Yesu niandi mfumu yi kimvuka ki bukristu. (Efeso 5:23) Kuna diyilu kadi, Yesu wulembo diatisa minlonguki miandi va mbata ntoto mu nzila yi lutuadusu lu “nnannga wukuikama ayi wunduenga.” (Tanga Matayi 24:45.) Yesu niandi wubieka “nnanga”; widi ayi mua kimfumu vayi widi kaka nnanga wu Kristu ayi wulembo sadisa bakhoma zi Kristu. Na nioni “nnanga” beni? Ayi bue keta tukebila?

1. Na nioni “nnanga wukuikama ayi wunduenga”?

Yehova weta sadila kaka mutu voti mua ndambu batu mu diambu di tuadisa batu bandi. (Malaki 2:7; Ebelewo 1:1) Ku manima ma lufua lu Yesu, mimvuala ayi bakulutu bawu beba diatisanga kimvuka. (Mavanga 15:2) Lumbu kiaki phe mua ndambu bakulutu bo batedidi Kimvuka kintuadisi ki Bambangi zi Yehova, kilembo vani bidia bi kipheve ayi kilembo tuadisa kisalu kitsamununu. Mua ndambu batu beni niandi “nnanga wukuikama ayi wunduenga nio [Yesu] kabiekidi.” (Matayi 24:45a) Batu babo badi mu Kimvuka kintuadisi badi bakristu bo batulu mafuta mu kipheve. Beta mona khini mu diyindu dilandakana Kristu mu kitinu kiandi ki mazulu mu thangu bela fua.

2. Bidia mbi bi kipheve “nnanga” keta vana?

Yesu wutuba ti “nnanga wukuikama ayi wunduenga” wela vana balonguki bandi “bidia mu thangu yifueni.” (Matayi 24:45b) Bidia bio tueta dia bieta tubuela ngolo ayi bieta tusadisa tutatamana ba mu buvini bumboti. Bobuawu phe bidia bi kipheve, bintia sundula malongi mo madi mu phova yi Nzambi bieta tuvana zingolo mu diambu di tutatamana ba bakuikama kuidi Yehova ayi dukisa kisalu kio Yesu katuvana. (1 Timote 4:6) Tueta dia bidia beni bi kipheve mu zikhutukunu zifioti ayi zinneni, mu minkanda mio midi na malongi mabedi mu Bibila ayi mu zivideo zio zieta tusadisa mu sudika lukanu lu Nzambi ayi yonzula kikundi kieto ayi niandi.

 TUVISA MBOTI MBOTI

3. Batu ba Yehova bafueti ba bakubuku

Mu lutuadusu lu Yesu, Kimvuka kintuadisi, kieta kubika kisalu ki Bambangi zi Yehova. Phila beni yo yilutuadusu, yilembo dedakana ayi phila yoyi bakristu batandu kitheti beba diatisilanga kimvuka. Tala VIDEO.

Tanga 1 Kolinto 14:33, 40 ayi vana mvutu mu kiuvu kiaki:

• Bue ziverse zio zikutumonisina ti Yehova tidi Bambangi ziandi baba bakubuku?

4. Nnanga wukuikama ayi wunduenga weta kubika kisalu kitsamununu

Kisalu kitsamununu kiba kisalu kiluta mfunu wombo kioki bakristu batandu kitheti basala. Tanga Mavanga 8:14, 25 ayi vana mimvutu mu biuvu biabi:

• Nani weba tuadisanga kisalu kitsamununu mu bakristu ba tandu kitheti?

• Bue Piela ayi Yowani batadila lutuadusu lu mimvuala?

Kisalu kitsamununu kidi kisalu kimfunu wombo kio kieta kubika Kimvuka kintuadisi. Tala VIDEO.

 Yesu wutuba ti kisalu kitsamununu mfunu wombo kidi. Tanga Malako 13:10 ayi vana mimvutu mu biuvu biabi:

• Bila mbi kisalu kitsamununu kididi mfunu wombo kuidi Kimvuka kintuadisi?

• Bila mbi “nnanga wukuikama ayi wunduenga” keta kubikila kisalu kitsamununu mu nza yimvimba?

5. Nannga wukuikama ayi wunduenga weta vana lutuadusu

Kimvuka kintuadisi kieta vana lutuadusu kuidi bakristu ba nza yimvimba. Bue kieta bakila zinzengolo? Tutala bue Kimvuka kintuadisi kitandu kitheti kieba bakilanga zinzengolo. Tanga Mavanga 15:1, 2 ayi vana mimvutu mu biuvu biabi:

• Mu diambu mbi bakristu batandu kitheti ka basi bela ko nguizani?

• Nani Polo, Barnabe ayi bankaka baye bata muingi badedikisa nsamu beni?

Tanga Mavanga 15:12-18, 23-29 ayi vana mvutu mu kiuvu kiaki:

• Mbi Kimvuka kintuadisi kitula muingi Nzambi kabasadisa babaka nzengolo?—Tala ziverse 12, 15 ayi 28.

Tanga Mavanga 15:30, 31 ayi 16:4, 5 ayi vana mimvutu mu biuvu biabi:

• Mbi bakristu batandu kitheti batula bu batambula lutuadusu lu Kimvuka kintuadisi?

• Bue Yehova kasakumunina tumamana kuawu?

Tanga 2 Timote 3:16 ayi Zaki 1:5 ayi vana mvutu mu kiuvu kiaki:

• Mu lumbu kiaki mbi bieta sadisa Kimvuka kintuadisi muingi babaka zinzengolo?

 MU BUKHUFI

Kimvuka kintuadisi niandi “nnanga wukuika ayi wunduenga” nio Kristu katudidi. Weta vana lutuadusu ayi bidia bi kipheve kuidi bakristu ba nza yimvimba.

Phutukulu

• Nani wubieka “nnanga wukuikama ayi wunduenga”?

• Bue Kimvuka kintuadisi kieta tutanina?

• Kikinini ti Kimvuka kintuadisi niandi “nnanga wukuikama ayi wunduenga”?