57 УРОК
Уур кинчек эткен болзоор, слерге нени эдер керек?
Слер Иегованы тыҥ сӱӱп, оны ачындырбаска албаданып та турган болзоор, је кезикте слер тӱҥей ле јастырараар. Је кезик кинчектер ӧскӧ кинчектерге кӧрӧ, уур болуп јат (1 Коринфтегилерге 6:9, 10). Слер кандый бир уур кинчек эткен болзоор, Иегова слерди сӱӱбей барган деп сананбагар. Ол слердиҥ кинчегерди таштаарга ла слерге болужарга тыҥ кӱӱнзеп јат.
1. Иегова бистиҥ кинчегисти таштазын деп нени эдер керек?
Иегованы сӱӱп турган улус уур кинчек эдип салган деп оҥдоп ийеле, бойлорына тыҥ кородоп, ачурканат. Је олорго Иегова бойыныҥ албатызына айткан сӧстӧр токунал берет: «Слердиҥ кинчектеригер јарык кызыл бӧстий болзо, олор ак кардый болуп калар» (Исайя 1:18). Бис кинчегисти акту јӱрегистеҥ алынып турзаас, Иегова бистиҥ јаманысты таштап салат. Кинчекти алынары ол не дегени? Кинчекти алынары — бу эткен кинчегине ачурканып, база јастыра неме этпеске албаданып, Иегованаҥ јаманын таштазын деп јайнап сураары. Анайда ок бисти кинчекке экелген јастыра санааларды ла кылык-јаҥдарды солып, Иегованыҥ ару нормаларыла јӱрерге албаданар керек. (Исайя 55:6, 7 кычырыгар.)
2. Иегова аксагалдар ажыра канайып болужат?
Кандый бир кижи уур кинчек эткен болзо, Иегова андый кижини јуунныҥ аксагалдарына баштанзын деп кӱӱнзедет. (Иаков 5:14, 15 кычырыгар.) Аксагалдар Иегованы ла оныҥ койлорын сӱӱп јат. Аксагалдар бисти Иеговала колбуларысты орныктырзын деп болужарга, аҥылу ӱредӱ алгылаган (Галаттарга 6:1).
Аксагалдар биске канайып болужат? Эки эмезе ӱч аксагал бистиҥ эткен кинчегис Кудайдыҥ кӧзинде нениҥ учун јастыра деп, Агару Бичиктиҥ болужыла јартап бергилейт. Анайда ок олор бисти база кинчек этпезин деп, тузалу јӧптӧр берип, бистиҥ кӱӱн-санаабысты кӧдӱрип салат. Бистиҥ кӧгӱс су-кадыгыс тыҥыганча, кандый бир ӧйдиҥ туркунына бисти христиан керектерде турушпазын деп, аксагалдар токтодулар эдер аргалу. Је уур кинчек эдип, кинчегин алынбаган улусты аксагалдар јууннаҥ чыгарып салат. Оноҥ башка олор ӧскӧ ака-эјелерге каршузын јетирер.
ТЕРЕҤЖИДЕ КӦРӰГЕР
Уур кинчек эткен улуска Иегова канайып болужып турганын кӧптӧдӧ билип алыгар. Ол тушта слер оныҥ болужын оноҥ тыҥ баалараар.
3. Кинчек эткенин јажырбаганы — кӧгӱс јанынаҥ јазыларына экелетен алтам
Кандый ла кинчек — Иеговага удура кинчек болот. Оныҥ учун бис эткен кинчегис керегинде озо ло баштап Иеговага куучындаар учурлу. Сарын 32:1—5 кычырып, суракты шӱӱжип ийигер:
-
Кинчегисти јажырганча, Иеговага куучындап берзе нениҥ учун јакшы болор?
Бойыстыҥ кинчегисти јӱк ле Иеговага эмес, је аксагалдарга база куучындап берзеес, биске канча кире јеҥил боло берер. ВИДЕОНЫ кӧрӱп, суракты шӱӱжип ийигер.
-
Аксагалдар бу акага Иеговага кайра јанып келерге канайып болушкан?
Биске аксагалдарга бастыра не болгонын јажырбай, ачык-јарык куучындап берер керек, нениҥ учун дезе Кудай олорды биске болушсын деп тургускан. Иаков 5:16 кычырып, суракты шӱӱжип ийигер:
-
Аксагалдардаҥ нени де јажырбай, ӱзе ачык-јарык куучындап берзеес, олорго биске болужарга нениҥ учун јеҥил болор?
Эткен кинчегерди Иеговага куучындап, не болгонын аксагалдарга ӱзе айдып, олордыҥ болужын алыгар
4. Јууннаҥ чыгарып салары кандый туза экелет?
Уур кинчек эткен кижи Иегованыҥ нормаларыла јӱрерге база кӱӱнзебей турза, Кудайдыҥ албатызыныҥ ортозында оныҥ артар аргазы јок. Оны јууннаҥ чыгарып салат. Андый кижиле база куучындашпай јат. 1 Коринфтегилерге 5:6, 11 ле 2 Иоанн 9—11 кычырып, суракты шӱӱжип ийигер:
-
Бир кичинек ачыткы ончо тестени ачыдып салат. Бу темле болзо, кинчегин алынбаган кижи бастыра јуунга јаман салтарын канайып јетирердеҥ айабас?
Јууннаҥ чыгарып салган улустыҥ кӧп сабазы канча да ӧйдӧҥ кайра јангылап келген. Јууннаҥ чыгарып салган улуска јеҥил эмес те болзо, је мынайып олор сагыш алынып, эткен кинчектериниҥ коркышту јаман болгонын оҥдоп алган (Сарын 141:5). ВИДЕОНЫ кӧрӱп, суракты шӱӱжип ийигер.
-
Бу сыйынды јууннаҥ чыгарып саларда, мынаҥ ого туза болды ба?
Јууннаҥ чыгарып салары канайып:
-
Иегованыҥ јакшы адын корулайт?
-
Иегованыҥ чындыгын ла сӱӱштӱ болгонын кӧргӱзет?
5. Бис кинчегисти алынып турзаас, Иегова јаманысты таштап јат
Кижи кинчегин алынып турза, Иеговада кандый сезимдер болуп турганын оҥдоп алзын деп, Иисус биске тем куучындаган. Лука 15:1—7 кычырып, суракты шӱӱжип ийигер:
-
Слер бу темнеҥ Иегова керегинде нени билип алдаар?
Иезекииль 33:11 кычырып, суракты шӱӱжип ийигер:
-
Кижи акту јӱрегинеҥ кинчегин алынып турган деп, канайып билип алар?
Иегова — јалакай кӱдӱчи. Ол бойыныҥ койлорын сӱӱштӱ, эрке кичеейт
КЕЗИК УЛУС АЙДАТ: «Аксагалдарга ӱзе куучындап берзем, олор мени јууннаҥ чыгарып салар деп коркып јадым».
-
Андый кижиге слер нени айдар эдеер?
ТӦС ШӰӰЛТЕЗИ
Бис уур кинчек эдип, акту јӱрегистеҥ кинчегисти алынып, андый јастыраларды база этпеске бек шӱӱп алзаас, Иегова бистиҥ кинчегисти таштаар.
Нени билип алдыгар?
-
Эткен кинчегис керегинде Иеговага куучындап берзеес, нениҥ учун јакшы болор?
-
Иегова бистиҥ јаманысты таштазын деп нени эдер керек?
-
Бис уур кинчек эткен болзоос, нениҥ учун аксагалдарга баштанар керек?
ШИҤДЕЙТЕН МАТЕРИАЛ
Исайя 1:18-те айдылган Иегованыҥ килемјизин бир эр кижи канайып сескенин кӧрӱгер.
Јууннаҥ нениҥ учун чыгарат?
«Јууннаҥ чыгарары — сӱӱштеҥ улам эдилген эп-арга» («Каруулчы шибее», 2015 јыл, кандык ай 15)
Кезикте та кемди де нениҥ учун јууннаҥ чыгарып салат деп, Иегованыҥ Керечизи эмес кижиге канайып јартаар?
«Иегованыҥ Керечилери олордыҥ кудай јаҥынаҥ чыгып калган улусла куучындажат па?» (веб-статья)
«Мен Иеговага кайра јанар деп шӱӱп алгам» деген биографияны кычырып, бир эр кижини јуунга кайра келерге не кӱӱнзеткенин билип алыгар.
«Агару Бичик улустыҥ јӱрӱмин солыйт» («Каруулчы шибее», 2012 јыл, кандык ай 1)
Анайда ок слерге јараар болор
ЈААНТАЙЫН БЕРИЛИП ТУРГАН СУРАКТАР
Иегованыҥ Керечилериниҥ Агару Бичикти ӱренетен курсы канайып ӧдӧт?
Иегованыҥ Керечилеринде Агару Бичик неге ӱредип турганын билип аларга болужатан тузалу курс бар. Ӱредӱниҥ ӧйинде слер бойоордыҥ Агару Бичигерле тузаланар аргалу, анайда ок ӱредӱлерге бойоордыҥ билегерди ле најылараарды айдып алар аргалу.
