ISOMO 55
Sagika Ekitebe eky’Orumu
Omu nsi yoona, obukaikuru n’obukaikuru bw’abantu baramya Yahwe n’okusemererwa omu nkumi n’enkumi z’ebitebe. Basiima habw’oburagirizi n’obuhabuzi obubatunga, kandi n’ekihika kingi basagika ekitebe omu miringo nyingi. Naiwe nukwo orukwehurra oti ha kitebe eky’orumu?
1. Miringo ki emu ey’osobora kukozesaamu obwire bwawe n’amaani gaawe kusagika ekitebe?
Itwena nitusobora kukonyera omu kitebe. Ekyokurorraho, omu kitebe kyanyu harumu abakuzire omu myaka rundi abatarukwesobora? N’osobora kubakonyera kugenda omu nsorrokano? Rundi n’osobora kubakonyera omu mirimo endi nk’okubagendera omu katale rundi kubakorra emirimo ey’omu ka? (Soma Yakobo 1:27.) Nitusobora kwehayo kuyonja n’okudabiriza Ekyombeko ky’Obukama. Busaho n’omu ow’atuhambiriza kukora ebintu binu. Okugonza okutwiniire Ruhanga hamu n’ab’oruganda kutuleetera kwehayo twegondiize.—Zabuli 110:3.
Abakaiso ba Yahwe ababatiziibwe nibasobora n’okusagika ekitebe omu miringo endi. Ab’oruganda abahikire kusigikirra ha Baibuli nibasobora kuheereza nk’abaheereza rundi nk’abagurusi. Ab’oruganda na banyaanya itwe boona nibasobora kusagika omulimo ogw’okutebeza kurabira omu kuheereza nka ba payoniya. Abakaiso ba Yahwe abamu, nibasobora kukonyera kwombeka ebiikaro by’okuramizaamu rundi kugenda omu biikaro nambere hali ebitebe ebirukwetaaga obukonyezi omu miringo endi.
2. Nitusobora tuta kukozesa sente rundi ebintu byaitu kusagika ekitebe?
Nitusobora kutamu ‘Yahwe ekitiinisa n’ebintu byaitu.’ (Enfumo 3:9) Kitusemeza obutuhayo sente rundi ebintu ebitwine kusagika ekitebe kyaitu n’omulimo ogw’okutebeza omu nsi yoona. (Soma 2 Abakolinso 9:7.) Ebituhayo bikozesebwa n’omu mulimo gw’okukonyera abahikirweho ebigwererezi. Baingi bacwamu kugira ekibaayahura nukwo bakiheyo. (Soma 1 Abakolinso 16:2.) Nitusobora kuhayo nitukozesa obusanduuko obuli omu biikaro byaitu eby’okuramizaamu rundi nitukozesa omukura ha donate.pr418.com. Twoleka ngu nitugonza Yahwe obutukozesa sente hamu n’ebintu byaitu kusagika ekitebe.
YEGA EBIRUKUKIRAHO
Wetegereze emu ha miringo ey’osobora kusagikamu ekitebe.
3. Nitusobora kukozesa ebintu byaitu
Yahwe na Yesu bagonza abo abahayo n’okusemererwa. Ekyokurorraho, Yesu akasiima omufaakati ow’akaba aine sente ntaito baitu azihayo hali Yahwe. Musome Luka 21:1-4, hanyuma mubazeeho ebikaguzo binu:
-
Nikitwetaagisa kuhayo sente nyingi muno kusobora kusemeza Yahwe?
-
Yahwe na Yesu behurra bata obutuhayo twegondiize?
Kumanya nk’oku ebihairweyo bikozesebwa, mutekeho VIDIYO. Hanyuma mubazeeho ekikaguzo kinu.
-
Ebihairweyo bikozesebwa bita kugasira ebitebe omu nsi yoona?
4. Nitusobora kwehayo kukonyera
Omu busumi bwa Baibuli, abaheereza ba Yahwe bayekambaga kurolerra ebiikaro byabo eby’okuramizaamu. Baitu kinu tikyagarukiraga ha kuhayobuhayo sente. Musome 2 Ekyebyomubusinge 34:9-11, hanyuma mubazeeho ekikaguzo kinu:
-
Buli Munyaisaleri akakonyera ata kurolerra enju ya Yahwe, rundi ekiikaro eky’okuramizaamu?
Kurora omulingo Abakaiso ba Yahwe bahondera ekyokurorraho kinu, mutekeho VIDIYO. Hanyuma mubazeeho ebikaguzo binu.
-
Habwaki kikuru kwikaza Ekyombeko kyaitu eky’Obukama kiri kyecumi kandi kiri munyikara enungi?
-
Miringo ki ey’osobora kukonyeramu?
5. Ab’oruganda nibasobora kukurakurana nibaheebwa obujunanizibwa oburukukiraho omu kitebe
Ebyahandiikirwe nibyekambisa abasaija Abakristaayo kukurakurana bakakora kyona ekibarukusobora kusagika ekitebe. Kurora ekyokurorraho, mutekeho VIDIYO. Hanyuma mubazeeho ekikaguzo ekirukuhonderaho.
-
Omu vidiyo, Ryan ayehaireyo ata kweyongera kusagika ekitebe?
Baibuli eyoleka ebintu ab’oruganda ebibasemeriire kuhikiriza kusobora kuheereza nk’abaheereza rundi abagurusi. Musome 1 Timoseo 3:1-13, hanyuma mubazeeho ebikaguzo binu:
-
Bintu ki ab’oruganda abarukugonza kuheereza nk’abaheereza rundi abagurusi ebibasemeriire kuhikiiriza?
-
Ab’omu maka gaabo basemeriire kuba nibetwaza bata?—Rora orukarra 4 na 11.
-
Ab’oruganda obubekamba kuhikiriza ebintu binu, buli omu omu kitebe agasirwa ata?
OMUNTU N’ASOBORA KUKAGUZA: “Abakaiso ba Yahwe baiha nkaha sente ez’okusagika omulimo gwabo?”
-
Wakugarukiremu ota?
OYEGERE KI?
Yahwe asiima muno amaani tutamu kusagika ekitebe nitukozesa obwire, amaani, hamu n’ebintu byaitu.
Kweijukyamu
-
Nitusobora tuta kukozesa obwire n’amaani gaitu kusagika ekitebe?
-
Nitusobora tuta kukozesa ebintu byaitu kusagika ekitebe?
-
Miringo ki eiwakugondeze kusagikamu ekitebe?
SERULIIRIZA
Wetegereze ensonga habwaki Yahwe takyayetaagisa abaheereza be kusasura kimu kya ikumi.
“Baibuli Egamba Ki ha Kuhayo Kimu Kya Ikumi?” (Ekicweka kinu kiri ha mukura)
Manya kukurakurana omu kitebe nikimanyisa ki.
Rora Abakaiso ba Yahwe abefeereza kusobora kuhikyaho Abakristaayo bagenzi baabo ebitabu.
Wetegereze omulingo sente ezisagika omulimo gwaitu zitungwamu, gurukwahukanira kimu hali omulingo ebitebe ebindi eby’amadiini bitungamu sente.
“Abakaiso ba Yahwe Batunga Bata Sente Ezisagika Omulimo Gwabo?” (Ekicweka kinu kiri ha mukura)
