ESI ITUUGHẠ PHỌ 55
Loghonhaạn Ḍighaạgh Ookpomhoghan Phọ Nạ Odi Bọ
Siẹn oomo aḅirinhi phọ, irubal awe odi ni simuunịr arookpomhoghan rokumu aZihova r’oḅaạl olhoghi. Bidị rosereghiạn ni iromoghiom r’iiḅakiọm mọ rongọ ghan bọ bidị, kụ roḍighi ghan ni oomo ipẹ bidị kotue bọ olhoghonhaạn aḍighaạgh ookpomhoghan phọ ibadị areten. Nạ aloghoma aani ni iduọn phọ ilọ ookpomhoghan phọ nạ odi bọ?
1. Ighẹn kụ iniin areten dị nạ katue asighẹ mem r’inyaạm anạ aloghonhaạn ḍighaạgh ookpomhoghan phọ?
Oomo phọ ayira kotue ni ologhonhaạn ḍighaạgh ookpomhoghan phọ. Esi omaạm, awe odi ni ookpomhoghan anyinha dị u/moon obobọ mokpọ? Nạ katue ni aloghonhaạn bidị ḍighaạgh pidị bidị otue okị aani ituughạ ḍughụm? Obobọ nạ katue ni aḍighi inhọn araraạr idiphọ oghị aḍighi oghooghinhaan abidị raraạr obobọ oḅaalhamhị otu abidị? (Ibạl Jems 1:27.) Yira kotue kẹn ni omiteom loor oḅaalhamhị r’oḅilhẹ oselhemhi aKindọm Họl phọ. Oye iyira ru/kpaariọm ghan oḍighi iphẹn phọ. Kuolọ yira “rokuọm ghan loor oopho” loor esi dị yira opomhoghiạn Enhaạn r’abumor phọ ayira.—Psalm 110:3.
Abugbaanhaạn dị moḍiiny muụm kotue ni ologhonhaạn ḍighaạgh ookpomhoghan phọ ibadị inhọn areten. Abumor dị osi omhanhanhaạm kotue ni oḍighi bulọ kologhonhaạn ḍighaạgh ikumor awe phọ, kụ esighẹ rekị bidị kotue ni oḍighi ikumor awe. Abumor r’abumaranhi kotue ni olọgh mem oḍighi oghaạph ilọ omhạr phọ esi okumuan idiphọ abukọy eten. Abunhọn kotue ni ologhonhaạn ḍighaạgh odoghoḍi aruutu iiseeny obobọ oghị ekpisi dị ewaạm mọ ebụgh.
2. Ika kụ idị yira kotue osighẹ raraạr dị yira omhoọgh ḅilhẹ r’ikpoki ayira ologhonhaạn ḍighaạgh ookpomhoghan phọ?
Yira kotue ni osighẹ ‘raraạr phọ yira omhaghamhị bọ maạr okuenhiom aZihova.’ (Proverbs 3:9) Olhoghi ayira raḅaạl ghan ni osogh aani ikpoki r’inhọn araraạr dị yira omhaghamhị maạr olhoghonhaạn aḍighaạgh ookpomhoghan phọ r’oḍighi oghaạph iiḅi iinhaghạn phọ. (Ibạl 2 Korịnt 9:7.) Rosighẹ ghan ni ikpoki phọ iphẹn phọ kolhoghonhaạn ḍighaạgh we dị ekperenhom iiḅaghamhị emitenhaan. Ibadị osopha oseere ghan iyaạr ogbạl, obọ bidị omoọgh iyaạr osogh aani ghan. (Ibạl 1 Korịnt 16:2.) Yira kotue ni osogh ikpoki olọgh igbe phọ edi ghan bọ siphẹ ariisi iiseeny phọ ayira obobọ siphẹ intanẹt phọ dị eego esi jw.org. AZihova ungọ ni iyira eepoogh oḍeenhaan mọ yira opomhoghiạn ni nyodị esi omhaạr oḍighinhom araraạr phọ yira omhoọgh bọ.
OLHEGHERI OBUGHẸ
Ooḅeghiọn iniin areten dị yira kotue ologhonhaạn aani ḍighaạgh ookpomhoghan phọ.
3. Yira kotue ni osighẹ raraạr dị yira omhoọgh ḅilhẹ r’ikpoki ayira ologhonhaạn ḍighaạgh ookpomhoghan phọ
AZihova r’aZizọs opomhoghiạn oye dị rangọ ghan r’ophooph olhoghi. Esi omaạm, aZizọs asẹph ni ekpukelhe anhịr dị asọgh iịny ikpoki dị amhoọgh. Ibạl Luk 21:1-4, kụ eeḅeghiọn sipuru phọ iphẹn:
-
Ewạ ni dị iisogh phọ ayira kebụgh iboom kụ egbi oḅeraạn aZihova ḍughụm?
-
Retọl ghan ika esi aZihova r’aZizọs mem dị yira osogh r’ophooph olhoghi?
Olhegheri iyaạr phọ roḍighinhom ghan bọ iisogh phọ ayira, ipegh VIDIO phọ. Kụ eeḅeghiọn ḍipuru phọ edaphạn bọ siẹn.
-
Ika kụ idị rosighẹ ghan iisogh phọ kologhonhaạn ḍighaạgh rookpomhoghan phọ edi bọ oomo isiẹn aḅirinhi phọ?
4. Yira kotue ni omiteom loor olhoghonhaạn aḍighaạgh
Iḍiodi phọ, arebenhẹ aZihova r’oophugh umhaạr ghan ni ophạm riisi phọ orọl ghan bọ ooseeny aZihova. Kuolọ iphẹn phọ epelhom osogh ghan ikpoki bịn. Ibạl 2 Chronicles 34:9-11, kụ eeḅeghiọn ḍipuru phọ aḍiẹn:
-
Ika kụ edị torobọ onyọ Izrạl alhoghonhaạn aani ḍighaạgh omhaạr ophạm otu iiseeny phọ aZihova?
Omhiịn idị Abugbaanhaạn aZihova rodaphạn ghan eten phọ epẹ phọ, Ipegh VIDIO phọ. Kụ eeḅeghiọn sipuru phọ edaphạn bọ siẹn.
-
Uḍighi ika kụ emạn bọ ni maạr omhaạr oḅaalhamhị r’oselhemhi ghan aKindọm Họl phọ ayira?
-
Ighẹn kụ iniin areten dị nạ katue aloghonhaạn aani ḍighaạgh?
5. Abumor kotue ni okumuan osi esi ophạm inhọn iiḍighi
Igẹ Iigbia phọ eḅenhị bumor phọ mọ oḍighi oomo ipẹ bidị kotue bọ olhoghonhaạn aḍighaạgh ookpomhoghan phọ. Omhiịn eniin eḍeenhaan pọ, ipegh VIDIO phọ. Kụ eeḅeghiọn ḍipuru phọ edaphạn bọ siẹn.
-
Siphẹ avidio phọ, aRyan aḍighi eeghe orue okumuan osi esi dị kaloghonhaạn ḍighaạgh ookpomhoghan phọ agey?
ABaibul phọ akaạph ni raraạr dị kopogh kụ omạ onyọ umor okumuan idiphọ odị kaloghonhaạn ḍighaạgh ikumor awe phọ obobọ okumor oye. Ibạl 1 Timoti 3:1-13, kụ eeḅeghiọn sipuru phọ iphẹn:
-
Onyọ umor dị rawạ okumuan idiphọ odị kaloghonhaạn ḍighaạgh ikumor awe phọ obobọ idiphọ okumor oye kaḍighi eeghe orue oteẹny aḍiigbu phọ?
-
Adọl eghunotu phọ abidị ketọl ika?—Miịn siikpịgh phọ 4 r’11.
-
Mem dị abumor phọ okumuan osi esi ophạm inhọn iiḍighi, ookpomhoghan phọ romooghọm ghan ika suọ?
OYE ATUE NI APURU MỌ: “Abugbaanhaạn aZihova romoọgh ghan ika ikpoki phọ roḍighinhom ghan bọ iiḍighi phọ abidị?”
-
Nạ kapagharanhaạn ika?
OGHAẠPH OOKARAGH
AZihova rasereghiạn ni ikuph phọ yira rolọgh ghan bọ osighẹ amem, inyaạm r’araraạr phọ yira omhoọgh bọ olhoghonhaạn aḍighaạgh ookpomhoghan phọ.
Ooḅula
-
Ika kụ idị yira kosighẹ mem r’inyaạm ayira ologhonhaạn ḍighaạgh ookpomhoghan phọ?
-
Ika kụ idị yira kotue osighẹ raraạr dị yira omhoọgh ologhonhaạn ḍighaạgh ookpomhoghan phọ?
-
Ighẹn areten kụ edị nạ rawạ olhoghonhaạn aḍighaạgh ookpomhoghan phọ?
WAAGHỊ AMHIỊN
Miịn iyaạr phọ eḍighi bọ kụ Enhaạn ra/wạ bọ dị arebenhẹ odị kosogh ghan ḍioph abin.
“ABaibul Phọ Akaạph Eeghe Ilọ Ongọ Ghan Aḍioph Abin?” (Edi intanẹt)
ABaibul phọ aḅẹm ni mọ abumor dị moḍiiny muụm kụ ophạm iniin iiḍighi. Kuolọ kokaạph ika eḍighi maạr dị ewạ mọ onyọ umaranhi dị maḍiiny muụm kụ aḍighi iiḍighi phọ iphẹn phọ?
“Naghanhạn Oḍighi Abuḍiemhiom Mọ Siẹn Ookpomhoghan Phọ” (Otu Okoriom, February 2021)
Miịn idị abuniin Abugbaanhaạn ophinyọn rikiạ orue osighẹ arinyạ oghiomaạn buḅaramạ omheeraam mọ abidị.
Miịn ipẹ yira romoọgh ghan bọ ikpoki oḍighinhom oḍighi phọ ayira, eten dị egbatanhaạn r’ipẹ inhọn aruukụ iiḅereghị roḍighi ghan bọ.
“Ipẹ Abugbaanhaạn AZihova Romoọgh Ghan Bọ Ikpoki Oḍighinhom Oḍighi Phọ Abidị?” (Edi intanẹt)
