LECCION 55
Suporta con el Congregacion
Na entero mundo, millones de maga gente alegre ta sirvi con Jehova na miles de maga congregacion. Ta aprecia sila con el instruccion y guia que ta ricibi sila. Y quierre gayot sila suporta con el congregacion na mucho manera. Ansina ba tambien tu quierre hace na de ustedes congregacion?
1. Cosa el cuanto manera que puede tu usa de tuyu tiempo y fuerza para suporta con el congregacion?
Todo kita puede ayuda na congregacion. Por ejemplo, tiene ba na de ustedes congregacion quien tiene fisical limitacion o de edad ya? Puede ba tu ayuda kanila para puede sila anda na maga miting o ayuda kanila na otro practical manera igual como na cumprada o limpiada? (Le con el Santiago 1:27.) Puede tambien kita man voluntario para ayuda limpia o mentena con el Kingdom Hall. Nuay kanaton quien ta forza para hace con ese maga cosas. El amor para con Dios y con el diaton maga hermano amo kanaton ta manda move para “ofrece con el [diaton] mismo cuerpo.”—Salmo 110:3.
El maga bautizao Testigo puede suporta con el congregacion na otro pa maga manera. El maga cualificao hermano puede sirvi como maga siervo ministerial y maga anciano. El maga hermano y hermana puede tambien suporta con el trabajo predicacion si man pioneer sila. El cuanto maga Testigo puede ayuda construi maga lugar de adoranza o cambia na un lugar donde el un congregacion ta necesita ayuda.
2. Paquemodo kita puede usa con el diaton material cosas para suporta con el congregacion?
Puede kita “honra con Jehova por medio na [diaton] valuable cosas.” (Proverbio 3:9) Un privilegio que puede kita contribui sen y otro pa maga material cosas para suporta con el congregacion y con el trabajo predicacion na entero mundo. (Le con el 2 Corinto 9:7.) El diaton maga donacion ta usa tambien na disaster relief. Manada ta iscuji que regular ‘esconde cuanto cantidad’ para dona. (Le con el 1 Corinto 16:2.) Puede kita dona na cajon de contribucion na maga lugar de adoranza o na online na donate.pr418.com. Ta dale kanaton oportunidad si Jehova para dale mira diaton amor para con ele por medio na diaton usada del material cosas.
APRENDE PA MAS
Considera con el cuanto manera que puede tu suporta con el congregacion.
3. Puede kita usa con el diaton material cosas
Si Jehova y si Jesus ta ama con aquellos quien alegre ta dale. Por ejemplo, si Jesus ya comenda con el pobre viuda que ya hace esfuerzo para dale contribucion con Jehova. Le con el Lucas 21:1-4 y despues, discuti con este maga pregunta:
-
Necesita ba kita dona grande cantidad para hace alegre con Jehova?
-
Cosa si Jehova y si Jesus ta sinti si con todo corazon kita ta dona?
Para sabe si paquemodo ta usa con el diaton donacion, man play con el VIDEO. Despues, discuti con este pregunta.
-
Paquemodo ta usa con el maga donacion para puede beneficia el maga congregacion na entero mundo?
4. Puede kita man voluntario para ayuda
Na tiempo del Biblia, el maga siervo de Jehova ya hace gayot esfuerzo para mentena con el maga lugar de adoranza. Pero, nuay lang sila basta contribui sen. Le con el 2 Cronicas 34:9-11 y despues, discuti con este pregunta:
-
Paquemodo el maga Israelita ya ayuda para cuida con el casa de Jehova o con el lugar de adoranza?
Para mira si paquemodo el maga Testigo de Jehova ta sigui con el ejemplo na Biblia, man play con el VIDEO. Despues, discuti con este maga pregunta.
-
Porque importante que mentena kita limpio y na buen condicion el diaton Kingdom Hall?
-
Na cosa maga manera tu puede ayuda?
5. El maga hermano puede pricura tene omento responsibilidad
El Biblia ta anima con el maga Cristiano hombre que pricura tene omento responsibilidad para suporta con el congregacion. Para mira un ejemplo, man play con el VIDEO. Despues, discuti con el pregunta.
-
Na video, paquemodo si Ryan ya pricura suporta pa mas na congregacion?
El Biblia ta explica si cosa el maga cualificacion para con el maga hermano quien ta sirvi como maga siervo ministerial y anciano. Le con el 1 Timoteo 3:1-13, NWT y despues, discuti con este maga pregunta:
-
Cosa el maga cualificacion para na maga hermano quien quierre sirvi como maga siervo ministerial y anciano?
-
Cosa ta expecta el Biblia na diila familia?—Mira con el versiculo 4 y 11.
-
Si el maga hermano ta pricura alcanza con este maga cualificacion, paquemodo el todo na congregacion ta beneficia?
POSIBLE TIENE QUIEN PREGUNTA: “Onde ta saca sen el maga Testigo de Jehova para suporta con el diila trabajo?”
-
Cosa tu hay contesta?
SUMARIO
Si Jehova ta aprecia gayot con el diaton maga esfuerzo para suporta con el congregacion por medio na diaton tiempo, fuerza y maga material cosas.
Repaso
-
Paquemodo kita puede usa con el diaton tiempo y fuerza para suporta con el congregacion?
-
Paquemodo kita puede usa con el diaton material cosas para suporta con el congregacion?
-
Na cosa maga manera tu quierre suporta con el congregacion?
SABE PA MAS
Considera si porque el Dios gendeh mas ta pidi con el de suyu maga siervo diez por ciento.
“Cosa el Biblia Ta Habla Acerca na Dalida de Diez Por Ciento?” (Articulo na website)
Ya menciona el Biblia que tiene maga assignment para lang na maga bautizao hermano. Pero, paquemodo si necesita este hace el un bautizao hermana?
“El Autoridad del Maga Anciano na Congregacion” (El Torre De Guardia, Febrero 2021)
Conoce con el cuanto hermano quien ya hace grande sacrificio para lleva con el maga publicacion na diila maga hermano y hermana.
Gendeh igual na otro religion, onde kita ta saca pondo para suporta con el diaton trabajo?
“Onde Estaba el Pondo que Ta Usa el Maga Testigo de Jehova na Diila Trabajo?” (Articulo na website)
Baka Gusta Tambien Tu
MAGA COMON PREGUNTA
Cosa el Bible Study que Ta Ofrece el Maga Testigo de Jehova?
Na programa de Bible study que ta ofrece el maga Testigo de Jehova, puede tu usa maskin cosa translation de Biblia. Puede tu invita con el de tuyu entero familia o maskin quien amigo para man junto contigo.
