57 YATICHÄWI
¿Kunsa mä jachʼa juchar purtʼasïta ukhajj lurañama?
Jehová Diosar wal munaskasasa chuymap jan ustʼayañatak wal chʼamachaskasasa pantjasiñajj utjapuniwa. Ukampis yaqhep juchanakajj yaqha juchanakat sipans jukʼamp jachʼawa (1 Corintios 6:9, 10). Jumatï mä jachʼa juchar purtʼasïta ukhajja, ‘janiw Jehová Diosajj munasjjetuti’ sasin janiw amuyañamäkiti, jupajj jucham perdonañatakisa jumar yanaptʼañatakis jankʼakiwa.
1. ¿Kunsa Jehová Diosamp perdonayasiñatakejj lurañasa?
Khitinakatï Jehová Diosar munasipki ukanakajja, mä jachʼa juchar purtʼasipjjatap laykojj wali llakitaw jikjjatasipjje. Ukampis Jehová Diosajj markapar siskäna uka pachpa arunakampiw jupanakar chuymachtʼi, jupajj akham sänwa: “Juchanakamajj llijkir wila colorjamäkchisa, khunur uñtasit janqʼor tukuyatäniwa” sasa (Isaías 1:18). Jiwasatï taqe chuyma arrepentisiñäni ukhajja, Jehová Diosajj juchanakas perdonistaniwa. Ukampis ¿kunjamsa arrepentisitas uñachtʼaysna? Pantjasitanakasat chuymatpach llakisisa, kunatï jan walïki uk jan lurjjasa, Jehová Diosarus perdontʼita sasin ruwtʼasisaw arrepentisitas uñachtʼaysna. Ukatjja juchar purtʼasiykistu uka amuyunak apanukuñatakisa, jan ukajj juchar purtʼasiykistu uka luräwinak apanukuñatakis chʼamachasiñasawa. Jehová Diosan leyinakaparjam sarnaqañatakis chʼamachasiñasarakiwa (Isaías 55:6, 7 liytʼäta).
2. Juchar purtʼasktan ukhajja, ¿kunjamsa Jehová Diosajj ancianonak toqe yanaptʼistu?
Jachʼa juchar purtʼaski ukarojja Jehová Diosajj akham sasaw ewjjtʼi: “Congregacionankir ancianonakar jawspan” sasa (Santiago 5:14, 15 liytʼäta). Ancianonakajja espíritu santompi uttʼayatäpjjewa, Jehová Diosarusa ovejanakaparus wal munasipjje. Jupanakajj Jehová Diosampi mayamp sum apasiñasatak jiwasar yanaptʼañatakejj wakichtʼatäpjjewa (Gálatas 6:1).
Jachʼa juchar purtʼasktan ukhajja, ¿kunjamsa ancianonakajj yanaptʼapjjestu? Kuntï lurkayätan ukajj kunatsa jan walïki uk amuyañasatakejja, paya jan ukajj kimsa ancianonakaw Bibliamp yanaptʼapjjestani. Juchar jan mayampi purtʼasiñatakejja, suma ewjjtʼanakwa churapjjestani, chʼamañchtʼapjjarakistaniwa. Ukatjja Jehová Diosamp mayamp sum apasjjañäni ukhakamajja, congregacionan yaqhep luräwinak inas ancianonakajj jan lurayjjapjjchistaniti. Maynitejj jachʼa juchar purtʼasisin jan arrepentischejja, ancianonakajj congregacionat jaqsupjjaniwa, ukhamat congregacionar jan walinakat jarkʼaqañataki.
JUKʼAMP YATJJATAÑÄNI
Jachʼa juchar purtʼasktan ukhajj kunsa Jehová Diosajj jiwasar yanaptʼañatak luri, kunjamsa ukham luratap wali valoranit uñjsna uka toqetwa jichhajj yatjjatañäni.
3. Juchanakas arsusiñajja Diosamp mayamp sum apasiñatakiw yanaptʼistu
Juchachasktan ukhajja, Jehová Diosan chuymapwa ustʼaytanjja, ukatwa juparojj juchanakas yatiyañasa. Salmo 32:1-5 liytʼasajja aka toqetwa parltʼapjjäta:
-
Juchanakas imtʼañat sipansa, ¿kunjamsa Jehová Diosar juchanakas arsusiñajj yanaptʼistani?
Jehová Diosar juchanakas arsusisajja ancianonakampiw yanaptʼayasiñasa, ukhamatwa chuymasan sumak jikjjatasiñäni. VIDEO uñtasajja aka toqetwa parltʼapjjäta:
-
Videon uñtktan uka Canon jilatarojja, ¿kunjamsa ancianonakajj Jehová Diosan markapar kuttʼaniñapatak yanaptʼapjjäna?
Ancianonakarojj jan kun imtʼasa qhanwa arsusiñasa, jupanakajj jiwasar yanaptʼañatak uttʼayatäpjjewa. Santiago 5:16 liytʼasajja aka toqetwa parltʼapjjäta:
-
¿Kunsa ancianonakampi yanaptʼayasiñatakejj lurañasa? ¿Kunatsa ukham amuyta?
Juchanakam jan imtʼas qhan ancianonakar yatiyam, Jehová Diosajj munasiñat yanaptʼktam uksa katoqasirakim.
4. Congregacionat juchanir jaqsuñajj taqeniruw yanaptʼi
Maynitï jachʼa juchar purtʼasisin Jehová Diosan leyinakapar jan istʼañ munkchi ukhajja, janiw congregación taypinkjjañapäkiti. Congregacionat jupajj jaqsutäjjañapawa, janiw jupampejj chikachasiñasäkiti ni parlañasäkarakisa. 1 Corintios 5:6, 11 ukat 2 Juan 9-11 liytʼasajja aka toqetwa parltʼapjjäta:
-
Mä jukʼa levadurajj taqpach masaruw poqtayi. Jan arrepentisir jaqemp chikachassna ukhajja, ¿ukhamarakit congregacionar jan waltʼayaspa? ¿Kunatsa ukham amuyta?
Congregacionat jaqsutäpkäna ukanakatjja waljaniw kuttʼanjjapjje. ¿Kunatsa kuttʼanipjje? Congregacionat jaqsutäsajj walsa jupanakajj llakisipkchïnjja, ukaw jan wali luratanakapat amuyasipjjañapatak yanaptʼäna (Salmo 141:5). VIDEO uñtasajja aka toqetwa parltʼapjjäta:
-
¿Kunjamsa jaqsutäñajj Soniar yanaptʼäna?
-
Congregacionat juchanir jaqsuñajja, ¿kunjamsa Jehová Diosan sutip jachʼañchi?
-
Congregacionat juchanir jaqsuñajja, ¿kunjamsa Jehová Diosan cheqapar uñjirïtapsa jiwasar munasiñamp uñjatapsa uñachtʼayi?
5. Arrepentisiñäni ukhajj Jehová Diosajj perdonistaniwa
Kunapachatï maynejj arrepentiski ukhajja, kunjamsa Jehová Diosajj jikjjatasi uk amuyañasatakejj chhaqat mä ovejatwa Jesusajj parläna. Lucas 15:1-7 liytʼasajja aka toqetwa parltʼapjjäta:
-
Chhaqat mä ovejat parlki uka uñachtʼäwejja, ¿kunsa Jehová Diosat yatichistu?
Ezequiel 33:11 liytʼasajja aka toqetwa parltʼapjjäta:
-
¿Kunsa cheqpachapun arrepentisitas uñachtʼayañatakejj lurañasa?
Jehová Diosajj mä suma awatirjamaw ovejanakapat wal llakisi.
YAQHEPANAKAJJ AKHAM SAPJJEWA: “Ancianonakar juchaj arsusiñ ajjsarayastwa. Kuntï lurkta uk arsusï ukhajja congregacionat jaqsupjjetaniwa” sasa.
-
Maynitejj ukham amuyaspa ukhajja, ¿juparojj kamsasmasa?
¿KUNSA YATEQAWAYTAN?
Mä jachʼa juchar purtʼasisajj taqe chuyma arrepentisiñäni, janirak mayampis uk lurjjañäni ukhajja, Jehová Diosajj perdonistaniwa.
Amtañataki
-
¿Kunatsa Jehová Diosar juchanakas arsusiñajj wakisi?
-
¿Kunsa Diosajj juchanakas perdonañapatakejj lurañasa?
-
Mä jachʼa juchar purtʼasisajja, ¿kunatsa ancianonakar yanaptʼa mayiñasa?
JUKʼAMP YATJJATAÑAMATAKI
Isaías 1:18 textorjamajja, ¿kunjamsa mä chachajj Jehová Diosan khuyapayasiñap katoqäna?
¿Kunjamsa congregacionat maynir jaqsuñajj yanaptʼi?
“¿Maynirojj munasiñatti tamat jaqsuspacha?” (Yatiyañataki abril 15, 2015)
Jehová Diosan jan Testigopäki ukanakarojja, kunjamsa congregacionat jaqsuñ toqet qhanañchtʼasma uka toqet yatjjatam.
Kunjamsa mä chacharojj Diosan markapar kuttʼañapatak Jehová Diosajj yanaptʼäna uk yatiñatakejja, “Jehová Diosar kutʼjjañ wal munayäta” sat cheqanwa liytʼasma.
“Bibliat yatjjatasaw nayra jakäwinakapjja jaytawayapjje” (Yatiyañataki julio-septiembre, 2012)
Akanakajj inas gustarakiristam
KUNANAKSA JUKʼAMP JISKTʼASIPJJE
¿Kunjamsa Jehová Diosan Testigonakapajj Bibliat yatichapjje?
Jehová Diosan Testigonakapajj gratisakiw Bibliat yatichapjje, kawknïr Bibliampis yateqañ munta ukajj jumatäjjewa. Jumamp chika yateqapjjañapatakejja, taqpach familiamaruw invittʼasma, amistadanakamarus invittʼarakismawa.
