ʼo Kilisito. Ko ai te tagata faifekau ʼaia? Pea ʼe tokaga feafeaʼi kia tatou?
1. Ko ai “te tagata faifekau agatonu mo poto”?
Neʼe fakaʼaogaʼi tuʼumaʼu e Sehova he tagata peʼe ko he kiʼi kutuga tagata moʼo takitaki tana hahaʼi. (Malakia 2:7; Hepeleo 1:1) Hili te mate ʼa Sesu, neʼe ko te kau apositolo pea mo te kau tagata ʼafeā ʼo Selusalemi ʼae neʼe natou takitaki te kokelekasio. (Gaue 15:2) ʼO toe feia pe ia ʼaho nei, ʼe foaki te meʼa kai fakalaumalie pea mo takitaki te gaue faifakamafola e he kiʼi kutuga ko ni kau tagata ʼafeā. Ko natou ʼaia e ko te Kolesi Pule ʼa te kau Fakamoʼoni ʼa Sehova. Ko te kiʼi kutuga ʼaia neʼe ko “te tagata faifekau agatonu mo poto ʼae neʼe fakanofo e [Sesu].” (Mateo 24:45, ʼuluaki koga) Ko natou fuli ʼae ʼe kau ki te Kolesi Pule ʼe ko he kau Kilisitiano neʼe fakanofo ʼaki te laumalie maʼoniʼoni. ʼE natou fiafia ʼi tanatou iloʼi ʼae ʼe natou kaugā hau anai mo Kilisito ʼi tona Puleʼaga ʼi selo moka natou mamate.
2. Kotea te meʼa kai fakalaumalie ʼae ʼe foaki e te tagata faifekau?
Neʼe ui e Sesu ʼe ‘foaki anai e te tagata faifekau agatonu mo poto ki ʼana [tisipulo] ia tanatou meʼa kai ʼi tona temi totonu.’ (Mateo 24:45, lua koga) ʼE tou maʼu he malohi ʼi te meʼa kai ʼae ʼe tou kai pea mo maʼu he maʼuli malolo ʼe lelei. Pea ʼe toe feia pe mo te meʼa kai fakalaumalie, ia te ʼu akonaki ʼae ʼe fakatafito ki te Folafola ʼa te ʼAtua. ʼE tou maʼu ai te malohi ʼae ʼe ʼaoga ke tou nofo agatonu kia Sehova pea mo fakahoko te gaue ʼae neʼe tuku mai e Sesu ke tou fai. (1 Timoteo 4:6) ʼE tou maʼu te meʼa kai fakalaumalie ʼaia ʼi ʼatatou fono, mo ʼatatou fakatahi lalahi ʼo feia mo ʼatatou tohi mo ʼata viteo ʼae ʼe fakatafito ki te Tohi-Tapu. ʼE tokoni mai te meʼa kai fakalaumalie ʼaia ke tou mahino ki te finegalo ʼo te ʼAtua pea mo fakamalohiʼi ai ʼatatou felogoi mo ia.
TA FAKALOLOTO
Ta vakaʼi pe koʼe ʼe ʼaoga kia tatou ia “te tagata faifekau agatonu mo poto.”
ʼE foaki e te Kolesi Pule te meʼa kai fakalaumalie, mo he ʼu fakatotonu, pea mo he ʼu tokoni ʼaoga ki te kau Fakamoʼoni ʼa Sehova ʼi te kele katoa
3. ʼE tonu ke fakatuʼutuʼu lelei te hahaʼi ʼa Sehova
ʼE fakalogo te Kolesi Pule ki te takitaki ʼa Sesu pea ʼe natou fakatuʼutuʼu te ʼu gaue ʼa te kau Fakamoʼoni ʼa Sehova. ʼE tatau pe mo te aluʼaga ʼae neʼe hoko ʼi te temi ʼo te kau ʼuluaki Kilisitiano. Vakaʼi te ʼATA VITEO.
Lau ia 1 Kolonito 14:33, 40, pea fai te fehuʼi ʼaeni:
-
ʼE ha feafeaʼi ʼi te ʼu vaega ʼaeni ʼe loto e Sehova ke fakatuʼutuʼu lelei tana hahaʼi?
4. ʼE fakatuʼutuʼu e te tagata faifekau agatonu mo poto ia te faifakamafola
Neʼe maʼuhiga tafito ia te gaue faifakamafola ki te kau ʼuluaki Kilisitiano. Lau ia Gaue 8:14, 25, pea fai te ʼu fehuʼi ʼaeni:
-
Ko ai neʼe ina takitaki te gaue faifakamafola ʼi te kau ʼuluaki Kilisitiano?
-
Kotea ʼae neʼe fai e Petelo mo Soane ʼi te foaki age e ʼihi apositolo te ʼu fakatotonu?
Ko te faifakamafola ʼe ko he gaue maʼuhiga ʼaupito ia. ʼE fakatuʼutuʼu ia e te Kolesi Pule. Vakaʼi te ʼATA VITEO.
Maleko 13:10, pea fai te ʼu fehuʼi ʼaeni:
Neʼe ui e Sesu ʼe maʼuhiga ʼaupito ia te faifakamafola. Lau ia-
He koʼe ʼe maʼuhiga te gaue faifakamafola ki te Kolesi Pule?
-
He koʼe ʼe tonu ke fakatuʼutuʼu e “te tagata faifekau agatonu mo poto” ia te gaue fakamalamanei ʼaia?
5. ʼE foaki e te tagata faifekau agatonu mo poto ia he ʼu fakatotonu
ʼE foaki e te Kolesi Pule he ʼu fakatotonu ki te kau Kilisitiano ʼae ʼi te malamanei katoa. ʼE ina toʼo feafeaʼi ʼana tonu? Tou vakaʼi pe neʼe fai feafeaʼi e te Kolesi Pule ʼo te kau ʼuluaki Kilisitiano te faʼahi ʼaia. Lau ia Gaue 15:1, 2, pea fai te ʼu fehuʼi ʼaeni:
-
Kotea te aluʼaga ʼae neʼe mole manatu tahi ai ia te kau ʼuluaki Kilisitiano?
-
Ko ai ʼae neʼe olo ki ai ia Paulo mo Palenapa pea mo ʼihi ke natou maʼu ai he puleʼaki?
Lau ia Gaue 15:12-18, 23-29, pea fai te fehuʼi ʼaeni:
-
Kotea ʼae neʼe fai e te Kolesi Pule ke takitaki ai e te ʼAtua ia te tonu ʼae neʼe ina fai?—Vakaʼi te vaega 12, 15, mo 28.
Lau ia Gaue 15:30, 31 mo 16:4, 5, pea fai te ʼu fehuʼi ʼaeni:
-
Kotea ʼae neʼe fai e te kau ʼuluaki Kilisitiano ʼi te foaki age e te Kolesi Pule he ʼu fakatotonu?
-
Neʼe tapuakinaʼi feafeaʼi e Sehova ia tanatou fakalogo?
Lau ia 2 Timoteo 3:16 mo Sakopo 1:5, pea fai te fehuʼi ʼaeni:
-
Ia ʼaho nei, kotea ʼae ʼe fai e te Kolesi Pule moka ina toʼo he ʼu tonu?
ʼE UI E ʼIHI: “Kapau ʼe ke fakalogo ki te Kolesi Pule ʼe hage pe ko hau fakalogo ki te tagata.”
-
Kotea ʼe ina fakamoʼoni atu ʼe takitaki ia te Kolesi Pule e Sesu?
MANATU TAFITO
Ko te Kolesi Pule ʼe ko “te tagata faifekau agatonu mo poto” ʼae neʼe fakanofo e Kilisito. ʼE ina foaki he ʼu fakatotonu mo te meʼa kai fakalaumalie ki te kau Kilisitiano ʼae ʼi te kele katoa.
Fehuʼi Fakamanatu
-
Ko ai neʼe ina fakanofo ia “te tagata faifekau agatonu mo poto”?
-
ʼE tokaga lelei feafeaʼi ia te Kolesi Pule kia tatou?
-
ʼE ke tui koa ko te Kolesi Pule ʼe ko “te tagata faifekau agatonu mo poto”?
TE TAHI ʼU MANATU
ʼE fakatuʼutuʼu feafeaʼi te Kolesi Pule?
“Kotea Ia Te Kolesi Pule ʼa Te Kau Fakamoʼoni ʼa Sehova?” (Alatike ʼi te jw.org)
ʼE tokaga feafeaʼi ia te Kolesi Pule ke ina foaki he meʼa kai fakalaumalie moʼoni?
Te Ta ʼo He ʼu Tohi ʼe Fakaha Ai Ni Manatu ʼe Totonu Mo Moʼoni (17:18)
Te meʼa ʼae ʼe logoʼi e natou ʼae ʼe kau ʼi te Kolesi Pule ʼo ʼuhiga mo te gaue ʼae neʼe tuku age e Sesu.
ʼE ha feafeaʼi ʼi ʼatatou fono mo ʼatatou fakatahi lahi ʼe takitaki e Sehova ia te Kolesi Pule?