មេរៀនទី៥៥

ចូរជួយគាំទ្រក្រុមជំនុំរបស់អ្នក

លេង

នៅជុំវិញពិភពលោក សាក្សីព្រះយេហូវ៉ាមានរាប់ពាន់ក្រុមជំនុំ ហើយមនុស្សរាប់លាននាក់សប្បាយគោរពប្រណិប័តន៍ព្រះនៅទីនោះ។ ពួកគេដឹងគុណព្រះដែលលោកផ្ដល់ការអប់រំនិងការណែនាំតាមរយៈក្រុមជំនុំ។ ម្ល៉ោះហើយ ពួកគេខំព្យាយាមជួយគាំទ្រក្រុមជំនុំតាមរបៀបជាច្រើន។ តើអ្នកមានអារម្មណ៍ដូច្នោះទេចំពោះក្រុមជំនុំរបស់អ្នក?

១. តើអ្នកអាចប្រើពេលវេលានិងកម្លាំងដើម្បីជួយគាំទ្រក្រុមជំនុំតាមរបៀបណាខ្លះ?

យើងទាំងអស់គ្នាអាចជួយក្រុមជំនុំបាន។ ជាឧទាហរណ៍ តើនៅក្នុងក្រុមជំនុំរបស់អ្នកមានបងប្អូនវ័យចាស់និងបងប្អូនដែលមានសុខភាពខ្សោយឬទេ? បើមាន តើអ្នកអាចជួយទៅយកពួកគាត់ឲ្យចូលរួមកិច្ចប្រជុំឬទេ? ឬតើអ្នកអាចជួយពួកគាត់តាមរបៀបផ្សេងទៀត ដូចជាទៅផ្សារទិញអីវ៉ាន់ឲ្យពួកគាត់ឬជួយសម្អាតផ្ទះឲ្យពួកគាត់ទេ? (សូមអាន យ៉ាកុប ១:២៧) យើងក៏អាចស្ម័គ្រចិត្តជួយសម្អាតនិងថែទាំសាលប្រជុំរបស់យើងដែរ។ គ្មានអ្នកណាម្នាក់បង្ខំយើងឲ្យធ្វើអ្វីទាំងនេះទេ។ ប៉ុន្តែ សេចក្ដីស្រឡាញ់ចំពោះព្រះនិងចំពោះបងប្អូន ជំរុញចិត្តយើងឲ្យ«ស្ម័គ្រចិត្ត»ជួយ។—ចម្រៀងសរសើរព្រះ ១១០:៣

អ្នកដែលបានទទួលការជ្រមុជទឹកជាសាក្សី អាចជួយគាំទ្រក្រុមជំនុំតាមរបៀបផ្សេងៗទៀត។ បងប្អូនប្រុសដែលមានគុណសម្បត្តិគ្រប់គ្រាន់អាចបម្រើជាជំនួយការខាងកិច្ចបម្រើ ហើយក្រោយមកជាអ្នកចាស់ទុំ។ ទាំងបងប្អូនប្រុសទាំងបងប្អូនស្រីអាចគាំទ្រកិច្ចផ្សព្វផ្សាយយ៉ាងសកម្ម ដោយបម្រើជាអ្នកត្រួសត្រាយពេញពេល។ បងប្អូនខ្លះអាចជួយសាងសង់កន្លែងគោរពប្រណិប័តន៍ព្រះ ឬរើទៅក្រុមជំនុំណាដែលត្រូវការជំនួយ។

២. តើយើងអាចប្រើធនធានរបស់យើងដើម្បីគាំទ្រក្រុមជំនុំតាមរបៀបណា?

យើងអាច«លើកកិត្តិយសព្រះយេហូវ៉ា ដោយជូនរបស់មានតម្លៃទៅលោក»។ (សុភាសិត ៣:៩) ការជូនវិភាគទាននិងការប្រើធនធានឯទៀតដើម្បីគាំទ្រក្រុមជំនុំនិងកិច្ចការផ្សព្វផ្សាយនៅទូទាំងពិភពលោក គឺជាឯកសិទ្ធិមួយសម្រាប់យើង។ (សូមអាន កូរិនថូសទី២ ៩:៧) វិភាគទានរបស់យើងក៏បានត្រូវប្រើពេលមានមហន្តរាយដែរ។ បងប្អូនជាច្រើនបានសម្រេចចិត្ត«ទុករបស់ទ្រព្យខ្លះដោយឡែក» ដើម្បីជូនវិភាគទានជាទៀងទាត់។ (សូមអាន កូរិនថូសទី១ ១៦:២) យើងអាចដាក់វិភាគទានក្នុងប្រអប់វិភាគទាននៅកន្លែងគោរពប្រណិប័តន៍របស់យើង ឬតាមប្រព័ន្ធអ៊ីនធឺណិតដោយចូលគេហទំព័រ donate.pr418.com។ ព្រះយេហូវ៉ាផ្ដល់ឱកាសឲ្យយើងបង្ហាញសេចក្ដីស្រឡាញ់ចំពោះលោក តាមរបៀបដែលយើងប្រើទ្រព្យសម្បត្តិរបស់យើង។

បង្កើនចំណេះ

សូមពិចារណាវិធីខ្លះដែលអ្នកអាចជួយគាំទ្រក្រុមជំនុំ។

៣. យើងអាចប្រើទ្រព្យសម្បត្តិរបស់យើង

ព្រះយេហូវ៉ាស្រឡាញ់អ្នកដែលឲ្យដោយចិត្តសប្បាយ ហើយលោកយេស៊ូក៏មានអារម្មណ៍ដូច្នោះដែរ។ ជាឧទាហរណ៍ លោកយេស៊ូបានសរសើរស្ត្រីមេម៉ាយក្រីក្រម្នាក់ដែលបានជូនអ្វីបន្តិចបន្តួចដែលនាងមានដល់ព្រះយេហូវ៉ាដោយស្មោះអស់ពីចិត្ត។ សូមអាន លូកា ២១:១-៤ រួចពិភាក្សាសំណួរដូចតទៅ៖

តើទាល់តែជូនវិភាគទានច្រើន ទើបធ្វើឲ្យព្រះយេហូវ៉ាពេញចិត្តឬ?
តើព្រះយេហូវ៉ានិងលោកយេស៊ូមានអារម្មណ៍យ៉ាងណាចំពោះវិភាគទានដែលយើងជូនដោយស្ម័គ្រពីចិត្ត?

សូមរៀនថាតើវិភាគទានរបស់យើងបានត្រូវប្រើសម្រាប់អ្វីខ្លះ? លេងវីដេអូ។ រួចពិភាក្សាសំណួរដូចតទៅ៖

វីដេអូ: ‹ការថ្វាយដល់ព្រះយេហូវ៉ា› (៤:៤៧)

តើវិភាគទានបានត្រូវប្រើជាប្រយោជន៍ដល់ក្រុមជំនុំនៅទូទាំងពិភពលោកតាមរបៀបណាខ្លះ?

៤. យើងអាចស្ម័គ្រចិត្តក្នុងការជួយ

ការជួយមិនគ្រាន់តែជាការជូនវិភាគទានប៉ុណ្ណោះទេ។ ជាឧទាហរណ៍ នៅសម័យគម្ពីរ អ្នកបម្រើព្រះយេហូវ៉ាក៏ខ្នះខ្នែងក្នុងការថែទាំកន្លែងគោរពប្រណិប័តន៍ព្រះដែរ។ សូមអាន ប្រវត្តិហេតុទី២ ៣៤:៩-១១ រួចពិភាក្សាសំណួរនេះ៖

តើជនជាតិអ៊ីស្រាអែលម្នាក់ៗជួយថែរក្សាវិហាររបស់ព្រះឬកន្លែងគោរពប្រណិប័តន៍លោកតាមរបៀបណាខ្លះ?

សូមមើលរបៀបដែលសាក្សីព្រះយេហូវ៉ាធ្វើតាមគំរូពីសម័យបុរាណ។ លេងវីដេអូ។ រួចពិភាក្សាសំណួរដូចតទៅ៖

វីដេអូ: ការថែទាំកន្លែងដែលយើងគោរពប្រណិប័តន៍ព្រះ (៣:៣១)

ហេតុអ្វីជាការសំខាន់ដែលយើងថែរក្សាសាលប្រជុំរបស់យើងឲ្យនៅស្អាតនិងនៅល្អ?
តើអ្នកអាចជួយថែរក្សាសាលប្រជុំតាមរបៀបណាខ្លះ?

៥. បងប្អូនប្រុសអាចខំព្យាយាមរីកចម្រើនដើម្បីទទួលភារកិច្ចថែមទៀត

គម្ពីរលើកទឹកចិត្តបងប្អូនប្រុសឲ្យខំព្យាយាមរីកចម្រើនអស់ពីសមត្ថភាពក្នុងការគាំទ្រក្រុមជំនុំ។ ដើម្បីមើលគំរូមួយ សូមលេងវីដេអូ។ រួចពិភាក្សាសំណួរដូចតទៅ៖

វីដេអូ: បងប្អូនប្រុស ចូរព្យាយាមឲ្យបានកិច្ចការដ៏ល្អប្រសើរ (៥:១៩)

ក្នុងវីដេអូ តើរ៉ាយអិនបានខំព្យាយាមធ្វើអ្វីដើម្បីជួយគាំទ្រក្រុមជំនុំឲ្យអស់ពីសមត្ថភាព?

គម្ពីររៀបរាប់អំពីតម្រូវការសម្រាប់បងប្អូនប្រុសដែលចង់ធ្វើជាជំនួយការខាងកិច្ចបម្រើនិងជាអ្នកចាស់ទុំ។ សូមអាន ធីម៉ូថេទី១ ៣:១-១៣ រួចពិភាក្សាសំណួរដូចតទៅ៖

តើមានតម្រូវការអ្វីខ្លះសម្រាប់បងប្អូនប្រុសដែលខំព្យាយាមរីកចម្រើន ដើម្បីទៅជាជំនួយការខាងកិច្ចបម្រើនិងទៅជាអ្នកចាស់ទុំ?
តើមានតម្រូវការអ្វីខ្លះសម្រាប់ក្រុមគ្រួសាររបស់ពួកគាត់? (សូមមើលខ៤និង១១)
ពេលបងប្អូនប្រុសខំព្យាយាមឲ្យមានគុណសម្បត្តិទាំងនេះ តើបងប្អូនក្នុងក្រុមជំនុំទទួលប្រយោជន៍អ្វីខ្លះ?