LISON 57
Kisa Ou Sa Fè Si Ou Fè An Péché Ki Gwav?
Magwé ou enmen Jéhova an chay, èvèk ou ka éséyé wèd pou pa fè bagay ki kay fèʼy lapenn, tanzantan, ou kay fè lèwè. (1 Kòrint 6:9, 10) Kanmenm, la ni péché ki pli sèwiyé pasé lézòt. Konsa si ou fè an péché ki gwav, chonjé sa pa vlé di Jéhova pa enmenʼw ankò. I pawé pou pawdonnenʼw èk i pawé pou édéʼw.
1. Kisa nou ni pou fè pou Jéhova pawdonnen nou?
Lè moun ki enmen Jéhova wéyalizé yo fè an péché ki gwav, yo ka byen twis. Mé yo sa twapé soulajman paski Jéhova pwonmèt pou konfòté pèp li. Bondyé di: ‘Menm si péché zòt pli wouj pasé san, mwen kay fè yo blan kon lannèj.ʼ (Izaya 1:18) Alò si nou fè an péché ki gwav èk nou wépanti ofon tjè nou, Jéhova kay pawdonnen nou konplètman. Mé kisa i vlé di pou wépanti? Lè on moun wépanti, sa vlé di moun-lan wigwété ofon tjèʼy saʼy té fè-a, i doubout fè bagay-la i té fè-a, èk i ka plédé épi Jéhova pou pawdonnenʼy. Apwé sa, moun-lan ka twavay wèd pou chanjé vyé katjil épi vyé labitid ki té annékòz li pou péché. Èk i ka éséyé pou viv an ling épi wèg Jéhova.—Li Izaya 55:6, 7.
2. Si nou fè an péché ki gwav ki mannyè Jéhova ka sèvi sé ansyen-an pou édé nou?
Ében, si nou fè an péché ki gwav, Jéhova di nou pou “kwiyé sé [ansyen-an] ki ka kondwi [kongwigasyon-an].” (Li Jémz 5:14, 15.) Sé ansyen-an enmen Jéhova èk yo enmen sé sèvant li-a osi. Yo sa édé nou wanjé wilasyon nou épi Jéhova.—Galécha 6:1.
Kanmenm, ki mannyè sé ansyen-an ka édé nou si nou fè an péché ki gwav? Dé (2) ében twa (3) ansyen kay sèvi lévanjil-la pou édé nou konpwann pouki sa nou té fè-a pa té bon. Osi yo kay ban nou bon konsèy èk ankouwajman pou édé nou pa tonbé an péché ankò. Èk sé ansyen-an pé désidé ki, pou an sèten tan nou pa kay sa fè sèten bagay an kongwigasyon-an jis tan wilasyon nou épi Jéhova vini fò ankò. Si an moun fè an péché ki gwav èk i pa vlé wépanti, sé ansyen-an kay ni pou èskonminikéʼy. Paski si yo pa fè sa, moun sala sa ni an mové enflouwans asou lòt moun an kongwigasyon-an.
ANNOU APWANN PLI
Apwézan, annou apwann mannyè ou sa dévlopé pli apwésiyasyon pou sé mannyè-a Jéhova ka édé nou si nou fè an péché ki gwav.
3. Lè nou konfésé péché nou, sa ka édé nou ni on bon wilasyon épi Jéhova ankò
Népòt lè nou péché nou ka blésé tjè Jéhova, sé pou wézon sala nou ni pou konfésé douvanʼy. Annou li Sam 32:1-5, èk apwé nou kay kozé asou kwèsyon sala:
-
Pouki i bon pou nou konfésé péché nou douvan Jéhova pito nou éséyé pou séwé yo?
Apwé nou konfésé péché nou douvan Jéhova, èk nou mandé sé ansyen-an pou èd, nou kay twapé soulajman. Annou gadé VIDIYO-A, “Jéhova Ka Kowijé Sé Moun-lan I Enmen-an” èk apwé nou kay kozé asou kwèsyon sala:
-
An vidiyo-a, kisa sé ansyen-an té fè pou édé Canon ni an bon wilasyon épi Jéhova ankò?
Lè nou ka palé épi sé ansyen-an nou ni pou onnèt èk pa séwé anyen, paski yo la pou édé nou. Annou li Jémz 5:16, èk apwé nou kay kozé asou kwèsyon sala:
-
Si nou onnèt lè nou ka palé épi sé ansyen-an, ki mannyè sa ka fèʼy pli ézé pou yo édé nou?
Konfésé péchéʼw douvan Jéhova, palé onnèt épi sé ansyen-an, èk aksèpté èd Jéhova
4. Lè an moun èskonminiké, ki mannyè sa ka édéʼy èk kongwigasyon-an?
Si an moun fè an péché ki gwav èk i pa vlé wépanti, sé ansyen-an ni pou èskonminikéʼy. Alò sé fwè èk sè-a pa sipozé asosiyé ében palé épiʼy. Annou li 1 Kòrint 5:6, 11 èk 2 Jan 9-11, èk apwé nou kay kozé asou kwèsyon sala:
-
Menm kon “an tizing lèlven ka fè tout lapat-la lévé”, ki mannyè an moun ki pa vlé wépanti kay afèkté kongwigasyon-an?
An chay fwè èk sè ki té èskonminiké ja viwé an kongwigasyon-an, paski yo wéyalizé magwé disiplin-lan té wèd, i té édé yo pou wè péché-a yo té fè-a té sèwiyé. (Sam 141:5) Annou gadé VIDIYO-A, Annou Sipòté Jijman Jéhova Fidèlman èk apwé nou kay kozé asou kwèsyon sala:
-
Lè Sonja té èskonminiké, ki mannyè sa té édéʼy?
Lè sé ansyen-an èskonminiké an moun, ki mannyè sa ka . . .
-
onnowé non Jéhova?
-
moutwé Jéhova sé an Dyé ki jis èk i enmen nou?
5. Lè nou wépanti Jéhova ka pawdonnen nou
Jézi té sèvi on pawabòl ki ka édé nou konpwann mannyè Jéhova ka santi lè an moun wépanti. Annou li Louk 15:1-7, èk apwé nou kay kozé asou kwèsyon sala:
-
Kisa ou apwann konsèné Jéhova an pawabòl sala?
Annou li Izikèl 33:11, èk apwé nou kay kozé asou kwèsyon sala:
-
Ki bagay enpòtan nou ni pou fè pou moutwé nou vwéman wépanti?
Menm kon an bèwjé mélé épi moutonʼy, Jéhova mélé épi nou an chay
ADAN MOUN KA DI: “Mwen pè pou di sé ansyen-an sa mwen fè, paski yo kay èskonminiké mwen.”
-
Kisa ou té kay di an moun ki ka santi kon sa?
CHONJÉ SÉ PWEN SALA
Si nou fè an péché ki gwav mé nou vwéman wépanti, èk nou détèminé pou doubout fè péché-a, Jéhova kay pawdonnen nou.
Annou Wivizé Sa Nou Ja Apwann
-
Pouki i bon pou nou konfésé péché nou douvan Jéhova?
-
Kisa nou ni pou fè pou Jéhova pawdonnen nou?
-
Si nou fè an péché ki gwav, pouki nou sipozé mandé sé ansyen-an pou èd?
LÒT ENFÒMASYON OU SA GADÉ
An ling épi Izaya 1:18 gadé mannyè an nonm té èspéyansé mizéwikòd Jéhova.
Lè an moun èskonminiké ki mannyè sa ka édé ni moun-lan ni kongwigasyon-an?
“Lè An Moun Èskonminiké Ki Mannyè Sa Ka Édéʼy Èk Kongwigasyon-an” (Gad-la, li 15 Avwi, 2015)
Apwann mannyè ou sa èspliké ba an moun ki pa an Témwen Jéhova pouki nou ka èskonminiké moun.
“Ès Témwen Jéhova Ka Asosiyé Épi Moun Ki Pa An Wilizyon Yo Ankò?” (yon atik asou jw.org)
Apwann pouki an nonm ki té kité lavéwité-a ka kwè sé Jéhova ki té mennenʼy viwé, an listwa-a “Mwen Té Bizwen Viwé An Bwa Jéhova”.
