E ngɛ mi kaa o suɔ Yehowa wawɛɛ, nɛ o bɔɔ mɔde kaa o be nɔ́ ko pee nɛ maa dɔ lɛ mohu lɛɛ, se be komɛ ɔ, o ma tɔ̃. Se kɛ̃ ɔ, hɛdɔ ngɛ tɔmi komɛ a he pe ekomɛ. (1 Korinto Bi 6:​9, 10) Ke o tɔ̃ tɔmi ko nɛ hɛdɔ ngɛ he ɔ, mo kai kaa loloolo ɔ Yehowa suɔ mo; e suɔ kaa e kɛ maa ke mo nɛ́ e ye kɛ bua mo.

1. Mɛni e sa nɛ waa pee konɛ Yehowa nɛ ngɔ wa tɔmi kɛ ke wɔ?

Ke nihi nɛ a suɔ Yehowa a yɔse kaa a tɔ̃ tɔmi ko nɛ hɛdɔ ngɛ he ɔ, e dɔɔ mɛ wawɛɛ. Se si nɛ Yehowa wo e we bi ɔ woɔ a bua. E wo si ke: “Ke nyɛ he yayami ɔ tsu kaa mɛni po, ma ha e ma hiɛ futaa kaa snoo.” (Yesaya 1:​18) Ke wa tsake wa tsui niinɛ ɔ, Yehowa kɛ wa tɔmi ɔ maa ke wɔ kulaa. Mɛni wa maa pee kɛ tsɔɔ kaa wa tsake wa tsui? Wa ma pia wa he wawɛɛ ngɛ nɔ́ nɛ wa pee ɔ he, nɛ wa ma kpa nɔ́ nɛ dɛ peemi, nɛ wa maa sɔle ha Yehowa kaa e kɛ wa tɔmi ɔ nɛ ke wɔ. Lɔ ɔ se ɔ, wa maa bɔ mɔde kaa wa ma kua susumi loo ní peepeehi nɛ dɛ nɛ́ ha nɛ waa kɛ wa he wo jamɛ a yayami ɔ mi ɔ, nɛ wa maa bɔ mɔde kaa wa maa hi si ngɛ Yehowa mlaahi nɛ a he tsɔ ɔ nya.​—Kane Yesaya 55:​6, 7.

2. Mɛni blɔ nɔ nɛ Yehowa guɔ asafo mi nikɔtɔma amɛ a nɔ kɛ yeɔ bua wɔ ke wa tɔ̃?

Yehowa de wɔ kaa ke wa tɔ̃ tɔmi ko nɛ hɛdɔ ngɛ he ɔ, wa “tsɛ asafo ɔ mi nikɔtɔma amɛ.” (Kane Yakobo 5:​14, 15.) Asafo mi nikɔtɔma amɛ suɔ Yehowa nɛ a suɔ nihi nɛ a ngɛ lɛ sɔmɔe ɔ. A tsɔse mɛ konɛ a nyɛ nɛ a ye bua wɔ bɔ nɛ pee nɛ huɛ bɔmi kpakpa nɛ hi waa kɛ Yehowa wa kpɛti ekohu.​—Galatia Bi 6:1.

Mɛni blɔ nɔ nɛ asafo mi nikɔtɔma amɛ guɔ kɛ yeɔ bua wɔ ke wa tɔ̃ tɔmi ko nɛ hɛdɔ ngɛ he? Asafo mi nikɔtɔmahi enyɔ loo etɛ maa da Ngmami ɔ nɔ kɛ ye bua wɔ nɛ waa na nɔ́ he je nɛ nɔ́ nɛ wa pee ɔ dɛ ɔ. A maa tsɔɔ wɔ níhi nɛ wa ma nyɛ maa pee, nɛ a kɛ ga womi nɛ sa nɛ maa ye bua wɔ ɔ ma ha wɔ konɛ wa ko kpale ya pee jamɛ a yayami ɔ. Eko ɔ, a maa mwɔ a yi mi kpɔ kaa a kɛ nya tsimi komɛ maa fɔ wa nɔ kɛ ya si benɛ huɛ bɔmi kpakpa ma ba hi waa kɛ Yehowa wa kpɛti ekohu. Ke nɔ ko pee yayami nɛ hɛdɔ ngɛ he nɛ e tsakee we e tsui ɔ, asafo mi nikɔtɔma amɛ maa fiee jamɛ a nɔ ɔ ngɛ asafo ɔ mi, konɛ nɔ ɔ ní peepee yaya a nɛ ko ná ni kpahi a nɔ he wami ngɛ asafo ɔ mi.

 MOO KASE BABAUU

3. Ke wa jaje wa tɔmi ɔmɛ ɔ, e ma ha nɛ huɛ bɔmi kpakpa maa hi waa kɛ Yehowa wa kpɛti ekohu

Yayami fɛɛ yayami nɛ wa pee ɔ, Yehowa nɛ wa pee kɛ si. Enɛ ɔ he ɔ, e da blɔ kaa wa maa jaje wa yayami ɔ kɛ tsɔɔ lɛ. Nyɛɛ kane La 32:​1-5, nɛ́ nyɛ susu sane bimi nɛ ɔ he:

• Mɛni he je nɛ e hi kaa wa maa jaje wa yayami ɔmɛ kɛ tsɔɔ Yehowa pe nɛ wa maa laa nɔ ɔ?

 4. Bɔ nɛ nɔ fieemi blɔ nya tomi ɔ yeɔ bua ha

Ke nɔ ko nɛ́ e pee yayami nɛ hɛdɔ ngɛ he ɔ kua kaa e kɛ Yehowa mlaahi ma tsu ní ɔ, e be nyɛe maa piɛɛ asafo ɔ he. A fieeɔ lɛ ngɛ asafo ɔ mi, ke e ba jã a, waa kɛ lɛ bɔɛ, nɛ waa kɛ lɛ tu we munyu po. Nyɛɛ kane 1 Korinto Bi 5:​6, 11 kɛ 2 Yohane 9-​11, nɛ́ nyɛ susu sane bimi nɛ ɔ he:

• Kaa bɔ nɛ masa nyafii haa nɛ ma a tsuo saa a, ke waa kɛ yayami peelɔ ko nɛ e tsakee we e tsui ngɛ bɔe ɔ, kɛ lɔ ɔ ma ná asafo ɔ nɔ he wami ha kɛɛ?

 NYA MWƆMI

Ke wa tɔ̃ tɔmi nɛ hɛdɔ ngɛ he, se wa pia wa he ngɛ wa tsui mi, nɛ wa fia wa pɛɛ si kaa wa be jamɛ a yayami ɔ pee hu ɔ, Yehowa kɛ maa ke wɔ.

Mi Nylɔmi

• Mɛni he je nɛ e hi kaa wa maa jaje wa tɔmi ɔmɛ kɛ tsɔɔ Yehowa a?

• Mɛni e sa nɛ waa pee konɛ Yehowa nɛ ngɔ wa tɔmi ɔmɛ kɛ ke wɔ?

• Ke wa tɔ̃ tɔmi ko nɛ hɛdɔ ngɛ he ɔ, mɛni he je nɛ e sa nɛ wa bi asafo mi nikɔtɔma amɛ yemi kɛ buami ɔ?