ENUKPLAKPLA 57
Nyi àwa nɔ èwa nuvɔn gangan ɖeɔ?
Ci èlɔn Yehowa veviɖe yí tekɔkpɔ mɔ yedawa ŋɖe ci yí ado vevisese ni can ɔ, àvawa nuvɔn hweɖowonu. Vɔ nuvɔn ɖewo gangannɔ wu buwo. (1 Korɛntitɔwo 6:9, 10) Nɔ èwa nuvɔn gangan ɖeɔ, ɖo ŋwi mɔ Yehowa demi eo lɔnlɔn o; éji veviɖe mɔ yeasɔ ke eo yí akpedo eo nu.
1. Nyi mìɖo awa nɔ Yehowa asɔ nu ke mìɔ?
Mɛ ciwo yí lɔn Yehowa senɔ vevi, nɔ wodo jeshi mɔ yewowa nuvɔn gangan ɖe. Vɔ Yehowa sɔ egbe ci eɖo nɔ yi mɛwo fakɔ akɔn nɔ wo mɔ: ‘Míwo gɔjejewo bia shigbe avɔn jin kankan nɛ. Vɔ woaklɔ wo swi yí woaɣe.’ (Ezai 1:18) Nɔ mìtrɔ ji mɛ nyɔnɔnwitɔɔ, Yehowa asɔ ke mì keŋkeŋ. Lé mìatrɔ ji mɛ doɔ? Mìase vevi sugbɔ so enu ci mìwa nu, yí ami enudɔndɔn lɔ wawa keŋ aɖe kuku nɔ Yehowa mɔ yɛ le sɔ ke mì. Yi goduɔ, mìaje agbla atrɔ susu alo numamɛ ciwo yí cucu mì do nuvɔn lɔ mɛ. Gbesɔ kpe niɔ, mìatekpɔ anɔ agbe asɔ koɖo Yehowa se kɔkɔɛwo.—Hlɛn Ezai 55:6, 7.
2. Lé Yehowa zannɔ hamɛmɛshinshinwo do nɔ woakpedo mì nu hwenu mìwa nuvɔn ɔ?
Yehowa nu nɔ mì mɔ, nɔ mìwa nuvɔn gangan ɖeɔ, mìwo le “yɔ [hamɛmɛshinshinwo].” (Hlɛn Ʒaki 5:14, 15.) Hamɛmɛshinshin cɛwo lɔn Yehowa koɖo mɛ ciwo yí sinni. Wona kpla wo, nɔ woakpedo mì nu mìadra mìwo koɖo Yehowa gblamɛ do.—Galatitɔwo 6:1.
Nɔ mìwa nuvɔn ɖe ɖe, lé hamɛmɛshinshinwo akpedo mì nu doɔ? Hamɛmɛshinshin amɛve alo amɛtɔn azan Bibla asɔ kpedo mì nu mìakpɔ enu ci yí taɖo mìwo nuwana lɔ dɔn. Woagbena nukplamu ŋtɔŋtɔwo koɖo ŋsɛndoamunyɔwo mì nɔ woakpedo mì nu mìdagbewa nuvɔn ke o. Wotɛnŋ sɔ gbeta mɔ mìdagbewa ŋɖewo le hamɛ lɔ mɛ o, keke na nɔ hwenu mìahaya le gbɔngbɔn mɛ. Nɔ mɛɖe wa nuvɔn gangan yí detrɔ ji mɛɔ, hamɛmɛshinshinwo aɖi ti le hamɛ lɔ mɛ, nɔ ŋgbevaxo ɖyi mɛkpɛtɛwo o.
JI DWI NI KPƆ DOJI
Kpla nu keŋ amɔŋje lé Yehowa kpenɔdo mì nu nɔ mìwa nuvɔn gangan ɖe mɛ doji koɖo lé àwɛ adonɔ akpe ni.
3. Nɔ mìhun nuvɔn mɛɔ, ekpenɔdo mì nu mìhayanɔ
Nuvɔn ɖekpokpui ci mìwa kan Yehowa, eyi taɖo mìɖo ahun nuvɔn lɔ mɛ ni. Hlɛn Ehajiji Wema 32:1-5, keŋ agbeje nyɔbiɔse cɛ mɛ:
-
Nyi yí taɖo enyɔ mɔ, mìahun mìwo nuvɔnwo mɛ nɔ Yehowa sɔwu ci mìatekpɔ mɔ mìawla woɔ?
Nɔ mìhun mìwo nuvɔnwo mɛ nɔ Yehowa yí biɔ kpekpedonu hamɛmɛshinshinwoɔ, mìavo le mìwoɖekiwo mɛ. Xo VIDEO lɔ, keŋ agbeje nyɔbiɔse ci yí gbɔgbɔ mɛ.
-
Le video lɔ mɛ ɖe, lé hamɛmɛshinshinwo kpedo Canon nu do yí etrɔ va Yehowa gbɔɔ?
Mìɖo ato nyɔnɔnwi yí anu mìwo jimɛnyɔwo pleŋ nɔ hamɛmɛshinshinwo; ɖo wojikɔ akpedo mì nu yɔ. Hlɛn Ʒaki 5:16, keŋ agbeje nyɔbiɔse cɛ mɛ:
-
Nyi yí taɖo enɔnɔ fafɛɖe nɔ hamɛmɛshinshinwo mɔ woakpedo mì nu, nɔ mìto nyɔnɔnwi nɔ woɔ?
Hun ao nuvɔn mɛ, to nyɔnɔnwi nɔ hamɛmɛshinshinwo keŋ alɔn nɔ Yehowa akpedo eo nu le lɔnlɔn mɛ
4. Nyɔna ciwo yí le amɛɖeɖeti le hamɛ lɔ mɛ
Nɔ mɛ ci yí wa nuvɔn gangan ɖe gbe mɔ yedawa do Yehowa sewo jiɔ, datɛnŋ agbenɔ hamɛ lɔ mɛ o. Woaɖi ti le hamɛ lɔ mɛ, yí mìdado ha koɖi alo axo nuxu koɖi kpetii o. Hlɛn 1 Korɛntitɔwo 5:6, 11 koɖo 2 Ʒan 9-11, keŋ agbeje nyɔbiɔse cɛ mɛ:
-
Lé nuvɔnwatɔ ci yí gbe mɔ yedatrɔ ji mɛ atɛnŋ adahɛn nu le hamɛ lɔ nu, shigbe lé kpɔnnɔcike honɔ kpɔnnɔ do nɛɔ?
Mɛ ciwo woɖe ti sugbɔtɔ vatrɔ va hamɛ lɔ mɛ. Ðo ci woɖe wo ti yí eve wo can ɔ, ekpedo wo nu wonyɔ le wowoɖekiwo mɛ. (Ehajiji Wema 141:5) Xo VIDEO lɔ, keŋ agbeje nyɔbiɔse ci yí gbɔgbɔ mɛ.
-
Le video lɔ mɛ ɖe, lé ɖeɖe ci woɖe Sonja ti kpedo nu doɔ?
Nɔ woɖe mɛɖe ti le hamɛ lɔ mɛ ɖe, . . .
-
lé edonɔ bubu Yehowa ŋkɔ nu doɔ?
-
lé edasɛ do mɔ Yehowa wanɔ enu ci yí sɔgbe yí lɔnnɔ amɛɔ?
5. Nɔ mìtrɔ ji mɛɔ, Yehowa sɔ kenɔ mì
Yesu zan labalu ɖeka yí sɔ kpedo mì nu mìkpɔ lé ewanɔ nɔ Yehowa nɔ mɛɖe trɔ ji mɛ. Hlɛn Luiki 15:1-7, keŋ agbeje nyɔbiɔse cɛ mɛ:
-
Nyi kpukpui cɛ kpla eo so Yehowa nuɔ?
Hlɛn Ezekiɛli 33:11, keŋ agbeje nyɔbiɔse cɛ mɛ:
-
Enuvevitɔ ci mìawa asɔ dasɛ mɔ mìtrɔ ji mɛ nyɔnɔnwitɔɔ?
Shigbe lɛngbɔkplɔtɔ nɛɔ, Yehowa lenɔ bu nɔ yi lɛngbɔwo veviɖe
MƐÐEWO NUNƆ MƆ: “Ŋvɔnkɔ mɔ nɔ ŋnu nuvɔn ci ŋwa nɔ hamɛmɛshinshinwoɔ, woavaɖeŋ ti.”
-
Lé ànu nɔ mɛ ci ewakɔ ahan nɔɔ?
ENU CI ÈKPLA
Nɔ mìwa nuvɔn gangan ɖe, gan yí se vevi nyɔnɔnwitɔ yí ɖui gligaan mɔ mìami enudɔndɔn lɔ wawaɔ, Yehowa asɔ ke mì.
Enumɛtoto
-
Nyi yí taɖo enyɔ mɔ mìahun mìwo nuvɔnwo mɛ nɔ Yehowaɔ?
-
Nyi mìɖo awa gbɔxwe Yehowa asɔ mìwo nuvɔnwo ke mìɔ?
-
Nɔ mìwa nuvɔn gangan ɖe ɖe, nyi yí taɖo mìɖo anu nɔ hamɛmɛshinshinwo akpedo mì nuɔ?
KPƆ ŊCƐWO KPƆ
Kpɔ lé Yehowa ku ŋshishi nɔ ŋsu ɖeka shigbe lé wonui le Ezai 1:18 mɛ ɖa.
Lé amɛɖeɖeti le hamɛ toto lɔ wanɔ nywi nɔ mɛɖekpokpui ci enyɔ lɔ kan doɔ?
“Enu ci yí taɖo amɛɖeɖeti le hamɛ lɔ mɛ nyi toto ci mɛ lɔnlɔn le” (Jutakpɔxɔ 15 avril 2015)
Kpɔ lé àwɛ adre amɛɖeɖeti le hamɛ nyɔ lɔ mɛ nɔ mɛ ci yí denyi Yehowa Kunuɖetɔ ɖa.
“Yehowa Kunuɖetɔwo zenɔ nɔ mɛ ciwo yí nɔ wowo sɛnsɛn mɛ kpɔ vayia?” (Àkpɔɛ le siti lɔ ji)
Le exolɔlɔ ci yí nyi “Ele mɔ natrɔva Yehowa gbɔ” mɛɔ, kpɔ enu ci yí taɖo ŋsu ɖeka ci yí to le nyɔnɔnwi lɔ mɛ sa vakpɔɛ mɔ Yehowa yí dɔn ye gbɛ ɖa.
Ebuwo Ke
ENYƆ CIWO AMƐWO BIƆNƆ SE BLAŊBLAŊ
Nyi Bibla nukplakpla ci Yehowa Kunuɖetɔwo sɔ ɖokɔ ŋmɛ nɔ amowo nyiɔ?
To seŋkankan toto ehomana ci Yehowa Kunuɖetɔwo sɔ ɖokɔ ŋmɛ nɔ amowo jiɔ, àtɛnŋ azan Bibla gɔnmɛɖeɖe ɖekpokpui. Vo faa ayɔ ao xomu lɔ pleŋ alo ao xlɔwo nɔ woava bɔdo eo nu le nukplakpla lɔ mɛ.
