Jesosy Lohany fiangonan̈a. (Efesianina 5:23) Baka andan̈itry an̈y Jesosy mampiasa “panompo atokisan̈a ndreky mahadiniky raha” mitariky iro pianatranany ambony tany eto. (Vakia Matio 24:45.) Jesosy nifidy “panompo” io, ke nan̈amia fahifan̈a sasany izio, fa panompo io mbala mila man̈araka volan̈any Kristy ndreky mikarakara iro rahalahiny Kristy aby io fo. Azovy ma panompo io? Akory ataonizio mikarakara atsika?

1. Azovy ma “panompo atokisan̈a ndreky mahadiniky raha”?

Letrizay Jehovah efa mampiasa lelahy vitsivitsy hitariky olonany fo. (Malakia 2:7; Hebreo 1:1) Jesosy koa fa naty, apostoly ndreky iro antipan̈ahy ta Jerosalema nirahiny nitariky taminy asa fitorian̈a. (Asan’ny Apostoly 15:2) Karaha zen̈y koa izioty. Misy antipan̈ahy voahosotro vitsivitsy mahaforon̈o Filankevipitantan̈any Vavolombelon̈o Jehovah. Filankevipitantan̈ana io man̈amia hanin̈y arapan̈ahy ndreky mitariky aminy asa fitorian̈a. Iro antipan̈ahy vitsivitsy io “panompo atokisan̈a ndreky mahadiniky raha nirahiny [Jesosy].” (Matio 24:45a) Iro jiaby an̈isany Filankevipitantan̈ana io Kristianin̈y voahosotrony fan̈ahy masin̈y aby. Man̈antena hiaraka amy Kristy amy Fanjakan̈anany andan̈itry an̈y iro, izikoa fa tapitry fiain̈anandro ambony tany eto.

2. Ino ma hanin̈y arapan̈ahy amiany panompo atokisan̈a io?

Jesosy nivolan̈a fa panompo atokisan̈a io ‘han̈amia hanin̈y iro [Kristianin̈y namandro] amy fotoan̈a mety.’ (Matio 24:45b) Matanjaka ndreky salama vatan̈a fo atsika, izikoa ampy hanin̈y. Iro hanin̈y arapan̈ahy azontsika aby io koa han̈ampy atsika tsy hivadiky amy Jehovah ndreky han̈ano asa nankin̈iny Jesosy amintsika. (1 Timoty 4:6) Mahazo hanin̈y arapan̈ahy atsika amy fivorian̈a, fivoriambeny faritry, fivoriambeny vondroparitry, iro boky ndreky gazety, baka io iro video aby io. Iro io man̈ampy atsika hahay ino raha tiany Jehovah hataontsika ndreky han̈ampy atsika hihavan̈a tsarabe aminany.

 ALEVA ONON̈O

3. Tokony hilamin̈y vahoakany Jehovah

Filankevipitantan̈ana mandamin̈y asany Vavolombelon̈o Jehovah, fa izio fo man̈araka tsara torohevitriny Jesosy. Efa nan̈araka lamin̈y zen̈y koa iro Kristianin̈y taloha tan̈y. Alifasa VIDEO io.

Vakia 1 Korintianina 14:33, 40, avio iaraha dinihin̈y fan̈ontanian̈a ty:

• Izikoa andininy io zahan̈a, akory ahitantsika fa tiany Jehovah hilamin̈y atsika?

4. Panompo atokisan̈a mandamin̈y asa fitorian̈a ataontsika

Fitorian̈a io asa farany maventy nataony Kristianin̈y taloha tan̈y. Vakia Asan’ny Apostoly 8:14, 25, avio iaraha dinihin̈y fan̈ontanian̈a aby ty:

• Azovy nan̈amia torohevitry momba asa fitorian̈a tamindro Kristianin̈y voanalohany tan̈y?

• Akory nataony Petera ndreky Jaona nan̈araka torohevitriny apostoly aby io?

Asa fitorian̈a io asa farany maventy alaminy Filankevipitantan̈ana. Alifasa VIDEO io.

 Nankamafisiny Jesosy fa ten̈a raha maventy asa fitorian̈a io. Vakia Marka 13:10, avio iaraha dinihin̈y fan̈ontanian̈a aby ty:

• Nan̈ino ma asa fitorian̈a io raha ten̈a maventy amy Filankevipitantan̈ana?

• Nan̈ino ma atsika mila “panompo atokisan̈a ndreky mahadiniky raha” handamin̈y asa fitorian̈a erantany io?

5. Panompo atokisan̈a io man̈amia taridalan̈a

Filankevipitantan̈ana man̈amia taridalan̈a Kristianin̈y erantany. Karakory ma ataonizio manapakevitry momba taridalan̈a hamian̈a io? Diniha karakory nataony filankevipitantan̈ana taloha tan̈y. Vakia Asan’ny Apostoly 15:1, 2, avio iaraha dinihin̈y fan̈ontanian̈a aby ty:

• Ino raha tsy nampifan̈araka iro Kristianin̈y taloha tan̈y?

• Taminjovy nitondrasany Paoly ndreky Barnabasy problemo io?

Vakia Asan’ny Apostoly 15:12-18, 23-29, avio iaraha dinihin̈y fan̈ontanian̈a ty:

• Talohany hangala fanapahankevitry, ino raha nidinihiny filankevipitantan̈ana, baka hazahoan̈a taridalan̈a baka amy Jehovah handaminan̈a problemo io?​—Zahava andininy 12, 15, ndreky 28.

Vakia Asan’ny Apostoly 15:30, 31 ndreky 16:4, 5, avio iaraha dinihin̈y fan̈ontanian̈a aby ty:

• Akory fandraisandro Kristianin̈y taloha tan̈y taridalan̈a baka tamy filankevipitantan̈ana in̈y?

• Akory nataony Jehovah nitahy iro, fotony iro nan̈araka volan̈anany?

Vakia 2 Timoty 3:16 ndreky Jakoba 1:5, avio iaraha dinihin̈y fan̈ontanian̈a ty:

• Filankevipitantan̈ana koa fa hangala fanapahankevitry izioty, aia tany angalanizio taridalan̈a?

 INO RAHA NIANARANAO TATO?

Filankevipitantan̈ana io “panompo atokisan̈a ndreky mahadiniky raha.” Jesosy nifidy izio. Filankevipitantan̈ana man̈amia taridalan̈a ndreky hanin̈y arapan̈ahy Kristianin̈y erantany.

Fan̈ontanian̈a Fameren̈ana

• Azovy ma nifidy “panompo atokisan̈a ndreky mahadiniky raha”?

• Akory ikarakarany Filankevipitantan̈ana atsika?

• Mino ma anao fa Filankevipitantan̈ana io “panompo atokisan̈a ndreky mahadiniky raha”?