Jesus e ir Lolugen e ulung ni Kristiano. (Efesus 5:23) Ngiyal’ ney e bay u tagil’ u tharmiy ni be pow’iy pi gachalpen u fayleng u daken ba “tapigpig nib yul’yul’ ma ba gonop.” (Mu beeg e Matthew 24:45.) Jesus Kristus e ir e ke mel’eg e re “tapigpig” nem, ma ke pi’ mat’awun ni nge dugliy boch ban’en. Machane yugu aram rogon, ma thingar ki fol rok Kristus me ayuweg pi walagen. Mini’ e re tapigpig nem? Ma uw rogon ni ma ayuwegdad?

1. Mini’ “fare tapigpig nib yul’yul’ ma ba gonop”?

Kab kafram i yib ni ma fanay Jehovah reb e pumoon ara bochi ulung i pumoon ni nga rogned e n’en nge rin’ e girdi’ rok. (Malaki 2:7; Hebrews 1:1) Tomuren ni yim’ Jesus, ma pi apostal nge piin piilal u Jerusalem e yad e u rogned e thin. (Acts 15:2) Ku arrogon e ngiyal’ ney ni bay in i piilal ni aram fare Ulung ni Ma Pow’iyey ko Pi Mich Rok Jehovah ni yad ma pi’ e ggan ni fan ko tirok Got ban’en ko girdi’ rok Got ma yad be pow’iy fare maruwel ni machib. Re ulung ney e aram “fare tapigpig nib yul’yul’ ma ba gonop” ni ke mel’eg Jesus. (Matthew 24:45a) Gubin e piin yad bang ko fare Ulung ni Ma Pow’iyey e yad boch e Kristiano ni kan dugliyrad nga gelngin Got nib thothup ni yad be athapeg e ngiyal’ ni yad ra un ngak Kristus ko gagiyeg u Gil’ilungun u tharmiy ko ngiyal’ ni ke mus nap’an e yafos rorad u fayleng.

2. Mang ggan ni fan ko tirok Got ban’en e ma pi’ fare tapigpig nib yul’yul’?

I yog Jesus ni fare tapigpig nib yul’yul’ e ra pi’ gan e piin Kristiano “ko ngiyal’ ni yima pi’ riy.” (Matthew 24:45b) Ggan ni gad ma kay e ma ayuweg fithik’ i dowdad ni nge par nib gel mab fel’. Ere ku arrogon e ggan ni fan ko tirok Got ban’en ara fonow u lan e Thin rok Got ni ma pi’ gelngidad ya nge yag nda pared ni gad ba yul’yul’ ngak Jehovah ma gad rin’ e maruwel ni ke pi’ Jesus ni ngad rin’ed. (1 Timothy 4:6) Ma yag e re ggan ney ngodad u daken e pi muulung, nge assembly, nge convention, nge pi babyor rodad nib puluw e thin riy ko Bible, nge pi video ni ma ayuwegdad ni ngad nanged e n’en nib m’agan’ Got ngay miki gelnag e tha’ u thildad.

 KUM FIL BOCH BAN’EN U MURUNG’AGEN

3. Thingari yaram e girdi’ rok Jehovah

Ma yarmiy fare Ulung ni Ma Pow’iyey e maruwel ko Pi Mich Rok Jehovah u tan pa’ Jesus. Ku aram e n’en ni i buch u nap’an e tin som’on e Kristiano. Mu yaliyew e re VIDEO ney.

Mu beegew e 1 Korinth 14:33, 40, mi gimew weliy e fulweg ko re deer ni baaray:

• Uw rogon ni be dag e gal verse ney ni baadag Jehovah ni nge yaram e Pi Mich rok?

4. Fare tapigpig nib yul’yul’ e ma yarmiy fare maruwel ni machib

Machib e aram e bin th’abi ga’ fan e maruwel ni i rin’ e tin som’on e Kristiano. Mu beegew e Acts 8:14, 25, mi gimew weliy e fulweg ko gal deer ni baaray:

• Mini’ e i yog rogon ni ngan rin’ fare maruwel ni machib u nap’an e tin som’on e Kristiano?

• Mang e rin’ Peter nge John u nap’an ni yog e pi apostal e n’en ngar rin’ew?

Machib e aram e bin th’abi ga’ fan e maruwel ni ma yarmiy fare Ulung ni Ma Pow’iyey. Mu yaliyew e re VIDEO ney.

 I tamilangnag Jesus feni ga’ fan fare maruwel ni machib. Mu beegew e Mark 13:10, mi gimew weliy e fulweg ko gal deer ni baaray:

• Mang nrib ga’ fan fare maruwel ni machib u wan’ fare Ulung ni Ma Pow’iyey?

• Mang fan nib t’uf ni nge yarmiy “fare tapigpig nib yul’yul’ ma ba gonop” e re maruwel ney ni yibe rin’ u ga’ngin yang e fayleng?

5. Ma yog fare tapigpig nib yul’yul’ e n’en ngan rin’

Ma yog fare Ulung ni Ma Pow’iyey e n’en nge rin’ e pi Kristiano u ga’ngin yang e fayleng. Uw rogon ni ma dugliy e n’en nge yog ni ngan rin’? Am lemnag rogon ni i rin’ fare ulung ni ma pow’iyey u nap’an e tin som’on e Kristiano e re n’ey. Mu beegew e Acts 15:1, 2, mi gimew weliy e fulweg ko gal deer ni baaray:

• Mang e k’aring e magawon nga thilin boch e Kristiano kakrom?

• Mini’ e yan Paul, nge Barnabas, nge yugu boch e girdi’ ra guyed ni ngar pithiged e re magawon ney?

Mu beegew e Acts 15:12-18, 23-29, mi gimew weliy e fulweg ko re deer ni baaray:

• U m’on ni nge dugliy fare ulung ni ma pow’iyey e n’en ngan rin’, ma mang e rrin’ed ya nge yag nra nanged e n’en nib m’agan’ Got ngay ni fan ko re n’ey?​—Mu guy e verse 12, 15, nge 28.

Mu beegew e Acts 15:30, 31 nge 16:4, 5, mi gimew weliy e fulweg ko gal deer ni baaray:

• Mang e rin’ e tin som’on e Kristiano ko n’en ni yog fare ulung ni ma pow’iyey ni ngan rin’?

• Bochan nra folgad, ma uw rogon ni tow’athnagrad Jehovah?

Mu beegew e 2 Timothy 3:16 nge James 1:5, mi gimew weliy e fulweg ko re deer ni baaray:

• Uw e ma sap fare Ulung ni Ma Pow’iyey ngay e ngiyal’ ney ni ngan pow’iyrad u nap’an ni yad be dugliy boch ban’en?

 N’EN KAN FIL

Fare Ulung ni Ma Pow’iyey e aram “fare tapigpig nib yul’yul’ ma ba gonop” ni ke mel’eg Kristus. Ma yog e n’en nge rin’ e pi Kristiano u ga’ngin yang e fayleng maku ma pi’ e ggan ngorad ni fan ko tirok Got ban’en.

Ngan Sul u Daken

• Mini’ e ke mel’eg “fare tapigpig nib yul’yul’ ma ba gonop”?

• Uw rogon ni ma ayuwegdad fare Ulung ni Ma Pow’iyey?

• Ba mich u wan’um ni fare Ulung ni Ma Pow’iyey e aram “fare tapigpig nib yul’yul’ ma ba gonop,” fa?