Jesús nac «guic congregación» cristiana (Efesios 5:23). Ló naareʼ raquiimbu «mós ni rony xinésni né naní xcalrrien» desde lainy guibá par sanir ló xpiimbu ló Gudxlio (bíil Mateo 24:45). Mós reʼ Jesús golú layibu, por ngú napyibu galmandary. Ná scú nacsayibu xomós Cristo né racnéyibu xherman Cristo. ¿Chú láabu mós cu? ¿Né ximod ranbu lóono?

1. ¿Chú láabu «mós ni rony xinésni né naní xcalrrien»?

Jehová guirá ór raquiimbu toibtica buñguieeu o toib grupo de buñguieeu par sanir lainy xcudxbu (Malaquías 2:7; Hebreos 1:1). Por ejemplo, después ni goity Jesús, apóstoles né ancianos de gudx Jerusalén layibu gosaniryibu lainy congregación (Hechos 15:2). Xomod góc ló dzúcu, ló naareʼ noʼ toib grupo de ancianos ni laa Tidxó buñ ni nap xiroʼ Galnan ni rasanir nisló Testigos xtuny Jehová, layibu radudyibu galrro espiritual né rasaniryibu ló predicación. Grupo reʼ nacyibu mós ni rony xinésni né naní xcalrrien ni golú Jesús par gony dxiinreʼ (Mateo 24:45a). Guirá ni noʼ lad Tidxó buñ ni nap xiroʼ Galnan nacyibu cristianos ungidos por espíritu santo né cabésyibu órni gony mandaryibu né Cristo ló Gobierno xtunybu desde lainy guibá.

2. ¿Xí galrro espiritual radudy mós ni rony xinésni?

Jesús goniʼ que mós ni rony xinésni napyibu responsabilidad de «guidudyibu a stipnés cristianos galrro xorpani» (Mateo 24:45b). Xomodca galrro racnéni lóono gacno buñ nasac né nadip, galrro espiritual radudyni diitz ni sieed ló Xtiitz Dios, radudyni galnadip lóono par dipa guisianno Jehová né gony cumplirno dxiin ni ma bunycuent Jesús lóono (1 Timoteo 4:6). Galrro espiritual reʼ racaʼno láani órni rioʼno reunión, samblia, ló publicaciones né videos ni rareʼ ló la Biblia. Guirá ndeʼ racné lóono guidudyno cuent ni raniiny Jehová gonyno par guidzakno láabu más sacró.

 NANOY GUISUIDYNO LÁANI

3. Xcudx Jehová non tzoʼni organizado

Jesús rasanir lad Tidxó buñ ni nap xiroʼ Galnan par gony organizarbu dxiin ni rony testigos xtuny Jehová. Ló siglo primero, congregación cristiana bunyibu dxiin modcuca. Colguibiʼ VIDEO reʼ.

Colgoʼol 1 Corintios 14:33, 40 né colgooy xtiitzni:

• Mod ná guirá versículos reʼ, ¿racladx Jehová que Testigos xtunybu gac organizar la? ¿Xigony ronylo pensary scá?

4. Mós ni rony xinésni rony organizaryibu mod guinino xtiitz Dios

Cristianos ni goyoʼ ló siglo primero, nigolú gosac predicación par layibu. Colgoʼol Hechos 8:14, 25 né colgooy xtiitzni:

• Ló siglo primero, ¿chú gosanir ló predicación?

• ¿Xí láani buny Pedro né Juan né guirá instrucciones ni bidudy stipnés apóstoles layibu?

Predicación nacni toib dxiin ni más rasac ni rony organizar Tidxó buñ ni nap xiroʼ Galnan. Colguibiʼ VIDEO reʼ.

 Jesús goniʼ que rasac guinino xtiitz Dios. Colgoʼol Marcos 13:10 né colgooy xtiitzni:

• ¿Xigony nigolú rasac predicación par Tidxó buñ ni nap xiroʼ Galnan?

• ¿Xigony raquiinno que «mós ni rony xinésni né naní xcalrrien» gony organizar dxiinreʼ ni rac ló guidopynac Gudxlio?

5. Mós ni rony xinésni rasanir lóno

Tidxó buñ ni nap xiroʼ Galnan rasaniryibu nisló guirá cristianos ni noʼ ló guidopynac Gudxlio. ¿Ximod nanyibu xí instrucciones guidudyibu? Cuá cuidad xi láani buny Tidxó buñ ni gop xiroʼ Galnan ni goyoʼ ló siglo primero. Colgoʼol Hechos 15:1, 2 né colgooy xtiitzni:

• ¿Xí láani buny que goyoʼ galnagan lad tipnés cristianos ni goyoʼ ló siglo primero?

• ¿Chú layibu biyopy Pablo, Bernabé né stipnés cristianos par golexayibu galnagan reʼ?

Colgoʼol Hechos 15:12-18 né 23-29, né colgooy xtiitzni:

• Antes de ganyibu xi láani gonyibu, ¿xí láani buny Tidxó buñ ni gop xiroʼ Galnan ni goyoʼ ló siglo primero par nasanés Dios layibu ló galnagan reʼ? (Colguibiʼ versículos 12, 15 né 28).

Colgoʼol Hechos 15:30, 31 né 16:4, 5, né colgooy xtiitzni:

• ¿Xí láani buny cristianos ni goyoʼ ló siglo primero órni cuaʼyibu instrucciones ni bidudy Tidxó buñ ni nap xiroʼ Galnan layibu?

• ¿Ximod nanno que Jehová bidudy galnasác layibu por ni bisobdiitzyibu?

Colgoʼol 2 Timoteo 3:16 né Santiago 1:5, né colgooy xtiitzni:

• Órni Tidxó buñ ni nap xiroʼ Galnan ni noʼ ló naareʼ ragoʼyibu guicyibu xi láani gonyibu, ¿xí láani ronyibu par guisanés Jehová layibu?

 ¿XÍ BISUIDYLO?

Tidxó buñ ni nap xiroʼ Galnan layibu ngú «mós ni rony xinésni né naní xcalrrien» ni ma golú Cristo. Mós reʼ radudyibu instrucciones né galrro espiritual a guirá cristianos ni noʼ ló guidopynac Gudxlio.

Repas

• ¿Chú láabu golú a «mós ni rony xinésni né naní xcalrrien»?

• ¿Ximod ran Tidxó buñ ni nap xiroʼ Galnan lóono?

• ¿Ronylo crer que Tidxó buñ ni nap xiroʼ Galnan layibu ngú «mós ni rony xinésni né naní xcalrrien» la?