CƐ̃́Ɛ́-ÐƐ̀ 55
Kpá Nì Dyí-Poìn-Kpòòɔ̀ Gbo
Ðé ɓóɖó-kpàà dà séín nyɛɛ, nyɔ méɔ̀ùn ɓè ɓiè Jɛhova ɖé múà mú ɖé dyí-poìn-kpòò táázĩ̀ìn ɓè mú. Wa po Geɖepɔɔ zùo ɓó náún-po-wùɖù kè hwìè-da-zàìn-zàìn ɓè wa dyé kɛɛ jè, ké wa kpá dyí-poìn-kpòòɔ̀ gbo ɖé hwìè pàɖà ɓè mú. Kà nì hwòɖòɔ̀ nì ɓá nì dyí-poìn-kpòòɔ̀ jè dyíì?
1. Ðɛ́ mɔ̀ hwìè ɖíɛ́ ɓè kɔ̃̀ mú ɓɛ́ m̀ ɓɛ́ìn nì tiɔ̀ kè nì ganaɔ̀ kũ̀à mú nyùɛ̀n ɓɛ́ m̀ ké dyí-poìn-kpòòɔ̀ gbo kpá kɛ́?
À séín ɓɛ́ìn gbo-kpá-sɔ̃̀ tòɛ̀ ɖé dyí-poìn-kpòòɔ̀ mú. Ɔ hwɔìn-kà, nyɔ ɖíɛ́ ɓè nì ɖé nì dyí-poìn-kpòòɔ̀ mú ɓɛ́ wa mɔ̀ nyɔ sùà mɔɔ wa se kpé ɓɛ́ìn nyɛ́ɛ̀? M̀ ɓɛ́ìn wa gbo kpáa ɓɛ́ wa ké dyí-poìn-poìn ɓèɔ̀ mú muù? Mɔɔ m̀ ɓɛ́ìn wa gbo kpáa ɓó ɖɛ tɔ̀ɔ̀ ɓè nyu jèè, hwɔìn kà ɖɛ-dɔ̃-dɔ̃ mɔɔ taún-kũ̀à nyu-nyuù? (Zà Jĩ́ìn 1:27 wuɖuún.) À ɓɛ́ìn à mìɔùn tòɛ̀ ɖekè ɓó à Kĩ́dɔ̃̀ Hɔ́ɔ̀ɔ̀ xwai nɔ̀mɔ̀ìn jè. Nyɔ ɖò ní kpɔ̃̀ìn à ganaún ɓó ɖɛ ɓè nìà kɛ nyu jè. Ðɛ̀ɓɛ̀ìn-ɖɛ̀ɓɛ̀ìn ɓó Geɖepɔɔ kè à ɖíí ɓèɔ̀ bììɛɛ mɔ̀ nyɔ po à kpéí, ɓɛ́ à ké ‘à mìɔùn tò hwòɖòɛ̀-ɖé-hwɛ̀-kà.’—Wɛ́ɖɛ́ 110:3.
Jɛhova Zàse ɓè ɓɛ́ wa ɖà níɔ kpá kɛɛ ɓɛ́ìn dyí-poìn-kpòòɔ̀ gbo kpáa ɖé hwìè kà kò ɖò ɓè mú ɖe. Ðíí-gàà ɓè ɓɛ́ wa hwɛ̀ ɖɛ ɖé zùùɔ̀ wáká kɔ̃ɛɛ ɓɛ́ìn mìnìsíwɔ́ɖɔ̀ sɛ́vɛ́ìn ɓè jùɛ, ké ti wè ɖà ziín, wa ɓɛ́ìn ɛ́ɖɔ̀ ɓè jùɛ. Ðíí-gàà kè ɖíí-màà ɓè ɓɛ́ìn Geɖepɔɔ-wùɖù-wáɖá-kũ̀àɔ̀ sɔ̃ xwíɖíi dèɛ̀ dyììn ɖé pàníɛ̀ ɓè jù-jù mú. Jɛhova Zàse ɖíɛ́ ɓè ɓɛ́ìn gbo-kpá-sɔ̃̀ tòɛ̀ dyììn ɖé ɓiè-naín ɓè po-po mú, mɔɔ wa ɓɛ́ìn dyí-poìn-kpòò ɖò ɓɛ́ ɔ mɔ́ gbo-kpá-kpá ɖé hwìè tɔ̀ɔ̀ ɓè múɛɛ mú jàɖàìn.
2. Xwɛ̀ à ɓɛ́ìn à kɔ̃̀ɔ̀-ɖɛ̀ ɓè kũ̀à mú nyùɛ̀n ɓɛ́ à ké dyí-poìn-kpòòɔ̀ gbo kpá kɛ́?
À mɛ “dè [Jɛhova] dya dyììn ɖé [à] kɔ̃̀ɔ̀-ɖɛ̀ ɓèɔ̀ mú.” (Nɔ́ɔ́ 3:9) Ɔ mɔ̀ dya-dè-dè ɓó à bìì ɓɛ́ à ké wíɖí kè kɔ̃̀ɔ̀-ɖɛ̀ tɔ̀ɔ̀ ɓè tò ɓó dyí-poìn-kpòòɔ̀ kè Geɖepɔɔ-wùɖù-wáɖá-kũ̀à nìà ɖé ɓóɖó-kpàà da séín nyɛɛ gbo kpá jè. (Zà 2 Kɔ̀ɖéíntĩ̀ɔ̀ 9:7 wuɖuún.) Wa nyùìn à nyíí-ɖɛ̀ ɓèɔ̀ kũ̀à mú ɖekè ɓɛ́ wa ké nyɔ ɓè ɓɛ́ gà-ɖɛ̀ ɓè kpá gboɛɛ gbo kpá. Nyɔ pàɖà ɓè mɔ̀ùn “po wíɖí ɖò wáká” ti séín ɓó nyíí-ɖɛ̀ tò jè. (Zà 1 Kɔ̀ɖéíntĩ̀ɔ̀ 16:2 wuɖuún.) À ɓɛ́ìn nyíí-ɖɛ̀ ɖé nyíí-ɖɛ̀ gbɔ̀ɖɔ̀ɔ̀ ɓè nìà à ɓiè-naín ɓèɔ̀ kɛɛ mú poɛ, mɔɔ à ɓɛ́ìn ɖúú kɔ̃ tòɛ̀n ɖé donate.pr418.com kɔ̃. Jɛhova nyí à ti nɔ̀mɔ̀ dyíin ɓɛ́ à kéɛ tɛ̀mɛ̀ìn kà à ɖɛ̀ɓɛ̀ ɔ múɛ dyììn ɖé kà à nyu à kɔ̃̀ɔ̀-ɖɛ̀ ɓèɔ̀ kũ̀à mú nyùɛ̀n nyɛɛ mú.
ÐE ÐƐ MÚIN CÁ
Cɛ̃́ hwìè ɖíɛ́ ɓè kɔ̃̀ mú ɓɛ́ m̀ ɓɛ́ìn dyí-poìn-kpòòɔ̀ gbo kpáa kɛɛ jè.
3. À ɓɛ́ìn à kɔ̃̀ɔ̀-ɖɛ̀ ɓèɔ̀ kũ̀à mú nyùɛ̀n
Jɛhova ɖɛ̀ɓɛ̀ nyɔ kɔ̃̀ hwòɖò dè dyi ké ɔ nyí ɔ ɖɛ kɛɛ mú, ké kàà Jízɛ̀ hwòɖò nyu nìɛ̀ ɖekè. Ɔ hwɔìn-kà, Jízɛ̀ dè ma jɔ̀ɔ̀-màà dyé gà ɖò ɓɛ́ ɔ vɔ̃ ɔ ké ma nyíí-ɖɛ̀ tòɛɛ dyéɖé gbo. Zà Ðúù 21:1-4 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
-
À kɔ̃̀ à ké nyíí-ɖɛ̀ pàɖà tò hwɛ̀ à ké Jɛhova hwòɖò dyi dèè?
-
Xwɛ̀ Jɛhova kè Jízɛ̀ hwòɖò nyu nìɛ̀ ɓá à hwòɖòɛ̀-wĩ́ín-nyíí-ɖɛ̀ ɓèɔ̀ jè dyíɛ́?
Ɓɛ́ m̀ ké kà wa nyu à nyíí-ɖɛ̀ ɓèɔ̀ kũ̀à mú nyùɛ̀n nyɛɛ jè cɛ̃́ ní, po VÍÐÒƆ̀ kũ̀à gbo. Nìí, ɓè dèìn dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in.
-
Xwɛ̀ wa nyu nyíí-ɖɛ̀ ɓèɔ̀ kũ̀à mú nyùɛ̀n ɓɛ́ ɔ ké dyí-poìn-kpòò ɓè nì ɓóɖó-kpàà dà séín nyɛɛ kpáná dyí nyu kɛ́?
4. À ɓɛ́ìn à mìɔùn tòɛ̀ ɓɛ́ à ké gbo-kpá-sɔ̃̀ tò
Ðé ti sùà múɛɛ, Jɛhova ɓiè-nyɔ̀ ɓèɛ̀ hwòɖò-dyùà nyu ma cà-cà, ɓɛ́ wa ké ma waà ɓiè-naín ɓèɔ̀ xwai nɔ̀mɔ̀ìn. Kɛɛ, ɖɛ nìà kɛ se ma wíɖí tò-tò ɖòùn pu. Zà 2 Kánáníkɔ̀ 34:9-11 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
-
Xwɛ̀ Éézùɖùɛ̀-nyɔ̀ séín ɓèɔ̀ nyu ma gbo-kpá-sɔ̃̀ tòɛ̀ ɓó Jɛhova gbòɔ̀ gbo gmɔ̀ jè kɛ́?
Ɓɛ́ m̀ ké kà Jɛhova Zàse ɓè nyu ɖɛ wa nyu maà ɖé ti sùà múɛ kíɖíí síɛ kɛ dyé ní, po VÍÐÒƆ̀ kũ̀à gbo. Nìí, ɓè dèìn dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in.
-
Xwíníínɔ̀ nyɛ́ kɔ̃̀ jè ɔ kpaà ɖɛ ɓɛ́ à kéà à Kĩ́dɔ̃̀ Hɔ́ɔ̀ɔ̀ xwai nɔ̀mɔ̀ìn teeɛ́?
-
Ðɛ́ mɔ̀ hwìè ɖíɛ́ ɓè kɔ̃̀ mú m̀ ɓɛ́ìn gbo-kpá-sɔ̃̀ tòɛ̀ kɛ́?
5. Ðíí-gàà ɓè ɓɛ́ìn nyuɛ ɓɛ́ wa ké kpé ɓɛ́ìn ɓó kũ̀à pàɖà nyu jè ɖé dyí-poìn-kpòòɔ̀ mú
Baɓoɔ po Kɛ́ɖɛ́ì ɖeín-sí-gàà ɓè kpéí, ɓɛ́ wa ké kpé ɓɛ́ìn ɓɛ́ wa ké ɖɛ séín wa ɓɛ́ìn nyuɛ ɓɛ́ wa ké dyí-poìn-kpòòɔ̀ gbo kpá kɛɛ nyu. Ɓɛ́ m̀ ké ɔ hwɛìn-ɖɛ̀ ɖò dyé ní, po VÍÐÒƆ̀ kũ̀à gbo. Nìí, ɓè jù dyi-diè-ɖɛ̀ kɔà ɓó dyíɛɛ gɔ̃̀.
-
Ðé víɖòɔ̀ múɛɛ, xwɛ̀ Waɖanyá nyu ma kpé ɓɛ́ìn ɓɛ́ ɔ ké ma dyí-poìn-kpòòɔ̀ gbo kpá mìɔ kɛ́?
Baɓoɔ zaìn ɖɛ ɖíí-gàà ɓé mɛ nyu ɓɛ́ wa ké kpé ɓɛ́ìn ɓɛ́ wa ké mìnìsíwɔ́ɖɔ̀ sɛ́vɛ́ìn kè ɛ́ɖɔ̀ ɓè jùɛɛ jè kɔ̃in. Zà 1 Tímétè 3:1-13 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:
NYƆ ÐÒ ƁƐ́ÌN NÍIŃ: “Xwɛ̀ Jɛhova Zàse ɓè nyu xwíɖí dyéɛ ɓó waà kũ̀àɔ̀ jè kɛ́?”
-
Xwɛ̀ nì muɛ gɔ̃̀ jùùn wɛ̃́?
SṸÌN-XWÍNÍÍN
Ɔ po Jɛhova múàùn mìɔ ɓɛ́ à ké à ti kè gana ɔ kè à kɔ̃̀ɔ̀-ɖɛ̀ ɓè kũ̀à mú nyùìn, ɓɛ́ à ké dyí-poìn-kpòòɔ̀ gbo kpá.
Ðɛ-kɔ̃in-kpa-kpa
-
Xwɛ̀ à ɓɛ́ìn à ti kè à gana kũ̀à mú nyùɛ̀n ɓɛ́ à ké dyí-poìn-kpòòɔ̀ gbo kpá kɛ́?
-
Xwɛ̀ à ɓɛ́ìn à kɔ̃̀ɔ̀-ɖɛ̀ ɓè kũ̀à mú nyùɛ̀n ɓɛ́ à ké dyí-poìn-kpòòɔ̀ gbo kpá kɛ́?
-
Hwìè nyɛ́ ɓè kɔ̃̀ mú nì muɛ mɔ́ùn ɓɛ́ m̀ ké dyí-poìn-kpòòɔ̀ gbo kpá kɛ́?
CƐ̃́ ÐƐ PÀÐÀ
Cɛ̃́ xwíníín kɔ̃̀ jè Geɖepɔɔ seà ɔ ɓiè-nyɔ̀ ɓè nìà zɛ̃̀ɛ̀ kɛɛ gbo cɛ̃ ɓɛ́ wa kéà ɓàɖàìn-bùè tò kɛ.
“Ðɛ́ Baɓoɔ Cɛ̃ Ɓá Ɓàɖàìn-Bùè Tò Jè Dyíɛ́?” (Ðúú-kɔ̃-cèè-ɖɛ̀)
Baɓoɔ nyí gàa ɓè ɖà níɔ kpá kɛɛ kũ̀à ɖíɛ́ ɓè. Kɛɛ, ɔ jù ké màa ɖò ɖà níɔ kpá kɛɛ dyi kɔ̃̀ ɔ kũ̀à ɓèa nyu ní ɖé?
Kɔ̃in Nì Jè Múin-Wɔ̃́-Wɔ̃́ Ðé Dyí-Poìn-Kpòòɔ̀ Mú” (Dyí-Gmɔ̀ìn-Gbò-Cèè-Ðɛ̀ɔ̀, Fóɖó-Vĩ̀ 2021)
Cɛ̃́ Jɛhova Zàse ku dúún ɖíɛ́ ɓè ɓɛ́ wa dyé gà ɓɛ́ wa ké céè-ɖɛ̀ ɓè ɓá Baɓoɔ dyíɛ wa ɖíí jàà-po-nyɔ̀ ɓè gbo kpa kɛɛ jè.
Céè-Ðɛ̀ Ɓè Ɓá Baɓoɔ Dyíɛ Ðíí Ɓèɔ̀ Gbo-Kpa-Kpa Ðé Kóúnkò-ɓòɖòɔ̀ kɔ̃ (4:25)
Cɛ̃́ kà à nyu wíɖí dyéɛ ɓó à kũ̀àɔ̀ jè ɓɛ́ ɔ kò ɓó ɓiè-kpòò tɔ̀ɔ̀ ɓè gboɛɛ jè.
“Xwɛ̀ Jɛhova Zàse Ɓè Nyu Wíɖí Dyéɛ Ɓó Wa Kũ̀àɔ̀ Jè Kɛ́?” (Ðúú-kɔ̃-cèè-ɖɛ̀)
