Zisɛ ɓa Korai-toli-kpɔŋ Ŋuŋ-tuɛ-nuu. (Ifisiɛŋ 5:​23) Zisɛ kaa saa ɣala-taa, gɛ ŋɔnuai teniŋ tɔɔ nɔii ma ɓɛ “nyee-mu-nuu sãa tareɛɛi” sarai. (Maafiu 24:​45 lono.) Zisɛ Korai nyaa kpiŋ ɓe “nyee-mu-nuu sãa tareɛɛi” ŋi siɣe zu, nyaŋ e wala-walalaa tɛɛ bɔ a gɛɛ e mɛni-kpɛtɛɛ taŋa kɛ. Kɛɛ maa nɛ̃ɛi nyee-mu-nuui ŋi e Korai woo mɛni, e tii kɛ ziɣe-zu-ɓelai mɛni ma. Gbɛɛ ɓa nyee-mu-nuui ti? Nyaŋ a kumɛi kaai leŋ?

1. Gbɛɛ ɓa “nyee-mu-nuu sãa tareɛɛi”?

Ziova a wɔlɔ tii kɛ a nuu ta kpaa nuu kpulu loŋ nyii-ŋai dikaa a sinaai a gɛɛ e ŋɔnuai teniŋ tɔɔ. (Malakai 2:7; Ibulu 1:1) Zisɛ saa polu ma, zia-ɓelai da nuu-pɔlɔ-ŋai kɛ Zerusalɛŋ ɓe Ziova e kɛ ŋɔnuai teniŋ tɔɔi di sarai. (Dikɛ-mɛni-ŋai 15:2) Bere sii tɔnɔi ti su, korai-toli-kpɔŋ laa-tuɛ-ɓela kpulu loŋ nyii-ŋai dikaa a Gbɔŋ-gie-mai Teniŋ-tɔɔ-ɓelai ɓe Ziova a saa ŋɔnuai teniŋ tɔɔi di sarai. Da Ŋala-kɔlɔi ŋa lɛ kua, dikɛ ŋala-woo-ɓo tii teniŋ tɔɔ. Nuu-kpului ŋi ɓa “nyee-mu-nuu sãa tareɛɛi nyii [Zisɛ] e zee.” (Maafiu 24:​45) Gbɔŋ-gie-mai Teniŋ-tɔɔ-ɓelai kelee dikaa a ziɣe zu Korai-ɓelai ta, nyaŋ kili-kɛ-zu kaa diyeei a gɛɛ da Korai-ni da pai tii kɛi ŋala-taa Kaloŋ-laai su dikɛ-ɣeniɛi a kpɛɛ nɔii ma.

2. Nyee-mu-nuu sãai a Ziova ŋɔnuai ŋaa kɔŋ leŋ dɔ̃yai su?

Zisɛ e mo a gɛɛ nyee-mu-nuui ŋi a pai ‘Korai-ɓela ŋa kɔni tãi ma.’ (Maafiu 24:​45) Yɛɛ berei nɔ mii-sɛŋ a kukɔlɔi pono la, e kukponoi kpanaŋ, bere nɔ ɓe mɛni-ŋai kwa maa-kɔri Ŋala-kɔlɔi sui, a kukponoi kpanaŋ la a gɛɛ ku lɛɛ Ziova polu, ku dii kɛ nyii Zisɛ e dɛɛ kupɔi. (1 Temete 4:6) Kwa mɛni-ŋai ŋi maa-kɔri kukoyaŋ-ŋai, sakiu kpɔŋ-ŋai da kɔ̃ŋvensɔŋ-ŋai su, e pɛlɛ la kukɔlɔ-ŋai da vilo-ŋai dia nyii-ŋai da kpɔŋ kua a gɛɛ ku Ɣala nĩa-mɛni kɔlɔŋ, ku kulaoi-laai su kpanaŋ a nyaa.

 MƐNI TAMAA MAA-KƆRI

3. Maa nɛ̃ɛi Ziova ŋɔnuai dikɛ kpɔŋ-gie-ma su

Zisɛ a tii kɛi a Gbɔŋ-gie-mai Teniŋ-tɔɔ-ɓelai a gɛɛ di Ziova Ŋɔsere-faa Kɛ-ɓelai ditii pu ŋɛli ma. Bere nɔ ɓe Zisɛ a kaa Korai-ɓelai wɔlɔ ti kɛi, teniŋ tɔɔ la. VILOI su kaa.

1 Kɔleŋtiɛŋ 14:​33, 40 lono, gɛ ni ka lono e pilaŋ mare-kɛɛ ŋi ma:

• Ŋala-kɔlɔ-kpua-ŋai ŋi di nɛ leŋ a gɛɛ Ziova a ŋwɛlii a gɛɛ Ŋɔsere-faa Kɛ-ɓelai dikɛ kpɔŋ-gie-ma su?

4. Nyee-mu-nuu sãai ɓe a kuɣala-woo-ɓo tii teniŋ tɔɔ

Ŋala-woo-ɓo tii ɓe kɛ a dii mɛni kpanaŋɔɔi Korai-ɓelai wɔlɔ ti kɛi mɛni ma. Dikɛ-mɛni-ŋai 8:​14, 25 lono, gɛ ni ka lono e pilaŋ mare-kɛɛ-ŋai ŋi dia:

• Korai-ɓelai wɔlɔ kɛi ditãi ma, gbɛɛ-ni ɓe kɛ ŋala-woo-ɓo tii teniŋ tɔɔi?

• Le ɓe Pitɛ da Zɔŋ di gɛ a nia-wooi zia-ɓelai kpeli-ŋai di dɛɛ dipɔi?

Ŋala-woo-ɓo tii ɓa dii mɛni kpanaŋɔɔi nyii Gbɔŋ-gie-mai Teniŋ-tɔɔ-ɓelai da saa deniŋ tɔɔi. VILOI su kaa.

 Zisɛ e berei lɛ ŋala-woo-ɓo tii mɛni kpanaŋɔɔi lai. Maki 13:​10 lono, gɛ ni ka lono e pilaŋ mare-kɛɛ-ŋai ŋi dia:

• Le mɛni ɓe Gbɔŋ-gie-mai Teniŋ-tɔɔ-ɓelai da ŋala-woo-ɓo tii siɣe la a tii mɛni kpanaŋɔɔi?

• Le mɛni ɓe nɛlɛɛi la a gɛɛ “nyee-mu-nuu sãa tareɛɛi” e ŋala-woo-ɓo tii teniŋ tɔɔ ŋeniɛi gwaa kelee?

5. Nyee-mu-nuu sãai a lia-woo-ŋa tɛɛ

Gbɔŋ-gie-mai Teniŋ-tɔɔ-ɓelai da lia-woo-ŋa tɛɛ Korai-ɓela pɔ ŋeniɛi gwaa kelee. Da nia-wooi maa nɛ̃ɛi di dɛɛi, kɔlɔŋ leŋ? Berei kaa gbɔŋ-gie-mai teniŋ-tɔɔ-ɓelai nyii kɛ zia-ɓelai ditãi mai di gɛ lai. Dikɛ-mɛni-ŋai 15:​1, 2 lono, gɛ ni ka lono e pilaŋ mare-kɛɛ-ŋai ŋi dia:

• Le ɓe pa a laa saa Korai-ɓelai wɔlɔ ti kɛi taŋa sama?

• Gbɛɛ-ni ɓe Pɔɔ, Banaba, da diɓaraŋ-ŋa di di mare kɛ a gɛɛ di mɛnii ŋi su kaa?

Dikɛ-mɛni-ŋai 15:​12-18, 23-29 lono, gɛ ni ka lono e pilaŋ mare-kɛɛ ŋi ma:

• Gbɔŋ-gie-mai teniŋ-tɔɔ-ɓelai wɔlɔ ti kɛi di lɛɛ pai mɛni-kpɛtɛɛ kɛi, le ɓe da kaa gɛ a gɛɛ di Ɣala ŋɔkili-ŋa-siai kɔlɔŋ?​—Ŋoo-kpua-kpua 12, 15, da 28 kaa.

Dikɛ-mɛni-ŋai 15:​30, 31 da 16:4, 5, lono, gɛ ni ka lono e pilaŋ mare-kɛɛ-ŋai ŋi dia:

• Korai-ɓelai wɔlɔ ti kɛi, di tua leŋ gɛɛ daa nia-wooi mɛni gbɔŋ-gie-mai teniŋ-tɔɔ-ɓelai di dɛɛi?

• Ziova e luwa laa leŋ dia diwoo-mɛnii, mɛni ma?

2 Temete 3:​16 da Zĩi 1:5 lono, gɛ ni ka lono e pilaŋ mare-kɛɛ ŋi ma:

• Le ɓe Gbɔŋ-gie-mai Teniŋ-tɔɔ-ɓelai da saa gɛ di lɛɛ pai mɛni-kpɛtɛɛ kɛi?

 MƐNI-ŊUŊ-ŊAI YAA MAA-KƆRII

Gbɔŋ-gie-mai Teniŋ-tɔɔ-ɓelai ɓa “nyee-mu-nuu sãa tareɛɛi” nyii Zisɛ e zee. Da lia-woo tɛɛ Korai-ɓela pɔ ŋeniɛi gwaa kelee, di diŋa kɔŋ.

Gili-too-ŋa mare-kɛɛ-ŋai

• Gbɛɛ ɓe “nyee-mu-nuu sãa tareɛɛi” seei?

• Gbɔŋ-gie-mai Teniŋ-tɔɔ-ɓelai da kumɛi kaa leŋ?

• I laai la Gbɔŋ-gie-mai Teniŋ-tɔɔ-ɓelai ɓa “nyee-mu-nuu sãa tareɛɛi”?