THUTO 55

Thuša Phuthego ya Geno

BAPALA

Batho ba bantši lefaseng ka moka, ba thabela go hlankela Jehofa ka diphuthegong tše dintši. Ba kwa tlhahlo yeo ba e hwetšago ka phuthegong e bile ba thuša phuthego ka ditsela tše dintši. Na le wena o ikwa ka tsela yeo ka phuthego ya geno?

1. Ke dilo dife tšeo o ka di dirago go thuša phuthego ya geno?

Ka moka ga rena re ka thuša diphuthego tšeo re lego go tšona. Ka mohlala, ge e ba ka phuthegong ya geno go na le batho bao ba tšofetšego goba bao ba golofetšego, o ka ba thuša go ya dibokeng. Goba o ka ba thuša ka dilo tša go swana le go ba rekela dijo goba go ba hlwekišetša mo ba dulago gona. (Bala Jakobo 1:27.) E bile o ka thuša ge Holo ya geno ya Mmušo e hlwekišwa goba e lokišwa. Ga go na motho yo a re gapeletšago go dira dilo tše ka moka. Eupša ka ge re rata Modimo le bana babo rena le dikgaetšedi, re ‘ithaopela’ go dira dilo tše.—Psalme 110:3.

Dihlatse tša Jehofa tšeo di kolobeditšwego di ka thuša phuthego ka ditsela tše dingwe gape. Bana babo rena bao ba swanelegago, ba ka kgethwa gore e be bahlanka ba bodiredi gomme ge nako e dutše e eya e ka ba bagolo.

2. Re ka šomiša bjang tšhelete ya rena le dilo tšeo re nago le tšona go thekga phuthego ya gabo rena?

Re ka ‘tumiša Jehofa ka dilo tša rena tše bohlokwa.’ (Diema 3:9) Re thabela go thekga diphuthego tša gabo rena le mošomo wa go bolela ditaba tše dibotse lefaseng ka moka, ka go ntšha meneelo le dilo tšeo re nago le tšona. (Bala 2 Bakorinthe 9:7.) Meneelo ye e thuša gape le bana babo rena le dikgaetšedi lefaseng ka moka bao ba wetšwego ke dikotsi tša tlhago. Batho ba bantši ba kgetha go ‘boloka se sengwe ka thoko,’ goba tšhelete, gore ba kgone go dula ba neela. (Bala 1 Bakorinthe 16:2.) Re ka ntšha meneelo ka mapokising a meneelo ao a lego mafelong a rena a borapedi goba ra o ntšha wepesaeteng ya rena ya donate.pr418.com. Jehofa o nyaka gore re mmontšhe gore re a mo rata ka tsela yeo re kgethago go diriša dilo tša rena.

ITHUTE KA MO GO TSENELETŠEGO

Ekwa ka dilo tše dingwe tšeo o ka di dirago gore o kgone go thekga phuthego.

3. Re ka diriša dilo tša rena

Jehofa le Jesu ba rata batho bao ba neelago ba thabile. Ka mohlala, Jesu o ile a reta mosadi wa mohlologadi yo a bego a diila ge a be a mmona a neela ka tšhelete e nyenyane yeo a bego a na le yona. Balang Luka 21:1-4, gomme le boledišaneng ka dipotšišo tše di latelago:

Na re swanetše go neela ka tšhelete e ntši kudu gore re thabiše Jehofa?
Jehofa le Jesu ba ikwa bjang ge ba re bona re neela re thabile?

E le gore o kwe gore meneelo ya rena e dirišwa bjang, bapalang BIDIO ye, gomme le boledišaneng ka potšišo e latelago:

BIDIO: ‘Go Nea Jehofa Mpho’ (4:47)

Meneelo yeo re e ntšhago e thuša bjang bana babo rena le dikgaetšedi lefaseng ka moka?

4. Re ka ithaopela go thuša

Nakong e fetilego, bahlanka ba Jehofa ba be ba šoma ka thata gore ba dule ba hlokometše mafelo a bona a borapedi. Eupša le ge ba be ba neela ka tšhelete, ba be ba dira le dilo tše dingwe gape. Balang 2 Dikoronika 34:9-11, gomme le boledišaneng ka potšišo e latelago:

Moisiraele yo mongwe le yo mongwe o be a dira’ng gore a thuše go hlokomela ntlo ya Jehofa?

E le gore o kwe gore lehono Dihlatse tša Jehofa di ekiša bjang Baisiraele, bapalang BIDIO ye, gomme le boledišaneng ka potšišo e latelago:

BIDIO: Go Hlokomela Mafelo a Rena a Borapedi (3:31)

Ke ka baka la’ng go le bohlokwa gore re dule re hlwekiša Holo ya Mmušo le go e lokiša?
Ke dilo dife tšeo wena o ka di dirago go thuša?

5. Bana babo rena ba ka šoma ka thata gore ba swanelege go ba bahlanka ba bodiredi goba bagolo

Beibele e kgothaletša banna ba Bakriste gore ba šome ka thata go thuša phuthego. E le gore le bone mohlala wa taba ye, bapalang BIDIO ye, gomme le boledišaneng ka potšišo e latelago:

BIDIO: Bana Babo Rena—Katanelang go Fihlelela Modiro o Mobotse (5:19)

Bidiong ye, Matome o ile a dira’ng gore a thuše phuthego ka mo go oketšegilego?

Beibele e hlalosa gore bana babo rena bao ba nyakago go ba bahlanka ba bodiredi goba bagolo, ba swanetše go dira eng gore ba swanelege. Balang 1 Timotheo 3:1-13, gomme le boledišaneng ka dipotšišo tše di latelago:

Bana babo rena bao ba nyakago go ba bahlanka ba bodiredi goba bagolo, ba swanetše go dira’ng gore ba swanelege?
Malapa a bona ona a swanetše go itshwara bjang?—Bona temana 4 le 11.
Ge bana babo rena ba šoma ka thata gore ba dire dilo tšeo go bolelwago ka tšona mo lengwalong le, batho ka moka ka phuthegong ba tlo holega bjang?