OZUMALƐDƖYƐ 57
Sɛ Ɛyɛ Tanɩ Mɔɔ Numɔ Yɛ Ɔnlʋmɔ a, Mɩnla Yɛ Ɩsɛ Kɛɛ Ɛyɛ a?
Ɩwɔ numɔ kɛɛ ɔdɔ Gyehova paa na ɔbɔɔ mmɔdɩnɩ kɛɛ ɛlɛ́yɛ dɩyɛ bela mɔɔ ɩkɛma ikeli ɛyɛkɛ dɩyɛ, naasʋ̃ ɩyɛ a ekeli mfʋmɩ. Naasʋ̃ tanɩ be wɔ ɛkɛnɩ mɔɔ numɔ yɛ ɔnlʋmɔ tɛla ebiye. (1 Kɔlɛntɩmaa 6:9, 10) Sɛ ɛyɛ tanɩ mɔɔ numɔ yɛ ɔnlʋmɔ po a, kakɛ kɛɛ Gyehova ɩlanwʋ la ɩdɔ wʋ na ɩwɔ ɛpɛ kɛɛ ɩkɛva ɩkɛhyɛ wʋ na ɩawʋwa wʋ.
1. Mɩnla yɛ ɩsɛ kɛɛ yɛyɛ na ama Gyehova ɩava yɛ tanɩ ɩahyɛ yɛ a?
Sɛ bɛzabɛ mɔɔ bɔdɔ Gyehova nɩ bɔnwʋ kɛɛ bɛyɛ tanɩ mɔɔ numɔ yɛ ɔnlʋmɔ a, bedi nwʋmɔ ɛyɛkɛ baaba. Naasʋ̃ Gyehova yɩ anʋhʋba eyi kyɩkyɩ bɛ ɛɣɛɛlɛ: “Ɩwɔ numɔ kɛɛ bɛ tanɩ ɩdɩ kɛɛ koogyanɩ dɩyɛ, naasʋ̃ ɩkɛyɛ sakʋʋ kɛɛ sunoo.” (Ayɩzaya 1:18) Sɛ yɛzʋ̃ yɛ ahʋnlɩnɩ munwala nu yenu yɛ nwʋ a, Gyehova kɛva yɛ tanɩ kɛhyɛ yɛ kʋlaa. Kɛ yenu yɛ nwʋ yese a? Ɩsɛ kɛɛ yedi tanɩ mɔɔ yɛyɛlɩ yɩ nwʋ ɛyɛkɛ, yeyiaki ɩyɛlɛ na yesiã Gyehova kɛɛ ɩva ɩhyɛ yɛ. Akʋ̃ sʋ̃ yɛbɔ mmɔdɩnɩ yɛsɩnza adwɩnɩ anzɛnyɩɩ subanɩ mɔɔ ɩávata mɔɔ ɩmanlɩ yɛyɛlɩ tanɩ nɩ, na yeminyia yɛ nwʋ yɛfa Gyehova yɩ mmɛla mɔɔ ɩfalɩ ɛbɩlawɔlɛ nwʋ nɩ yɛyɛ egyima.—Kɩnga Ayɩzaya 55:6, 7.
2. Mɩnla ɔhʋanɩ zʋ yɛ Gyehova duwa mbanimbani yɩ zʋ bʋwa yɛ mmɩlɩ mɔ yɛyɛ tanɩ a?
Sɛ yɛyɛ tanɩ mɔɔ numɔ yɛ ɔnlʋmɔ a, Gyehova kã kile yɛ kɛɛ ‘yɛvʋlɔ [asafʋ] nu mbanimbani yɩ.’ (Kɩnga Gyemisi 5:14, 15.) Mbanimbani eyimmɔ bɔdɔ Gyehova nɩɩ yɩ asʋ̃mɩvʋlɔ sʋ̃. Bɛdɩdɩ bɛ kɛɛ bɔwʋwa yɛ ma yeziyeziye yɛ nɩɩ Gyehova avinli abusunwawɔlɛ.—Galatiyiamaa 6:1.
Mɩnla ɔhʋanɩ zʋ yɛ mbanimbani yɩ bɔbʋwa yɛ mmɩlɩ mɔ yɛyɛ tanɩ mɔɔ numɔ yɛ ɔnlʋmɔ nɩ a? Mbanimbani anwɩ̃ anzɛnyɩɩ asã koluwa ɛhɛlɛlɛ odwokɔ yɩ zʋ kodu yɛ fʋlɔ na bɛadɩnɣɛ yɛ. Akʋ̃ sʋ̃ bɛkɛhyɛ yɛ ɛzɩzɩbɛ na bɛahile yɛ nninyeni be mɔɔ sɛ yɛyɛ a, ɩkɔwʋwa yɛ na yɛáyɛlɩ ɔzɔ tanɩ nɩ dɔkʋ̃. Ebiye a, bekezi pɔkɔ kɛɛ bɛkɛma yekeyiaki nninyeni be ɩyɛlɛ wɔ asafʋ yi nu kɔbʋmɩ kɛɛ yɛ nɩɩ Gyehova avinli kɛyɛ baaba. Sɛ abiye yɛ tanɩ mɔɔ numɔ yɛ ɔnlʋmɔ na iánu yɩ nwʋ a, mbanimbani yi botu yɩ bɛfa bɔbɔ asafʋ yɩ nwʋ banɩ.
SUMÁ SƲ̃MAA
Sumá kezimɔ ekehile anyɩnlɩzɔlɛ kɛma ɔhʋanɩ mɔɔ Gyehova duwa zʋlɔ bʋwa yɛ mmɩlɩ mɔ yɛyɛ tanɩ mɔɔ numɔ yɛ ɔnlʋmɔ nɩ.
3. Sɛ yɛkã yɛ tanɩ a, ɩbʋwa ma yɛ nɩɩ Gyehova avinli sia yɛ baaba
Sɛ yɛyɛ tanɩ a, Gyehova di nwʋmɔ ɛyɛkɛ. Meti ɩdɩ baaba kɛɛ yɛkɛhã yɛ tanɩ yekehile yɩ. Kɩnga Ndwomi 32:1-5, na akʋ̃ bozunzú odwokɔɣizialɛ eyi nwʋ:
-
Mɩnla ti mɔɔ ɩdɩ baaba kɛɛ yɛkɛhã yɛ tanɩ yekehile Gyehova tɛla kɛɛ yɛkɛva yekeziye yɩ a?
Sɛ yɛkã yɛ tanɩ yekile Gyehova yewie a, ɩsɛ kɛɛ yɛkã yekile mbanimbani yi ma bɔbʋwa yɛ na eyi kɛma yɛ nwʋ kɔdɔ yɛ. Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.
-
Wɔ vidiyo yi nu nɩ, mɩnla ɔhʋanɩ zʋ yɛ mbanimbani yi wʋwalɩ Canon ma izia ɩɣalɩ Gyehova pɛ a?
Mbanimbani yi wɔ ɛkɛnɩ kɛɛ bɔkɔwʋwa yɛ, meti ɩsɛ kɛɛ yɛkã nɔhʋanlɛ bela mɔɔ ɩwɔ odwokɔ yi nu yekile bɛ. Kɩnga Gyemisi 5:16, na akʋ̃ bozunzú odwokɔɣizialɛ eyi nwʋ:
-
Mɩnla ɔhʋanɩ zʋ yɛ sɛ yɛkã nɔhʋanlɛ mɔɔ ɩwɔ odwokɔ yi nu yekile mbanimbani yi a, ɩkɛma ɩkɛyɛ mɛlɛkɛ kɛɛ bɔkɔwʋwa yɛ a?
Kã wʋ tanɩ, kã nɔhʋanlɛ kile mbanimbani yi, na de Gyehova yɩ mmʋwalɩyɛ mɔɔ ɩzʋ̃ ɔlɔlɛ nu ɩfa ɩma wʋ nɩ tiã numɔ
4. Botu abiye wɔ asafʋ yi nu a, mɩnla mfasʋ yɛ ɩfa ɩba a?
Sɛ abiye yɛ tanɩ mɔɔ numɔ yɛ ɔnlʋmɔ na sɛ iánu yɩ nwʋ a, ɩlɔ́kʋla ɩ nɩɩ asafʋ yɩ kɔwɔ. Botu enii kʋ̃ nɩ, na yɛ nɩɩ yɩ áwɔ anzɛnyɩɩ yɛ nɩɩ yɩ ɩádɩndɛ po. Kɩnga 1 Kɔlɛntɩmaa 5:6, 11 nɩɩ 2 Dwɔɔnʋ 9-11, na akʋ̃ bozunzú odwokɔɣizialɛ eyi nwʋ:
-
Sɛ bɛfa fɩyayɛ bɔfʋla awulo ɔdɔkɔ nu a, ɩma itu. Meti sɛ botu abiye na yɛ nɩɩ yɩ bɔ a, kɛ ɩkɛhã asafʋ yɩ keze a?
Ɩwɔ numɔ kɛɛ botu abiye a ɩyɛ ɛyɛkɛ dɩyɛ, naasʋ̃ ɩwʋwa mmenii sʋ̃maa ma bɔnwʋ kɛɛ mɔɔ bɛyɛlɩ nɩ ɩdɩbɛ na bezia bɛɣa asafʋ yi nu. (Ndwomi 141:5) Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.
-
Wɔ vidiyo yi nu nɩ, mɩnla ɔhʋanɩ zʋ yɛ odulɛ mɔɔ boduli Sonja nɩ ɩwʋwalɩ yɩ a?
Mɩnla ti mɔɔ sɛ botu abiye a . . .
-
ɩtɩ Gyehova yɩ dima nwʋ a?
-
ɩma yɛnwʋ kɛɛ Gyehova dwɩnɩ yɛ nwʋ na ɩwɔ ɔlɔlɛ a?
5. Sɛ yenu yɛ nwʋ a Gyehova ɩfa yɛ tanɩ ɩkyɛ yɛ
Gyisɛsɩ yɛlɩ ndianwʋ be mɔɔ ɩma yɛnwʋ kezimɔ Gyehova tɩ nɣanlɩ mmɩlɩ mɔ abiye inlu yɩ nwʋ nɩ. Kɩnga Luuku 15:1-7, na akʋ̃ bozunzú odwokɔɣizialɛ eyi nwʋ:
-
Mɩnla yɛ odwokɔ eyi ɩma ɔnwʋ falɩ Gyehova nwʋ a?
Kɩnga Izikɩyɛlɩ 33:11, na akʋ̃ bozunzú odwokɔɣizialɛ eyi nwʋ:
-
Mɩnla yɛ abiye yɛ a ikehile kɛɛ inlu yɩ nwʋ amba a?
Dɩkɛɛ mmuwuanɩzʋhilalɛvʋlɔ nɩ, Gyehova dwɩnɩ yɩ mmuwuanɩ nwʋ baaba
ABIYEMMƆ BƐKÃ KƐƐ: “Mu kunlu tu kɛɛ sɛ mɩkã mɩ tanɩ mikile mbanimbani yi a, bokodu mɩ.”
-
Mɩnla yɛ ɛkɛhã kehile abiye mɔɔ ɩtɩ nɣanlɩ zɔ a?
YƖ DƆKƆWƆLƐ
Sɛ yɛyɛ tanɩ mɔɔ numɔ yɛ ɔnlʋmɔ na yɛzʋ̃ yɛ ahʋnlɩnɩ nu yenu yɛ nwʋ na yɛbɔ mmɔdɩnɩ kɛɛ yɛlɛ́yɛ dɔkʋ̃ a, Gyehova kɛva kɛhyɛ yɛ.
Kɛ Okowuwa Ekeze a?
-
Mɩnla ti mɔɔ ɩdɩ baaba kɛɛ yɛkɛhã yɛ tanɩ yekehile Gyehova a?
-
Mɩnla yɛ ɩsɛ kɛɛ yɛyɛ na ama Gyehova ɩava yɛ tanɩ ɩahyɛ yɛ a?
-
Sɛ yɛyɛ tanɩ mɔɔ numɔ yɛ ɔnlʋmɔ a, mɩnla ti mɔɔ ɩsɛ kɛɛ yɛpɩbɛ mmʋwalɩyɛ wɔ mbanimbani bɛ kɛ a?
PƖBƐ́ SƲ̃MAA
Kilá kezimɔ benyia be nyianlɩ Gyehova yɩ ngokɛnwʋnlɛ mɔɔ bɛhã nwʋmɔ odwokɔ wɔ Ayɩzaya 1:18 nɩ zʋ mfasʋ.
Botu abiye wɔ asafʋ yi nu a, mɩnla mfasʋ yɛ ɩfa ɩba a?
“Sianti Mɔɔ Odulɛ Dɩ Nhyɩhyɛlɩyɛ Mɔɔ Ɔlɔlɛ Wɔ Numɔ” (Ɔwɩɛnɩlɛ Aɣanɩ, May 15, 2015)
Sumá kezimɔ ekehilehile sianti mɔɔ botu abiye wɔ asafʋ yi nu kehile abiye mɔɔ ɩ́dɩ Dasɩvʋlɔ.
Wɔ odwokɔ mɔɔ ise “Nɩ Ɩsɛ Kɛɛ Misia Mɩba Gyehova Pɛ” yi nu nɩ, kilá sianti mɔɔ benyia be mɔɔ nɩ ɩhwɩ̃ yɩ nwʋ wɔ nɔhʋanlɛ yɩ nwʋ nɩ dɩlɩ nɣanlɩ kɛɛ Gyehova izia ɩhwɩ̃ yɩ ɩɣa yɩ pɛ.
