LECCIÓN 55
Koltaya te acongregacione
Ta swolol Balumilal, bayal ta millón ants winiketik ya yichʼik ta mukʼ te Jehová sok stseʼelil yoʼtanik ta bayal ta mil congregacionetik. Bayal skʼoplal ya yilik te tojobtesel ya yichʼik akʼbeyel, sok spisil yoʼtan ya spasik bayal ta chajp aʼteliletik ta congregación. ¿Jichbal ya awaʼiy aba ta congregación banti ayate?
1. ¿Bin-utʼil ya xjuʼ ya atuuntes te atiempo sok te awip swenta ya akoltay te acongregacion?
Jpisiltik ya xjuʼ ya xkoltaywanotik ta congregación. ¿Yabal xjuʼ ya jap jbatik ta yikʼel bael ta tsoblejetik te hermanoetik te ayix yaʼbilalik o te machʼatik tsakbilik ta chamele? ¿O aybal bin ya xjuʼ ya apasxan ta stojolik, jich bitʼil te ay bin ya xbajt amanbey tal te ya xtuun yuʼun o te ay bintik ya akoltay ta spasel ta sna? (Kʼopona Santiago 1:27). Jaʼnix jich ya xjuʼ ya xkoltaywanotik ta smesel, ta skusel o ta skanantayel te sNail Tsobleje. Maʼyuk machʼa ya sujotik ta spasel; ya kakʼ jbatik ta koltaywanej, melel kʼux ta koʼtantik te Dios sok te kermanotaktike (Salmo 110:3).
Te Testigoetik te yichʼojikix jaʼ bayalxan bin-utʼil ya xkoltaywanik ta congregación. Te hermanoetik te ya spasik ta skuxlejalik te bin ya yal te Biblia ya xjuʼ ya x-ochik ta siervo ministerial, ta patil, ta anciano. Spisil te hermanoetik sok hermanaetik, ya xjuʼ ya scholikxan skʼop Dios jich bitʼil precursor. Jaʼnix jich ay Testigoetik te ya xjuʼ ya xkoltaywanik ta spasel sNail Tsoblejetik o ya xjuʼ ya xbajtik ta koltaywanej ta yan congregación.
2. ¿Bin-utʼil ya jtuuntestik te jtakʼintik sok te bin ay kuʼuntik ta skoltayel te congregación?
Te Biblia jich ya yal: «Ichʼa ta mucʼ Jehová soc te bintic ay awuʼun» (Proverbios 3:9). Jich ya kiltik bitʼil mukʼul majtanil te stuuntesel te jtakʼintik sok te bintik ay kuʼuntik ta skoltayel te jcongregaciontik sok te scholel skʼop Dios ta swolol Balumilal (kʼopona 2 Corintios 9:7). Jaʼnix jich ta swenta te majtan takʼin ya kakʼtike ya jkoltaytik te machʼatik ya xkʼax swokolike. Bayal machʼatik kʼayemik te parte ya yakʼ jtebuk te stakʼinik yuʼun ya yakʼik ta majtanil (kʼopona 1 Corintios 16:2). Ya xjuʼ ya kakʼtik majtan takʼin ta chʼin cajaetik te ay ta sNail Tsoblej kuʼuntik o ta página yuʼun Internet donate.pr418.com. Ya xjuʼ ya kakʼtik ta ilel te kʼux ta koʼtantik te Jehová kʼalal ya jtuuntestik te bintik ay kuʼuntik ta stojole.
JNOPTIKXAN TA LEK
Kiltik chaʼoxchajp te bin ya xjuʼ ya apas yuʼun ya akoltay te congregacione.
3. Ya xjuʼ ya awakʼ te bintik ay awuʼune
Te Jehová sok te Jesús kʼux ta yoʼtanik te machʼatik tseʼel yoʼtan ya yakʼik te bintik ay yuʼunike. Ta jun buelta te Jesús la yil te la yakʼ smajtan takʼin jtul meʼba ants te pobree. Kʼoponaik Lucas 21:1-4 sok albeyaik skʼoplal ini:
-
¿Yabal skʼan ya kakʼtik bayal takʼin yuʼun tseʼel yoʼtan-a te Jehová?
-
¿Bin-utʼil ya yaʼiy sba te Jehová sok te Jesús kʼalal ya kakʼtik sok spisil koʼtantik te bin ay kuʼuntike?
Yuʼun ya anaʼ bin-utʼil ya yichʼ tuuntesel te majtan takʼin, ilawilik te VIDEO. Ta patil albeyaik skʼoplal ini:
-
¿Bin lekilal ya sta te congregacionetik ta swolol Balumilal ta swenta te majtan takʼin ya kakʼtike?
4. Ya xjuʼ ya ajap aba yuʼun ya xkoltaywanat
Te j-abatetik ta namey kʼinal koltaywanik sok spisil yoʼtanik ta skanantayel te banti la yichʼik ta mukʼ te Jehová, ma jaʼuknax koltaywanik ta takʼin. Kʼoponaik 2 Crónicas 34:9-11 sok albeyaik skʼoplal ini:
-
¿Bin la spasik te israeletik yuʼun ya skanantayik te «sna Jehová»?
Swenta ya anaʼ bin-utʼil yakik ta stʼunel te ejemplo-abi te testigoetik yuʼun Jehová, ilawilik te VIDEO. Ta patil albeyaik skʼoplal ini:
-
¿Bin yuʼun mukʼ skʼoplal te kusbiluk sok te kanantaybiluk kuʼuntik te sNail Tsoblejetike?
-
¿Bintik-utʼil ya xjuʼ ya xkoltaywanat?
5. Te hermanoetik ya xjuʼ ya spasik tulan ta yichʼelxan yaʼtelik ta congregación
Te Biblia ya stijbey yoʼtan te winiketik ta smukʼubteselxan te schʼuunel yoʼtanik, yuʼun jich ya xjuʼ ya xkoltaywanik ta congregación. Ilawil bin-utʼil jich la spas jtul hermano, ilawilik te VIDEO. Ta patil albeyaik skʼoplal ini:
-
¿Bin la spas te Ryan yuʼun ya xtulanubxan te schʼuunel yoʼtan sok jich ya xkoltaywan ta congregación?
Te Biblia ya yal te bin ya skʼan ya spasik te hermanoetik te ya skʼan ya x-ochik ta siervo ministerial sok ta anciano. Kʼoponaik 1 Timoteo 3:1-13 sok albeyaik skʼoplal ini:
-
¿Bin yilel stalel ya skʼan ya yakʼ ta ilel te machʼa ya skʼan ya yichʼ yaʼtel ta siervo ministerial sok ta anciano?
-
¿Bin yilel stalel ya skʼan ya yakʼik ta ilel-euk te sfamiliaike? (Ilawilik te versículo 4 sok 11).
-
Teme ya spasik tulan ta spasel ta skuxlejalik te bin ya yal te Biblia te hermanoetik-abi, ¿bin yilel ya xkʼot te congregación?
AY MACHʼATIK JICH YA SJOJKʼOYIK: «¿Banti ya staik takʼin te testigoetik yuʼun Jehová yuʼun ya spas te yaʼtelike?».
-
¿Bin sujtib ya awakʼbey?
¿BINTIK LA JNOPTIK?
Te Jehová mukʼ skʼoplal ta yoʼtan te ya jtuuntestik te jtiempotik, te kiptik sok te bin ay kuʼuntik ta skoltayel te congregacione.
¿Jilbal ta awoʼtan into?
-
¿Bin-utʼil ya jtuuntestik te jtiempotik sok te kiptik yuʼun ya jkoltaytik te congregación?
-
¿Bin-utʼil ya xjuʼ ya jtuuntestik te jtakʼintik sok te bintik ay kuʼuntik yuʼun ya jkoltaytik te congregación?
-
¿Bin-utʼil ya akʼan ya akoltay te congregación?
YA XJUʼ YA ANOPXAN INI
Ilawil bin yuʼun te Dios maba ya skʼanbeyix diezmo te j-abatetik yuʼune.
«¿Bin ya yal te Biblia ta swenta te diezmoe?» (Ay ta jw.org)
Te Biblia ya yal te ya xjuʼ ya yichʼ akʼbeyel chaʼoxchap aʼtelil te hermanoetik te yichʼojikix jaʼ. Pero teme maʼyuk hermanoetik, ¿bin ya skʼan ya spas jtul hermana te yichʼojix jaʼ teme ya spas junuk te aʼtelil-abi?
«Te bitʼil ya xwentainwanik ta kongregasion» (Te J-ilkʼinal ta toyol, febrero 2021)
Naʼbeya sba chaʼoxtul Testigoetik te ya slokʼes sba ta yoʼtanik yuʼun ya yakʼbey te hermanoetik te junetik te lokʼem ta Biblia.
Ilawil te ma pajaluk sok yantik religionetik te bin-utʼil ya jtatik sok ya jtuuntestik te takʼin ta spasel te kaʼteltike.
«¿Banti ya staik takʼin te testigoetik yuʼun Jehová ta swenta te aʼtelil ya spasike?» (Ay ta jw.org)
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
