LEKTIONA 55

Hawo latchepen nai kreh tu an i tiri Versammlunga?

PLAY

Ap mari phub denna bud serja Versammlunge. Kote sharenn un budrenn bud millione i Jehowes i bachtelo djieha. Len hi i parkedo dji doleske, kai well lenge an o Khetnepen latche laba penlo, hoi lenge o tchatcho drom sikrenna. Bud latchepen well lendar an pengri Versammlunga kerdo. Dikeh tu ninna jaake ap tiri Versammlunga?

1. Har nai tchiwah mer maro tsiro un mari soor an kowa, te kras latchepen an mari Versammlunga?

Hakeno mendar nai krell latchepen an i Versammlunga. Denn an tiri Versammlunga phureder oder nassle phrala un phenja? Nai aneh tu len an o Khetnepen? Nai gineh tu lenge dren? Nai kreh tu pash lende khere djudjo (Dik pal an Jakobo 1:27)? Te well o Jehoweskro Kheer djudjo kerdo, nai djah tu lenge ninna ap o wast. Kote hi kek, kai mendar kamella, te kras kowa — maro kamlepen ap o Debleste un ap mare phralende krella, kai wah “lauter o djiestar” (Gilja 110:3).

Phrala un phenja, kai taufedo hin, nai krenn ninna wawar latcho koowa an i Versammlunga. Kola phrala, kai pal kola biblakre standards djiwenna, nai wenn Budepangre an i Versammlunga oder Phureste. Phrala un phenja nai krenn ninna bud an i Debleskri Budi, te hin le Pioniere. Wawar krenn khera i Jehoweske, un pale wawar djan an i wawar Versammlunga, te nai djan le kote kola phralenge un phenjenge ap o wast.

2. Har nai krah mer materialtiko koowah mari Versammlunga i latchepen?

Mer te dah i Jehowes maro “brawlepastar un ko feteder kolestar,” hoi men hin, sharah mer les (Gosewe Laba 3:9). Mer ham bachteles, te nai wah mer mari Versammlunga koi, un te nai dah tchomone, te nai well i Debleskri Budi ap i phub kerdo (Dik pal an 2. Korintarja 9:7). Ko lowe well ninna lino, te hi i katastrofa. Bud tchiwenn hako kurko “lowe ap i rig”, te nai denn le kowa (Dik pal an 1. Korintarja 16:2). Te kamah lowe te dell, nai tchiwah kowa an kola boxe, hoi an i Jehoweskre Khera denna, oder pral donate.pr418.com. O Jehowah dell men koi chanca, te nai sikras ninna dran maro materialtiko koowa maro kamlepen ap leste.

RODAS DUREDER

Kanna dikeh, hawo latchepen tu an tiri Versammlunga nai kreh.

3. Materialtiko koowah

O Jehowah un o Jesus dikenn latches ap kolende, kai denn o djiestar. O Jesus dikas, har i phuri djuwel, kolat kek rom buder his, i tikni lowe das, un penas, har mishto kowa his. Dikenn pal an Luka 21:1-4, un rakrenn khetne pral:

Hunte das mer bud lowe, te kras nai i Jehoweskro dji bachteles?
Har hi i Jehoweske un i Jeseke kowa, te dah lowe dran maro dji?

Hoi well kol lowentsa kerdo, hoi mer dah? Te dikan o VIDEO, rakrenn khente pral:

VIDEO: Kowa, hoi dah i Jehoweske (4:47)

Hoske hi ko lowe i tsele Versammlunge ap i phub mishto?

4. Tu nai djah wawaren ap o wast

An o dji i Jehoweskre menshendar an o phuro tsiro his, te rikrenn le o Debleskro kheer mishto. Doleske dan jon gar kokres pengre lowe. Dikenn pal an 2. Familjakro Liil 34:9-11, un rakrenn khetne pral:

Hoi nai kras hako Israelitare, te nai atchell o Jehoweskro kheer mishto?

Krenn i Jehoweskre Rakepangre kowa ninna jaake, har an o phuro tsiro? Te dikan o VIDEO, rakrenn khetne pral:

VIDEO: Mer krah, kai atchell o Jehoweskro Kheer moldo (3:31)

Hoske hunte rikras mer maro Jehoweskro Kheer djudjo, un hoske hunte dikas mer, kai djal lo gar paash?
Hoi nai kreh tu an kaja budi?

5. Phrala nai lenn budeder budi an i Versammlunga

I bibla penell morshenge, kai te nai lenn le budeder budi an i Versammlunga. Jaake nai krenn le pengre phralenge un phenjenge i baro latchepen. Har hi kowa? Te dikan o VIDEO, rakrenn khetne pral:

VIDEO: Phrala — Taprenn i latchi budi (5:19)

Har tapras o Ryan ap i budi, te nai well lo i Versammlunga budeder koi?

An i bibla hi tchinlo, hawe qualifikationa i phrales hunte wella, te nai well lo i Budepaskro an i Versammlunga, un i Phurester. Dikenn pal an 1. Timoteo 3:1-13, un rakrenn khetne pral:

Har hunte well i phraal, kai kamall i Budepaskro oder i Phurester te well?
Har hunte well leskri familja? (Dik pal an i verse 4 un 11.)
Hoske hi i tseli Versammlunga kowa mishto, te hi i phraal jaake, har tchinlo hi?

JEK NAI PUTCHELLA: “Har well i Jehoweskre Rakepangrengri budi plaissedo?”

Hoi penals tu?

HOI KATE PENLO WAS

I Jehoweske hi kowa bud moldo, te dah mer maro tsiro, mari soor un ninna materialtiko koowa, te nai was i phralenge un phenjenge an i Versammlunga koi.