Yesu ali Mtwe wa mpingo wa Chiklistu. (Aefeso 5:23) Masiku agano, Yesu jwali mwenye kwinani, akwalongolela ŵakumkuya ŵakwe ŵali pachilambo chapasi kupitila mwa “jwamasengo [“kapolo,” NWT] jwakulupichika ni jwalunda.” (Aŵalanje Mateyu 24:45.) Ligongo lyakuti ‘kapoloju’ jwasagulidwe ni Yesu, jwalakwe akwete udindo wakusagula yakutenda payakutendekwa yine. Nambope kapoloju akusasosekwasoni kumpikanila Klistu soni kwatumichila achalongo achimjakwe ŵa Klistu. Nambo ana kapoloju ali ŵani? Soni ana akusatusamalila mwamtuli?

1. Ana “kapolo jwakulupichika ni jwalunda” ali ŵani?

Yehofa aŵele ali mkukamulichisya masengo mundu kapena kagulu kamwana ka ŵandu pakwalongolela ŵandu ŵakwe. (Malaki 2:7; Ahebeli 1:1) Yesu ali awile, ŵandumetume soni achakulungwa ŵa ku Yelusalemu ni ŵaŵalongolelaga ŵandu ŵa Mlungu. (Masengo 15:2) Mwakamulana ni yeleyi, masiku aganosoni kagulu ka achakulungwa ŵali Likuga Lyakulongolela lya Mboni sya Yehofa ni kakakupeleka chakulya chausimu soni kulongolela masengo gakulalichila. Kaguluka ni kakakupanganya “kapolo jwakulupichika ni jwalunda jwele [Yesu] ŵamsagwile.” (Mateyu 24:45) Wosope ŵali mu Likuga Lyakulongolela ali Aklistu ŵasagulidwe ni msimu. Jemanjaji akwembecheya kuti chachilamulila yalumo ni Klistu mu Uchimwene wakwe wa kwinani. Yeleyi yichitendekwa umi wawo wa pachilambo chapasi pauchimala.

2. Ana ni chakulya chausimu chapi chakusapeleka kapolo jwakulupichika?

Yesu jwasasile kuti kapoloju chachipelekaga “yakulya [kwa Aklistu achimjakwe] mu ndaŵi jakwe.” (Mateyu 24:45b) Chakulya chikusatukamuchisya kuti tukole chilu chamachili soni chambone. Myoyosoni chakulya chausimu chachili Maloŵe ga Mlungu chikusatukamuchisya kuti tupitilisye kuŵa ŵakulupichika kwa Yehofa soni kuti tukamuleje masengo gaŵatupele Yesu. (1 Timoteo 4:6) Tukusapochela chakulya chausimuchi kupitila mmisongano ja mpingo, ja dela, ja chigawo, kupitilasoni m’mabuku gakulondesya ya m’Baibulo soni mafidiyo. Yeleyi yikusatukamuchisya kuti tumanyilileje yakusasaka Mlungu soni kuti tuŵe paunasi wambone ni jwalakwe.

 KULIJIGANYA YEJINJI

3. Ŵandu ŵa Yehofa atendeje yindu mwakulondeka

Mwakulongoleledwa ni Yesu, Likuga Lyakulongolela likusalolechesyaga kuti masengo ga ŵa Mboni sya Yehofa gakwenda chenene. Yeleyi ni yayatendekwagasoni mumpingo wa Chiklistu wapandanda. Alolele FIDIYO.

Aŵalanje 1 Akolinto 14:33, 40, kaneko akambilane chiwusyo achi:

• Ana lilembali likulosya chamtuli kuti Yehofa akusasaka kuti Mboni syakwe siŵeje syakamulana?

4. Kapolo jwakulupichika ni jwakusalolela masengo gakulalichila

Aklistu ŵandanda ŵagawonaga masengo gakulalichila kuŵa gakusosekwa mnope. Aŵalanje Masengo 8:14, 25, kaneko akambilane yiwusyo ayi:

• Ana ŵani ŵaŵalongolelaga masengo gakulalichila mu ndaŵi ja Aklistu ŵandanda?

• Ana Petulo ni Yohane ŵatesile chichi ali atumidwe ni ŵandumetume?

Masengo gakulalichila gali gakusosekwa mnope soni Likuga Lyakulongolela ni lyalikulolela masengoga. Alolele FIDIYO.

 Yesu jwagombelechesye kusosekwa kwa masengo gakulalichila. Aŵalanje Maliko 13:10, kaneko akambilane yiwusyo ayi:

• Ligongo chichi Likuga Lyakulongolela likusagawona masengo gakulalichila kuŵa gakusosekwa mnope?

• Ligongo chichi yili yakusosekwa kuti “kapolo jwakulupichika ni jwalunda” aloleleje masengo gakulalichila pachilambo chosope?

5. Kapolo jwakulupichika akusatulongolela

Likuga Lyakulongolela likusasalila Aklistu wosope yakusosekwa kukuya. Ana akusatenda yeleyi mwamtuli? Kwende tulole mulyatendelaga likuga lyakulongolela lya Aklistu ŵandanda. Aŵalanje Masengo 15:1, 2, kaneko akambilane yiwusyo ayi:

• Ana ni chichi chachatendekasisye kuti Aklistu ŵandanda alekangane nganisyo?

• Ana Paulo, Banaba soni achimjakwe ŵapatile kwapi chikamuchisyo panganiji?

Aŵalanje Masengo 15:12-18, 23-29, kaneko akambilane chiwusyo achi:

• Ana likuga lyakulongolela lya Aklistu ŵandanda lyatesile yamtuli kuti Mlungu alilongolele kusagula yakutenda panganiji?—Alole vesi 12 15, soni 28.

Aŵalanje Masengo 15:30, 31 soni 16:4, 5, kaneko akambilane yiwusyo ayi:

• Ana Aklistu ŵandanda ŵatesile yamtuli ali apikene yalyasasile likuga lyakulongolela?

• Ana paliji yakuyichisya yamtuli ligongo lyakupikanila kwawo?

Aŵalanje 2 Timoteo 3:16 soni Yakobo 1:5, kaneko akambilane chiwusyo achi:

• Ana Likuga Lyakulongolela likusapata kwapi chikamuchisyo pakusaka kusagula yakutenda?

 YALIJIGANYISYE

Yesu Klistu asagwile “kapolo jwakulupichika ni jwalunda” jwali Likuga Lyakulongolela. Kapoloju akusiŵalongolela soni kwapa chakulya chausimu Aklistu wosope pachilambopa.

Yiwusyo Yakuwilisya

• Ana “kapolo jwakulupichika ni jwalunda” jwasagulidwe ni ŵani?

• Ana Likuga Lyakulongolela likusatusamalila mwamtuli?

• Ana akukulupilila kuti Likuga Lyakulongolela lili “kapolo jwakulupichika ni jwalunda”?