Jesúseʼ u poolil le múuchʼuliloʼ (Efesios 5:23). Teʼ kʼiinoʼobaʼ u tsʼaamaj «le esclavo chúukaʼan u yóol yéetel yaan u naʼat» utiaʼal u nuʼuktik u discípuloʼob way yóokʼol kaabeʼ (xok Mateo 24:45). Le ‹esclavoaʼ› yaantiʼ autoridad tumen Jesús tsʼaamil. Kex beyoʼ láayliʼ u esclavo Cristo yéetel ku meyajtik xan u sukuʼunoʼob Cristo. ¿Máax túun le esclavoaʼ? ¿Bix u kanáantkoʼon?

1. ¿Máax ‹le esclavo chúukaʼan u yóol yéetel yaan u naʼatoʼ›?

Desde úuchjeakileʼ Jéeobaeʼ ku tsʼáaik juntúul máak wa junmúuchʼ máakoʼob utiaʼal u nuʼuktik u kaajal (Malaquías 2:7; Hebreos 1:1). Por ejemploeʼ le ka tsʼoʼok u kíimil Jesúseʼ letiʼe apóstoloʼob yéetel le ancianoʼob yanoʼob Jerusalén nuʼukt le múuchʼuliloʼ (Hechos 15:2). Teʼ kʼiinoʼob xanaʼ tsʼaʼan junmúuchʼ ancianoʼob utiaʼal u nuʼuktikoʼob u kaajal Jéeoba, letiʼobeʼ letiʼe Cuerpo Gobernante tiʼ u testigoʼob Jéeobaoʼ. Letiʼob tsʼáaik le janal espiritualoʼ yéetel ku nuʼuktikoʼob xan le kaʼansaj ku beetaʼaloʼ. Le junmúuchʼ máakoʼobaʼ letiʼob «le esclavo chúukaʼan u yóol yéetel yaan u naʼat» tsʼaʼan tumen Jesúsoʼ (Mateo 24:45a). Le máaxoʼob yanoʼob ichil le Cuerpo Gobernanteoʼ yéeyaʼanoʼob yéetel espíritu santo, tsʼoʼoleʼ kéen kíimkoʼobeʼ yaan u binoʼob gobernar yéetel Cristo teʼ kaʼanoʼ.

2. ¿Baʼax le janal espiritual ku tsʼáaik le esclavo chúukaʼan u yóoloʼ?

Jesúseʼ tu yaʼaleʼ le esclavo chúukaʼan u yóoloʼ yaan u tsʼáaik «janal tiʼ u maasil esclavoʼob jach tu yorailoʼ» (Mateo 24:45b). Jeʼex le janal ku tsʼáaiktoʼon muukʼ yéetel toj óolaloʼ, le janal espiritual xanoʼ ku tsʼáaiktoʼon muukʼ utiaʼal u chúukpajal k-óol tiʼ Jéeoba yéetel utiaʼal k-beetik le baʼax tu kʼubéentajtoʼon Jesúsoʼ (1 Timoteo 4:6). Le janalaʼ ku tsʼaʼabaltoʼon teʼ reuniónoʼoboʼ, teʼ asambleaʼoboʼ bey xan teʼ videoʼob yéetel publicaciónoʼob jóoʼsaʼan tiʼ le baʼax ku yaʼalik le Bibliaoʼ. Tuláakal leloʼ ku yáantkoʼon utiaʼal k-naʼatik baʼax u kʼáat Jéeoba bey xan utiaʼal k-maas bisikba tu yéetel.

 UTIAʼAL A MAAS NAʼATIK

3. U kaajal Jéeobaeʼ kʼaʼabéet u múul meyaj

Jesúseʼ ku nuʼuktik le Cuerpo Gobernante utiaʼal u yilik u múul meyaj u testigoʼob Jéeobaoʼ. Teʼ yáax siglooʼ le múuchʼuliloʼoboʼ junmúuchʼ u meyajoʼob kaʼachi. Chaʼanteʼex le VIDEOOʼ.

Xokeʼex 1 Corintios 14:33, 40, kéen tsʼoʼokkeʼ ka tsikbaltikeʼex lelaʼ:

• Jeʼex u yeʼesik le tekstoʼoboʼ, ¿u kʼáat wa Jéeoba ka meyajnak tu nuʼuk yéetel tu tsoolol le máaxoʼob adorarkoʼ? ¿Baʼaxten bey a tuklikoʼ?

4. Le esclavo chúukaʼan u yóoloʼ ku nuʼuktik le kaʼansaj ku beetaʼaloʼ

Le máaxoʼob meyajt Jéeoba teʼ yáax siglooʼ jach kʼaʼanaʼan kaʼach u yilkoʼob u kaʼanskoʼob uláakʼ máakoʼob. Xokeʼex Hechos 8:14, 25, kéen tsʼoʼokkeʼ ka tsikbaltikeʼex lelaʼ:

• Teʼ yáax siglooʼ, ¿máaxoʼob nuʼuktik le kaʼansaj ku beetaʼaloʼ?

• Pedro yéetel Juaneʼ, ¿tu beetoʼob wa le baʼax aʼalaʼabtiʼob tumen u maasil apóstoloʼoboʼ?

Le baʼax maas kʼaʼanaʼan u yilik le Cuerpo Gobernanteoʼ letiʼe u kaʼansaʼal le máakoʼoboʼ. Chaʼanteʼex le VIDEOOʼ.

 Jesúseʼ tu yaʼaleʼ jach kʼaʼanaʼan ka tsikbaltaʼak u Reino Dios. Xokeʼex Marcos 13:10, kéen tsʼoʼokkeʼ ka tsikbaltikeʼex lelaʼ:

• ¿Baʼaxten le Cuerpo Gobernanteoʼ jach kʼaʼanaʼan u yilik ka tsikbaltaʼak baʼax ken u beet u Reino Dios?

• ¿Baʼaxten «le esclavo chúukaʼan u yóol yéetel yaan u naʼat[oʼ]» kʼaʼabéet u nuʼuktik le kaʼansaj ku beetaʼal tiʼ tuláakal yóokʼol kaaboʼ?

5. Le esclavooʼ ku yaʼaliktoʼon baʼax kʼaʼabéet k-beetik

Le Cuerpo Gobernanteoʼ ku nuʼuktik le meyaj ku beetik le Testigoʼob tiʼ tuláakal yóokʼol kaaboʼ. ¿Bix u decidirtik le Cuerpo Gobernante baʼax kun beetbiloʼ? Ilawil bix tu beetil teʼ yáax siglooʼ. Xokeʼex Hechos 15:1, 2, kéen tsʼoʼokkeʼ ka tsikbaltikeʼex lelaʼ:

• ¿Baʼax oʼolal maʼ tu tsʼáaikubaʼob kaʼach de acuerdo le cristianoʼob teʼ yáax siglooʼ?

• ¿Tiʼ máax tu kʼáatoʼob áantaj Pablo, Bernabé yéetel le uláakʼ cristianoʼoboʼ?

Xokeʼex Hechos 15:12-18, 23-29, kéen tsʼoʼokkeʼ ka tsikbaltikeʼex lelaʼ:

• ¿Baʼax tu beetaj le Cuerpo Gobernante teʼ yáax siglo utiaʼal u yáantaʼaloʼob tumen Jéeoba yoʼolal le baʼax tu chʼaʼtukloʼoboʼ? (Ilawileʼex versículo 12, 15 yéetel 28).

Xokeʼex Hechos 15:30, 31 yéetel 16:4, 5, kéen tsʼoʼokkeʼ ka tsikbaltikeʼex lelaʼ:

• ¿Bix tu yuʼubiluba le cristianoʼob teʼ yáax siglo le ka túuxtaʼabtiʼob junpʼéel carta tumen le Cuerpo Gobernanteoʼ?

• ¿Bix k-ojéeltik bendecirtaʼaboʼob úuchik u yuʼubikoʼob tʼaan?

Xokeʼex 2 Timoteo 3:16 yéetel Santiago 1:5, kéen tsʼoʼokkeʼ ka tsikbaltikeʼex lelaʼ:

• Le kéen u chʼaʼtukult wa baʼax le Cuerpo Gobernante teʼ kʼiinoʼobaʼ, ¿baʼax ku beetik utiaʼal u yáantaʼal tumen Jéeoba?

 BAʼAX TSOʼOLI

Le Cuerpo Gobernanteoʼ letiʼe «esclavo chúukaʼan u yóol yéetel yaan u naʼat» yéeyaʼan tumen Cristooʼ. Le esclavooʼ ku tsʼáaik nuʼuktaj yéetel janal espiritual tiʼ le máaxoʼob meyajtik Jéeoba tiʼ tuláakal yóokʼol kaaboʼ.

Baʼax ta kanaj

• ¿Máax yéey «le esclavo chúukaʼan u yóol yéetel yaan u naʼat[oʼ]»?

• ¿Bix u kanáantkoʼon le Cuerpo Gobernanteoʼ?

• Techeʼ bix a wilik, ¿le Cuerpo Gobernanteoʼ láayliʼ wa letiʼe «esclavo chúukaʼan u yóol yéetel yaan u naʼat[oʼ]»?