Aˬ dui Yeˬhawˇbaˬ˗ahˇ gaˬ dui dui˗awˇ aˬ yawꞈ˗euˬ nui ma˗ahˇ bi deuˬ leˇ˗eu jeˬ maˬ mˇ lehˇ noeˬ taˬ˗euˬ kʼawꞈ, tiˬ poˆ na mˇ lehˬ shaˇ ca laˇ nya˗eu meh. Tiˬ poˆ na teu naˆ naˆ˗ehˇ lehˬ˗eu maˬ ngeuˇ kʼawꞈ, tiˬ poˆ na naˇ huiˬ˗eu iˬ baˇ mˇ laˇ nya˗eu meh. (1 Gawˇliˬtu 6:9, 10) Aˬ dui huiˬ˗eu iˬ baˇ mˇ˗euˬ kʼawꞈ Yeˬhawˇbaˬ aˬ dui˗ahˇ gaˬ luꞈ˗a siˬ. Aˬ yawꞈ aˬ dui˗ahˇ nui ma keuˆ˗eu laꞈ kʼoeˇ iˬ baˇ pyehˬ nehˬ mawꞈ˗awˇ aˬ dui˗ahˇ caw ba nehˬ mawꞈ˗eu meh.

1. Aˬ dui mˇ lehˬ ngeh Yeˬhawˇbaˬ neh iˬ baˇ bi pyehˬ˗eu gʼaˇ duˬ aˬ jeˬ ya jahˇ˗eu nga?

Yeˬhawˇbaˬ˗ahˇ gaˬ˗eu deuˬ huiˬ˗eu iˬ baˇ mˇ ngeh nui ma cawˆ dui dui˗eu meh. Aˬ yawꞈ maꞈ Yeˬhawˇbaˬ neh aˬ yawꞈ˗euˬ tsawˇ haˬ deuˬ˗ahˇ “Naw maꞈ˗euˬ iˬ baˇ neˇ tseuˆ ni gʼeh kʼawꞈ, saˬ laˬ naˆ maˬ tseˇ pyuˇ laˇ tehꞈ˗a” lehˇ saˇ jaˇ dzaˬ taˬ˗euˬ dawˬ˗ahˇ ya siˬ˗euˬ miˇ neh nui ma saˇ nya meh. (Iˇsaˬyaˇ 1:18) Aˬ dui maˇ maˇ ni noeˬ poˆ noeˬ paˇ naˇ, Yeˬhawˇbaˬ aˬ dui˗ahˇ iˬ baˇ pyehˬ nehˬ˗eu yaw duˬ baw meh. Aˬ joˆ˗ehˇ ya noeˬ poˆ ya noeˬ paˇ˗eu nga? Aˬ dui yawˬ ha neh mˇ lehˬ˗euˬ jeˬ˗ahˇ nui ma cawˆ dui dui˗awˇ teu loꞈ˗ehˇ maˬ paˇ ya mˇ kʼoꞈ˗iˇ˗eu uˬ taꞈ, Yeˬhawˇbaˬ˗ahˇ iˬ baˇ pyehˬ nehˬ laꞈ lehˇ ya tahˬ shaˇ˗eu meh. Kʼoeˇ naˇ kʼaˇ gʼeh nya gaˇ neh leh jeh˗eu laꞈ kʼoeˇ aˬ dui˗ahˇ bi mˇ bahˬ laˇ˗eu nui noeˬ hawˇ˗eu mˇ jeˬ shaˇ kawˆ˗ahˇ laˆ poˆ laˆ paˇ˗awˇ, Yeˬhawˇbaˬ˗euˬ muiˬ˗eu shawˇ˗eu zahˇ dawˬ˗ahˇ ya dehꞈ caw˗eu meh.—Iˇsaˬyaˇ 55:6, 7-ahˇ gui.

2. Yeˬhawˇbaˬ aˇ muˇ˗ahˇ sheuˬ gʼeh˗eu deuˬ˗ahˇ zmˬ˗awˇ iˬ baˇ mˇ˗euˬ gʼaˬ˗ahˇ aˬ joˆ˗ehˇ caw ba nehˬ˗eu nga?

Aˬ dui huiˬ˗eu iˬ baˇ mˇ˗euˬ naˇ Yeˬhawˇbaˬ aˬ dui˗ahˇ ‘aˇ muˇ˗euˬ aˬ yuiꞈ aˬ tsu deuˬ˗ahˇ kuˇ˗awˬ’ lehˇ maˇ jawˆ ni ehˇ taˬ˗euˬ meh. (Yaˬkoˆ 5:14, 15-ahˇ gui.) Aˇ muˇ˗ahˇ sheuˬ gʼeh˗eu deuˬ Yeˬhawˇbaˬ hawˇ˗eu aˬ yawꞈ˗euˬ gaˇ mˇ˗eu deuˬ˗ahˇ gaˬ˗eu meh. Aˬ yawꞈ maꞈ aˬ dui Yeˬhawˇbaˬ nehˬ˗ehˇ cawˬ cawˬ˗eu jeˬ paˇ muiˬ kʼoꞈ laˇ ni caw ba nehˬ nya˗eu meh.—Gaˬlaˬtiˆ 6:1.

Aˇ muˇ˗ahˇ sheuˬ gʼeh˗eu deuˬ huiˬ˗eu iˬ baˇ mˇ˗euˬ gʼaˬ˗ahˇ aˬ joˆ˗ehˇ caw ba nehˬ˗eu nga? Sheuˬ gʼeh˗eu nyiˬ gʼaˬ maˬ ngeuˇ naˇ smˇ gʼaˬ, Jaˇliꞈ˗ahˇ dawˬ pehˬ taˬ˗awˇ mehˬ nehˬ tsoˆ nehˬ˗eu meh. Kʼoeˇ naˇ, iˬ baˇ maˬ paˇ bi mˇ poˆ˗eu gʼaˇ duˬ, nui noeˬ nui duˇ biꞈ˗awˇ gʼaˬ jiˇ biꞈ˗eu meh. Kʼoeˇ uˬ taꞈ, Miˬyehˇ nehˬ˗ehˇ cawˬ cawˬ˗eu jeˬ maˬ muiˬ kʼoꞈ laˇ˗euˬ yaw kaˬ˗ahˇ, aˇ muˇ laꞈ kʼoeˇ˗euˬ gaˇ tiˬ jeˬ na maˬ bi mˇ ni bi naˬ˗eu kʼawꞈ pyeuꞈ nya meh. Aˇ muˇ laꞈ kʼoeˇ˗euˬ deuˬ˗ahˇ maˬ muiˬ˗eu nui noeˬ maˬ bi nyawˬ˗iˇ˗eu gʼaˇ duˬ, sheuˬ gʼeh˗eu deuˬ noeˬ poˆ noeˬ paˇ maˬ mˇ˗eu huiˬ˗eu iˬ baˇ mˇ˗euˬ gʼaˬ˗ahˇ aˇ muˇ laꞈ kʼoeˇ neh teh doˆ˗eu meh.

 Naꞈ suiˇ ni dzaw

3. Yawˬ ha˗euˬ iˬ baˇ ja doˆ˗eu heu naˇ, Yeˬhawˇbaˬ nehˬ˗ehˇ bi gʼoeˇ kʼoꞈ laˇ nya

Aˬ dui neh mˇ lehˬ shaˇ ca˗euˬ yawˬ jeˬ na luꞈ Yeˬhawˇbaˬ˗euˬ nui ma˗ahˇ bi deuˬ leˇ˗eu miˇ neh, aˬ dui aˬ jeˬ mˇ bahˬ˗euˬ lehˇ aˬ yawꞈ˗ahˇ ya ehˇ nehˬ˗eu meh. Ja ceuˬ 32:1-5-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yawˬ ha˗euˬ iˬ baˇ laˆ zaꞈ˗eu lehˇ leh jeh ngeh to˗aˬ, Yeˬhawˇbaˬ˗ahˇ ja doˆ nehˬ naˇ aˬ jeˬ miˇ neh muiˬ˗eu nga?

 4. Teh doˆ˗eu heu naˇ caw ba˗eu jeˬ aˬ joˆ˗ehˇ pyeuꞈ˗eu nga?

Huiˬ˗eu iˬ baˇ mˇ˗euˬ gʼaˬ Yeˬhawˇbaˬ˗euˬ zahˇ dawˬ˗ahˇ maˬ mˇ caw naˇ, aˇ muˇ laꞈ kʼoeˇ˗euˬ tiˬ gʼaˬ maˬ paˇ ya pyeuꞈ meh. Aˬ yawꞈ˗ahˇ ya teh doˆ˗awˇ aˬ dui aˬ yawꞈ nehˬ˗ehˇ cawˬ maˬ paˇ ya cawˬ˗eu uˬ taꞈ, dawˬ jiˇ maˬ paˇ ya ngehˬ cawˬ meh. 1 Gawˇliˬtu 5:6, 11 hawˇ˗eu 2 Yoˇhaˬ 9-11-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Dehˬ tseˬ kaˬ muˇ˗ahˇ bi poˬ laˇ˗eu loꞈ˗ehˇ iˬ baˇ maˬ noeˬ poˆ maˬ noeˬ paˇ˗eu deuˬ nehˬ˗ehˇ cawˬ cawˬ˗eu heu naˇ aˇ muˇ˗ahˇ aˬ joˆ˗ehˇ bi deuˬ laˇ˗eu nga?

 Kawˆ shawˆ

Aˬ dui huiˬ˗eu iˬ baˇ mˇ kʼawꞈ maˇ maˇ ni nui ma cawˆ˗awˇ iˬ baˇ teu˗ahˇ maˬ paˇ mˇ kʼoꞈ˗iˇ˗eu lehˇ leh jeh naˇ, Yeˬhawˇbaˬ aˬ dui˗ahˇ iˬ baˇ pyehˬ nehˬ laꞈ meh.

Ja sawˇ poˆ˗eu

• Aˬ dui˗euˬ iˬ baˇ Yeˬhawˇbaˬ˗ahˇ ja doˆ nehˬ˗eu heu naˇ aˬ jeˬ miˇ neh yaw muiˬ nga?

• Yeˬhawˇbaˬ iˬ baˇ bi pyehˬ˗eu gʼaˇ duˬ, aˬ dui aˬ jeˬ ya jahˇ˗eu nga?

• Aˬ dui huiˬ˗eu iˬ baˇ mˇ naˇ, aˬ jeˬ miˇ neh aˇ muˇ˗ahˇ sheuˬ gʼeh˗eu deuˬ neh ya bi caw ba˗eu nga?